高桥海滨浴场

高橋海濱浴場，一家曾來勒上海市高橋鎮個水上樂園，是天然海濱浴場。^[1]

歷史

民國19年（1930年），上海市政府動議來勒長江口邊個高橋龍王廟籌建高橋海濱浴場，想法是方便上海市民避暑。民國21年（1932年）7月16號初步造好開放。^{[2][3][4][5][6]}剛開業個辰光，休息處咾啥個設施啥儕嘸沒。^[6]後來曾一度轉包畀商辦。^[3]

1935年重新變成市辦浴場，興業信託社、市輪渡公司主持管理，同年6月30號浴場正式開張。^[3]箇個辰光，浴場設施齊全，門樓綠化琉璃瓦蓋，兩邊豎勒美人魚雕像；門口有近五十步水門汀石級，兩邊有池塘畀遊客釣魚；除開更衣室、淋浴衛生設備，海濱浴場還有得旅館、飯店、酒吧、舞廳等設施。^[2][3][4][5]張學良、吳鐵城、杜月笙咾啥個政商界名流送匾祝賀，于右任、黃炎培分別畀「高橋海濱浴場」、「高橋飯店」題名。^[3]市輪渡公司也增開夜班輪渡幫長輪渡，拿高橋天燈口碼頭幫上海外灘連起來，方便遊客出行。^[6]1937年，日軍來勒龍王廟登陸，拿伊轟沒哉，弗得弗停止開放。^{[2][3][4][5][6]}20世紀40年代，海濱浴場沒設備卻重新開放，導致1946年死仔4個來孛相個遊客。^[6]

上海戰役以後，上海市人民政府接管高橋海濱浴場。1951年7月4號，高橋海濱浴場重新開業。^[6]1958年，上海市總工會、市體委重建，另外來勒高東鄉徐家路灘竹園村處重新造了高橋海濱浴場，設備較簡單。1963年第七號颱風拿伊吹壞脫。^[2][3][5]20世紀60年代末，海濱浴場曾重新開放，方便上海民眾游長江。^[6]

1984年，川沙縣人民政府決定來勒老海濱浴場原址高橋龍王廟重造高橋海濱浴場，水陸面積940畝，第一期投資500萬元。重建工程包括拓寬高橋去海濱個公路海高路，造下水台級6座搭仔其他安全設施，2640平方米飯店1座，7500平方米停車場、腳踏車停車棚，200平方米商店，2000平方米更衣、出租、寄存等簡易建築、綠化地帶咾啥個，組織有3條救生艇、20條救生船、近80名救生員個救生隊伍。1985年6月16號造好開放。^[2][3][4][5]1993年，因外高橋保稅區（貤有講是外高橋發電廠^[5]）開發徵地而停辦。^[2][3][4][6]