拿破仑

拿破崙波拿巴(法文：Napoléon Bonaparte，1769年8月15號-1821年5月5號)是19世紀開始辰光統治法國搭歐洲大陸個獨裁者，立在1804年之後自家加冕，成為法蘭西第一帝國皇帝。伊本身來自地中海個科西嘉島，早年參加科西嘉獨立活動。之後立在法國大革命當中因為軍功，成為霧月政變之後個都督。之後，伊遠征埃及，回國推翻都督政府，開始獨裁。伊擁有邪氣強個軍事指揮能力。立在之後好幾趟拿反法同盟擊破。同時討好國內個平民搭資產者，收攏民心。到1804年，正式自立成為皇帝。1806年又逼迫奧地利放棄神聖羅馬帝國皇帝個頭銜。拿神聖羅馬帝國終結。1808年，擊破普魯士，立在勃蘭登堡門下頭閱兵。同年廢除西班牙個卡洛斯四世，讓自家個阿哥成為傀儡國王。個辰光，伊個法蘭西第一帝國向歐洲各地派遣法國官僚，用法國專制壓迫歐洲老百姓，又煽動老百姓去追捧自由，擾亂當地原有個社會秩序。造成老大個破壞。弗過，因為1805年特拉法加海戰個慘敗，伊一直嘸能力侵略英國。1812年，拿破崙對俄羅斯進行侵略。因為戰線過長，立在冬天到達莫斯科之後，俄國人還是弗投降。只好災難性撤退。之後，反法同盟一路追擊，立在萊比錫戰役當中拿拿破崙擊潰。伊只好退位。弗過，到1815年，伊又跑回法國，重新登基。個趟，伊立在滑鐵盧戰役當中畀大英名將威靈頓公爵搭普魯士老將不履歇聯合圍殲，一敗塗地。再次退位。畀英國皇家海軍押送到大西洋高頭個聖海倫娜島度過餘生。1840年，伊個靈柩重新迎回法國，安葬法蘭西榮軍院。

拿破崙手插衣里向 (1806)

家庭關係

具體詞條參見拿破崙家族

• 約瑟芬·德·波厄內，比拿破崙大6歲個寡婦，也是拿破崙第一任老婆。因為弗好幫伊生出男性繼承人，畀休脫。
• 瑪麗·路易莎,奧地利哈布斯堡家族個成員，畀拿破崙討過來幫自家生後代，兒子是拿破崙二世。
• 拿破崙二世，代號羅馬王，是拿破崙唯一個兒子。弗過身體弗靈光，活到21歲就死脫。

影響

Napoleon Wagram

拿破崙個獨裁統治，搭伊對歐洲君主國常年個侵略，除脫帶來法國霸權之外，又讓歐洲各地個知識分子歡呼雀躍，接受伊代表個法國大革命激進思想，個當中，就包括自有、平等、天賦人權之類，同時，也推進民粹立在歐洲各地個泛濫。拿破崙到各地打壓當地老貴族，扶持地方文人，擠壓教會，植入法國文人官僚系統，讓各地個集權法術水準大大提高，到1815年拿破崙輸脫之後，伊個影響還是一直持續。此外，拿破崙廢脫從中世紀就代表西歐唯一皇帝頭銜個神聖羅馬帝國，造成歐洲封建秩序殘餘徹底完結，19世紀，歐洲冒出交交關關自稱是帝國個國家，民族主義搭帝國主義個結合引發奧地利勢力下降搭普魯士勢力提升，最終引發第一次世界大戰。