江泽民

江澤民（1926年8月17號—2022年11月30號）江蘇揚州人，祖籍吳越徽州府，四世祖遷居江北。中國共產黨中央委員會總書記、中央軍事委員會主席搭仔中共第三代領導集體核心。

江澤民總書記

伊本生是中國共產黨上海市委員會書記，為仔解拆天安門六四學生鬧風潮樁事干高頭立功上台。

2022年11月30號上晝12點13分，江澤民因白血病合併多臟器功能衰竭，搶救無效，勒拉上海華東醫院沒脫哉^[1]，在世日腳96歲^[2]。下晝頭裏4點34分，新華社發布《告全黨全軍全國各族人民書》，公布江澤民過世個消息^[2]。2022年12月11號上晝頭裏12點35分，照仔江澤民死脫前個遺願搭伊親眷個忖頭，江澤民個骨灰由揚州號兵艦護送到長江入海口撒到海裏向^[3]。

軼事

才藝

2002年，伊個辰光個羅宋國總統普京頌讚江心孔巧會個才藝多，勒拉各個國度個元首裏向傳為逸話，又講伊羅宋語講來邪氣好，外加會得用英語搭意大利語唱歌，自家搭伊是「推扳得遠天野地」^[4]。

江澤民會得多種閒話是有名個，伊個俄語^[5]、英語^[5]、吳語里向個上海閒話^[6]、江淮官話個揚州閒話是頂介慣熟個。有講江澤民會得英語、俄語、羅馬尼亞語，還稍許會眼德語搭仔日語^[4]。是伊有常仔模仿粵語、西南官話^[7][8][9]是活脫勢像。江澤民向美國聽客背過林肯個演講，還且勒搭公開場化背過《哈姆雷特》片段搭《西風頌》詩^[4]。

2011年，《領導幹部外事用語叢書》首發，江澤民還畀本書寫序——《領導幹部一定要努力學習外語》^[10]。

江澤民勒拉笛子、書法個高頭也蠻來山個^[11][12]。據新華社報道，伊一生頂頂歡喜西方古典音樂^[4]。是伊年常參加節慶聯歡活動或者搭淘伴聚會個辰光，常樁頭裏會得上去「扎台型」，要麼唱兩句，用意大利語唱我個太陽，要麼拉二胡、唱京劇^[4]。

流行文化

主文章：膜蛤文化

2012年11月中共十八屆一中全會推選仔習近平當總書記後首，「膜蛤文化」拉簡中互聯網起頭行起來。交關網民扮江澤民個言語方式個假樣頭，結生出各式樣個時路文化^[13]哉。