Ô͘ Kim-liông

Ô͘ Kim-liông (1984 nî 2 goe̍h 2 ji̍t chhut-sì ), sī tī Tâi-oân Tâi-lâm-chhī chhut-sì ê iá-kiû soán-chhiú, chit-má tī Tiong-hôa Chit-pāng Thóng-it 7-ELEVEn Sai hāu-le̍k. Ô͘ Kim-liông bat tī Bí-kok phah-kiû, sī Tâi-oân tē-5-ê peh khì--lih Tāi-liân-bêng ê kiû-oân, siāng-sî mā-sī Tāi-liân-bêng sú-siōng sèⁿ ê jī-bú siōng chió ê kiû-oân (Hu). 2012 nî nî-té tńg-lâi Tâi-oân chham-ka Tiong-hôa Chit-pāng Soán-siù-hōe, hō͘ Gī-tāi Sai-gû kéng-tio̍h, chiâⁿ-chò Tiong-chit 24 nî ê soán-siù chiōng-goân, pēng-chhiáⁿ hō͘ Gī-tāi Sai-gû kéng chò tūi-tióⁿ, koh kā tī Bí-kok chá tio̍h leh kí-pān ê "Chhài-chiáu-ji̍t" ín ji̍p-lâi Tâi-oân^[1]. Kah tī Bí-kok ê sî-chūn bô-kâng, tī Tiong-hôa Chit-pāng ê sî chú-iàu sī chò gōa-iá-chhiú ia̍h-sī chí-tēng táⁿ-kek. Ô͘ Kim-liông bat tī 2015 kàu 2018 nî chò tē-4-kài Tiong-hôa Chit-pāng Kiû-oân Kang-hōe lí-sū-tióⁿ, tī 2016 nî Gī-tāi Sai-gû bē-tiāu liáu-āu chiâⁿ-chò Hù-pang Hān-chiòng kiû-oân^[2][3]. 2021 nî-bóe hō͘ Hù-pang Hān-chiòng sek-chhut liáu-āu kah Thóng-it 7-ELEVEn Sai chhiam-iok, chiâⁿ-chò Thóng-it Sai ê kiû-oân.

Ô͘ Kim-liông 胡金龍
2012 nî, Ô͘ Kim-liông tī Cleveland Indians ê Tāi-liân-bêng chhun-hùn chìn-hêng siú-pī liān-si̍p
Thóng-it 7-ELEVEn Sai – No. 51
gōa-iá-chhiú, chí-tēng táⁿ-kek, it-lúi-chhiú
Chhut-sì: 1984 nî 2 goe̍h 2 ji̍t （1984-02-02）(41 hòe)  Tiong-hôa Bîn-kok Tâi-lâm-chhī
Táⁿ-kek: chiàⁿ Tâu-kiû: chiàⁿ
Chit-gia̍p chho͘-chhù chhut-sài
Bí-kok Chit-pāng: 2007 nî 9 goe̍h 1 hō, tī Lo̍k-sam-ki Dodgers
Tiong-hôa Chit-pāng: 2013 nî 3 goe̍h 24, tī Gī-tāi Sai-gû
Bí-kok Chit-pāng sò͘-kì thóng-kè (chì 2011 nî ûi-chí)
Táⁿ-kek-lu̍t	0.176
An-táⁿ	34
Choân-lûi-táⁿ	2
Táⁿ-tiám	18
Thau-luí	4
Tiong-hôa Chit-pāng sò͘-kì thóng-kè (chì 2024 nî ûi-chí)
Táⁿ-kek-lu̍t	0.345
An-táⁿ	1221
Choân-lûi-táⁿ	85
Táⁿ-tiám	545
Thau-luí	75
Tūi-ngó͘
MLB Lo̍k-sam-ki Dodgers (2007 nî – 2010 nî) Niú-iok Tōa-to͘-hōe (2011 nî) Cleveland Indians (2012 nî) ABL Adelaide Soa-hî（2011 nî) CPBL Gī-tāi Sai-gû (2013 nî – 2016 nî) Hù-pang Hān-chiòng (2017 nî – 2021 nî) Thóng-it 7-ELEVEn Sai (2022 nî –)
Seng-gâi cheng-chhái piáu-hiān kah ti̍t-chióng
Tiong-hôa Chit-pāng nî-tō͘ chóng-koan-kun: 2016 Tiong-hôa Chit-pāng Táⁿ-kek-ông: 2014, 2015 Tiong-hôa Chit-pāng An-táⁿ-ông: 2014, 2015 Tiong-hôa Chit-pāng Chòe-ka 10-jîn Chióng: Gōa-iá-chhiú: 2014 Chí-tēng táⁿ-kek: 2018, 2019 Tiong-hôa Chit-pāng tan-goe̍h MVP: 2018/09 Tiong-hôa Chit-pāng Bêng-seng-sài: 2013 – 2016, 2018, 2019

