吴淞街道

吳淞街道是中國上海市寶山區下頭個一隻街道，來勒區境東面，東面是長江、黃浦江搭吳淞口，南起長江路延伸到東海船廠南圍牆，西到泗塘河，北到雙城路，面積7.52平方公里^[1][2]，戶籍人口74,948人^{（2014年）[2]}。街道辦事處來勒淞濱路385號^[2]。

歷史

吳淞來勒明末成型，伊個辰光是長江口主要個海防要塞，有兵營建制。鴉片戰爭里向陳化成個犧牲地搭兩次淞滬抗戰個主戰場儕來勒吳淞，乃朝還保留有古炮台、淞滬鐵路炮台灣終點站遺址等歷史人文遺蹟。

吳淞街道來勒清乾隆年間叫胡巷橋鎮。道光三年（1823年），為咾賑災方便，劃出寶山縣城廠胡巷橋搭周邊個吳淞口地區，設立吳淞廠。宣統二年（1910年），吳淞廠改叫吳淞鄉。民國17年（1928年），劃畀上海特別市，屬吳淞區，是區公所駐地。民國27年（1938年）8月，設吳淞鎮^[3]。

1949年5月份，吳淞集鎮設第一辦事處，1955年3月份，來垃境域薀藻浜以南部分設第二辦事處，後來改叫吳淞鎮辦事處搭薀藻浜辦事處。1956年1月份，吳淞區撤銷，劃畀北郊區，同年3月份，吳淞鎮辦事處、薀藻浜辦事處合併成立吳淞鎮。1958年9月份，分屬紅旗人民公社搭先鋒人民公社。1959年3月份，變成寶山縣直屬鎮。1960年初，重建吳淞區，是淞興路辦事處。同年4月份，是吳淞城市人民公社薀藻浜分社。同年10月份，恢復街道建制。1962年3月份，成立薀藻浜街道，同年4月份，改叫吳淞鎮街道。1964年5月份，吳淞區撤銷，劃畀楊浦區，1980年1月份，劃畀寶鋼地區辦事處。1981年，又繞仔一圈劃畀重建個吳淞區^[4]。1981年8月份，吳淞鎮泰和路以北地區拆分成海濱街道^[4][5]。1988年，海濱街道改名海濱新村街道。

2006年5月8號，經上海市人民政府批准，撤銷吳淞鎮街道、海濱新村街道^[6]，合併建立吳淞街道^[1][6]。

行政區劃

吳淞街道下頭個箇些居民委員會：和豐居委會、淞新居委會、泗東居委會、李金居委會、八棉一紡居委會、八棉二紡居委會、桃園居委會、淞西居委會、長征居委會、吳淞三村居委會、吳淞新城居委會、海濱新村居委會、海濱二村一居委會、海濱二村二居委會、海濱三村居委會、海濱四村居委會、海濱八村居委會、牡丹江路居委會、西朱新村居委會、三營房居委會、永清新村居委會、永清二村居委會、海江二村居委會、海江新村居委會。

另見

• 吳淞