第一代威灵顿公爵亚瑟·卫斯理

亞瑟·衛斯理（Arthur Wellesley，1st Duke of Wellington，1769年－1852年)是出身愛爾蘭島個英國貴族、軍事家搭政客。因為立在滑鐵盧戰役當中拿拿破崙一世徹底擊潰，終結拿破崙戰爭出名，是英國個國家英雄。

Sir Arthur Wellesley, 1st Duke of Wellington

早年

伊來自一個小貴族家庭，年輕辰光就加入英軍。1793年，前往荷蘭參加對法國大革命之後革命軍個圍剿，軍銜中校，弗過，因為發寒熱病倒，但立在戰爭當中學到蠻多有用個事體。1796年晉升上校，1797年1月，畀渠派遣到印度，投身南亞個殖民事業。立在第四次英邁戰爭當中表現出眾，並立在之後第二次英馬戰爭當中拿馬拉地帝國大軍殲滅。1804年，伊弗想繼續蹲在印度，申請回到英國並結婚。1805年，伊參加短暫又失敗個丹麥遠征，弗過無多少損失就回到英國，之後，前往伊比利亞半島，開始伊傳奇性個半島戰爭。

半島戰爭

個辰光，半島戰爭已經開始，西班牙畀拿破崙徹底占領，並扶持自家個阿哥約瑟夫波拿巴當上西班牙個傀儡國王。法國個軍隊逼近葡萄牙，因為葡萄牙是英國個盟友，所以英國決定出兵幫助。威靈頓立在葡萄牙布置精妙個防線，讓法國人好幾趟嘸辦法前進，這種防線後勢來又畀人叫做威靈頓之線。1811年，法國人基本撤出葡萄牙，1812年開始，威靈頓帶領葡萄牙盟友，立在西班牙游擊隊個配合下，開始反攻，並強行拿巴達霍斯攻克。法國人為此放棄安達露西亞。個辰光，交關人儕建議威靈頓直接進攻馬德里，弗過伊因為自家攻城武器有限，作罷，又返回葡萄牙。1813年，威靈頓重新發動攻勢，聲東擊西，立在維多利亞之戰（Battle of Vitoria）當中拿西班牙傀儡部隊搭法國人徹底擊潰。之後威靈頓越過庇里牛斯山脈，直接進入法國南部，並立在土魯斯戰役當中拿法國元帥蘇爾特擊潰。立在迭個辰光，正好傳過來拿破崙一世退位個消息。威靈頓成功凱旋，並因為自家個戰功確立老大個名聲，冊封為威靈頓公爵。同時，伊直接畀渠任命為駐法國全權大使。

滑鐵盧戰役

1814年威靈頓前往維也納參加維也納和會，1815年3月，拿破崙偷渡法國，重新篡位，建立百日王朝。威靈頓授命重新組織軍隊對抗迭個野心家。因為手頭個老兵有限，伊調集蠻多漢諾威王國個下薩克森人作為伊個德意志軍團補充力量，又讓個辰光立在英軍當中個荷蘭王子招攬荷蘭軍隊作為補充。個能，湊齊一隻幾萬人個部隊，搭伊個普魯士盟友布哈德·萊貝雷希特·馮·布呂歇爾元帥個軍隊開始向拿破崙個軍隊挺近。拿破崙個部眾侵入比利時，立在林尼戰役（Ligny）當中拿布呂歇爾擊破，又立在幾天之後，對威靈頓個部隊進行一場小規模個四臂村之戰（Battle of Quatre Bras）。法軍去的戰術勝利，威靈頓撤離到靠近布魯塞爾個一條山脊浪，駐紮地就立在小鎮滑鐵盧南面。6月18號，決定性個滑鐵盧戰役爆發，威靈頓立在一天當中成功守住法國人個狂攻，到傍晚，本身畀人認為弗會出現個普魯士軍隊前來合圍，拿破崙個部隊崩潰，法國人南竄逃亡，威靈頓獲得對拿破崙個勝利，並通過迭個戰爭徹底樹立自家個威名。拿破崙戰爭也立在當天宣告終結。

餘生

擊敗拿破崙個壯舉讓威靈頓收穫邪氣高個威望，伊收到歐洲五個國家個元帥頭銜，並加封交關貴族稱號，1819年，伊開始進入英國保守黨個政府，弗過立在軍隊當中影響力一直朆衰減，1827年伊擔任英國陸軍總司令直到死脫。1828年，威靈頓成為英國首相。弗過，相比伊個軍事成功，伊對政治並弗是十分得心應手，立在擔當首相個辰光，因為選舉權擴大問題，搭自家內閣有蠻多衝突，威靈頓是保守主義者，本身對激進思想相當厭惡，弗過伊又認為弗做出一點妥協是嘸辦法適應1830年代個社會個。伊對選舉權搭愛爾蘭問題浪個固執讓英國保守黨立在1830年代分裂，並因此終結從小威廉皮特開始個長期執政。

威靈頓立在1846年之後徹底退出政壇，弗過繼續擁有英軍總司令個頭銜。1852年伊去世，大英帝國把伊國葬個哀榮，伊出殯當日，前來瞻仰個老百姓多到嘸站立個地方。威靈頓安葬在聖保羅大教堂地下墓室核心地點，搭英國海軍傳奇人物納爾遜子爵享受同樣個尊崇。