Seng-gâi

Ô͘ Kim-liông tī ko-tiong ê sî tio̍h í-keng phah liáu chiâⁿ hó, tha̍k Lâm-eng Siong-kang ê i ta̍k-nî lóng ji̍p-soán chheng-pāng tāi-piáu-tūi, ū 1-pái A-chiu Chheng-pāng-sài kah 2-pái IBA Sè-kài Chheng-pāng-sài ê chhut-sài kì-lo̍k. Ko-tiong it-nî ê Ô͘ Kim-liông chú-iàu tam-jīm jī-lúi-chhiú, jī-nî liáu-āu khì pó͘ sia̋n-pái Tân Kang-hô ê ūi-tì tam-jīm iû-kek-chhiú, mā bat chhah-hoe-á chò tâu-chhiú, kiû-sok ē-tàng chhiau-kòe 140 km/h, koh tâu chhut bē-bái ê sêng-chek, hō͘ i bat hoân-ló kòe beh chò iá-chhiú a̍h-sī tâu-chhiú.

Lú Bí Sî-kî

2002 nî Ô͘ Kim-liông ko-tiong pit-gia̍p, ka-ji̍p iá-kiû bêng-hāu Bûn-hòa Tāi-ha̍k, í it-nî kiû-oân ê sin-hūn chiâⁿ-chò sian-hoat kiû-oân, tam-jīm 1-hoan iû-kek-chhiú. Kâng-nî 11 goe̍h, Lo̍k-sam-ki Dodgers kah Ô͘ Kim-liông chhiam--loe̍h ha̍p-iok, Tâi-oân Bûn-hòa Tāi-ha̍k mā í kau-ōaⁿ ha̍k-seng ê hong-sek hia̍p-chō͘ i kái-koat peng-e̍k būn-tê. I mā sī Bí-kok Chit-pāng Lo̍k-sam-ki Dodgers chhiam ê tē-saⁿ-ê Tâi-oân soán-chhiú (thâu-2-ê sī Tân Kim-hong kah Koeh Hông-chì), mā sī tē-2-ūi Tâi-oân iá-chhiú.

Lo̍k-sam-ki Dodgers Sió-liân-bêng sî-kî.

Iá-kiû Bí-kok [en] tī 2003 nî kàu 2006 nî, liân-sòa 4-tang kā Ô͘ Kim-liông soán chò Lo̍k-sam-ki Dodgers Sió-liân-bêng hē-thóng ê chòe-ka hông-siú iû-kek-chhiú, jî-chhiáⁿ i táⁿ-kek-lu̍t mā chiâⁿ koân.

2007 nî, tī Lo̍k-sam-ki Dodgers sî-kî.

