高桥海滨浴场

高桥海滨浴场，一家曾来勒上海市高桥镇个水上乐园，是天然海滨浴场。^[1]

历史

民国19年（1930年），上海市政府动议来勒长江口边个高桥龙王庙筹建高桥海滨浴场，想法是方便上海市民避暑。民国21年（1932年）7月16号初步造好开放。^{[2][3][4][5][6]}刚开业个辰光，休息处咾啥个设施啥侪呒没。^[6]後来曾一度转包畀商办。^[3]

1935年重新变成市办浴场，兴业信托社、市轮渡公司主持管理，同年6月30号浴场正式开张。^[3]箇個辰光，浴场设施齐全，门楼绿化琉璃瓦盖，两边竖勒美人鱼雕像；门口有近五十步水门汀石级，两边有池塘畀游客钓鱼；除开更衣室、淋浴卫生设备，海滨浴场还有得旅馆、饭店、酒吧、舞厅等设施。^[2][3][4][5]张学良、吴铁城、杜月笙咾啥个政商界名流送匾祝贺，于右任、黄炎培分别畀“高桥海滨浴场”、“高桥饭店”题名。^[3]市轮渡公司也增开夜班轮渡帮长轮渡，拿高桥天灯口码头帮上海外滩连起来，方便游客出行。^[6]1937年，日军来勒龙王庙登陆，拿伊轰没哉，弗得弗停止开放。^{[2][3][4][5][6]}20世纪40年代，海滨浴场没设备却重新开放，导致1946年死仔4個来孛相个游客。^[6]

上海战役以后，上海市人民政府接管高桥海滨浴场。1951年7月4号，高桥海滨浴场重新开业。^[6]1958年，上海市总工会、市体委重建，另外来勒高东乡徐家路滩竹园村处重新造了高桥海滨浴场，设备较简单。1963年第七号台风拿伊吹坏脱。^[2][3][5]20世纪60年代末，海滨浴场曾重新开放，方便上海民众游长江。^[6]

1984年，川沙县人民政府决定来勒老海滨浴场原址高桥龙王庙重造高桥海滨浴场，水陆面积940亩，第一期投资500万元。重建工程包括拓宽高桥去海滨个公路海高路，造下水台级6座搭仔其他安全设施，2640平方米饭店1座，7500平方米停车场、脚踏车停车棚，200平方米商店，2000平方米更衣、出租、寄存等简易建筑、绿化地带咾啥个，组织有3条救生艇、20条救生船、近80名救生员个救生队伍。1985年6月16号造好开放。^[2][3][4][5]1993年，因外高桥保税区（貤有讲是外高桥发电厂^[5]）开发征地而停办。^[2][3][4][6]