2007 nî tī Sió-liân-bêng Bêng-seng-sài [en] tit-tio̍h tan-tiôⁿ MVP, pēng-chhiáⁿ hőng soán chò Dodgers 2007 nî-tō͘ Sió-liân-bêng ê chòe-ka kiû-oân. 9 goe̍h 1 hō, Ô͘ Kim-liông chèng-sek chiâⁿ-chò thâu-chi̍t-ūi peh khì--lih Bí-kok Chit-pāng Tāi-liân-bêng ê Tâi-oân lāi-iá-chhiú. Kâng-chi̍t-ji̍t, i tī Dodgers kah San Diego Kàu-sū ê pí-sài lāi-té chiōⁿ-tiôⁿ tāi-táⁿ, chi̍t táⁿ-sò͘ bô an-táⁿ, chiâⁿ-chò tē-2-ūi tī Tāi-liân-bêng chhut-sài ê Tâi-oân Iá-chhiú (thâu-chi̍t-ūi sī Tân Kim-hong). 9 goe̍h 11, tī bīn-tùi San Diego Kàu-sū-tūi ê pí-sài tang-tiong chiōⁿ-tiôⁿ tāi-táⁿ, kòng chhut Tāi-liân-bêng seng-gâi thâu-chi̍t-ki an-táⁿ kah ko͘-hun hőng-bú-láng.

Lo̍k-sam-ki Dodgers sî-kî, chiōⁿ-tiôⁿ kòng-kiû ê Ô͘ Kim-liông.

2009 nî, Ô͘ Kim-liông tī Lo̍k-sam-ki Dodgers Tāi-liân-bêng chhun-hùn.

2010 nî 12 goe̍h 28, Dodgers in-ūi iû-kek-khu tn̂g-kî hō͘ bêng-seng kiû-oân Furcal [en] chiàm--leh, koh ka-siōng Ô͘ Kim-liông pún-sin táⁿ-kek lêng-le̍k khah bái, tio̍h kā i kau-e̍k khì Tōa-to͘-hōe-tūi.

2011 nî, tī Niú-iok Tōa-to͘-hōe sî-kî.

2011 nî khai-kùi ê sî bat ji̍p-khì 25-lâng miâ-toaⁿ, tān-sī in-ūi táⁿ-kek khah bái ê koan-hē, tī 5 goe̍h 17 pí-sài kiat-sok liáu-āu hőng pàng--lo̍h-khì, pēng-chhiáⁿ tī kiû-kùi kiat-sok liáu-āu hőng sek-chhut. Āu-lâi i khì-kàu Ò-chiu Iá-kiû Liân-bêng Adelaide Soa-hî-tūi, ǹg-bāng thang hō͘ Tāi-liân-bêng kiû-thàm chù-ì tio̍h.

Cleveland Indians sî-kî

2012 nî 1 goe̍h 13 kah Cleveland Indians chhiam--loe̍h Sió-liân-bêng ê ha̍p-iok, 3 goe̍h 27 pún-té beh kau-e̍k khì Hùi-sêng-lâng, tān-sī lo̍h-bóe tī 29 hō chhú-siau kau-e̍k, hō͘ Cleveland Indians sek-chhut.

Ô͘ Kim-liông tī Cleveland Indians Tāi-liân-bêng chhun-hùn táⁿ-kek liān-si̍p.

Tiong-chit Sî-kî

2013 nî tńg-lâi Tâi-oân ka-bêng Tiong-hôa Chit-pāng, hō͘ Gī-tāi Sai-gû kéng-tio̍h, sī Tiong-hôa Chit-pāng 24 nî ê soán-siù chiōng-goân.

Gī-tāi Sai-gû sî-kî ê Ô͘ Kim-liông

2014 nî kah 2015 nî, liân-sòa 2-tang tit-tio̍h "an-táⁿ-ông" kah "táⁿ-kek-ông", kî-tiong 2014 nî kiû-kùi koh tit-tio̍h "chòe-ka 10-jîn chióng tò-gōa-iá-chhiú". 2015 nî tû-liáu chhòng-chō Tiong-chit siōng chió tiôⁿ-chhù 300-an kah 400-an ê kì-lo̍k í-gōa, mā ta̍t-sêng kò-jîn 200 tit-hun kah 300-tiôⁿ chhut-sài, koh tī Kok-khèng-ji̍t hit-kang tī iân-tn̂g-sài 10-kio̍k-hā kòng chhut chài-kiàn móa-lúi choân-lúi-táⁿ (Tiong-chit sú-siōng -tē-chhit lâng), 8 goe̍h 6 hō koh ta̍t-sêng oân-choân táⁿ-kek (Tiong-chit sú-siōng tē-10-lâng, pún-thó͘ tē-7-lâng).

2016 nî kùi-chho͘ ê sî kah Iûⁿ Koàn-ui, Ko Hàu-gî chò-hóe oân-sêng Tiong-chit sú-siōng tē-5-pái ê "liân-sòa 3-táⁿ-se̍k kòng chhut hőng-bú-láng" (Back-to-Back-to-Back), mā iōng Tiong-chit siōng kín ê sok-tō͘ oân-sêng kò-jîn 500-an.

2020 nî 4 goe̍h 18, tī Thô-hn̂g Kok-chè Iá-kiû-tiôⁿ tùi-chiàn Lo̍k-thian Thô-oân, 8-kio̍k-siōng bīn-tùi Lîm Pek-iū phah chhut seng-gâi tē-1000-ki an-táⁿ, pēng-chhiáⁿ iōng chhut-sài 704-tiôⁿ, 3062 táⁿ-se̍k, 2809 táⁿ-sò͘ chiâⁿ-chò Tiong-chit siōng kín ta̍t-sêng 1000 an ê kì-lo̍k (goân kì-lo̍k sī Lîm Ek-choân ê 744-tiôⁿ, 3168 táⁿ-se̍k, Phêⁿ Chèng-bín ê 2838 táⁿ-sò͘).

2022 nî 1 goe̍h 4 hō, Thóng-it 7-ELEVEn Sai chèng-sek soan-pò͘ kah i chhiam--loe̍h chi̍t-nî ê ha̍p-iok. 2025 nî Ô͘ Kim-liông soan-pò͘ beh tī chit-nî kiû-kùi kiat-sok liáu-āu ín-thè.

Sêng-pāng Kok-chhiú Keng-le̍k

• 2003 nî Kó͘-pa Sè-kài Iá-kiû Kím-piau-sài
• 2005 nî Hô-lân Sè-kài Iá-kiû Kím-piau-sài
• 2006 nî Sè-kài Iá-kiû Keng-tián-sài
• 2006 nî Tō͘-ha A-ūn
• 2007 nî A-chiu Iá-kiû Kím-piau-sài
• 2010 nî Kńg-chiu A-ūn
• 2017 nî Sè-kài Iá-kiû Keng-tián-sài
• 2019 nî Sè-kài Iá-kiû 12-kiông Sài

Chit-pāng Seng-gâi Sêng-chek

Bí-kok Chit-pāng kah Ò-chiu Chit-pāng

Sió-liân-bêng, To̍k-li̍p Liân-bêng kah Ò-chiu Liân-bêng

• Sió-liân-bêng pêng-kin táⁿ-kek-lu̍t / chiōⁿ-lúi-lu̍t / tn̂g-táⁿ-lu̍t hun-pia̍t sī 0.296 / 0.339 / 0.412, lóng-chóng ū 901-ki an-táⁿ, kî-tiong 47-ki sī hőng-bú-láng.
• Tī To̍k-li̍p Liân-bêng kah Ò-chiu Liân-bêng lóng-chóng phah chhut 123-ki an-táⁿ, kî-tiong 7-ki sī hőng-bú-láng.

Tāi-liân-bêng

Nî-tō͘	Kiû-tūi	Chhut-sài	Táⁿ-sò͘	Tit-tiám-khoan	An-táⁿ	Jī-lúi-táⁿ	Saⁿ-lúi-táⁿ	hőng-bú-láng	Táⁿ-tiám	Sì-sí	Thau-luí	Sa̋n-sín	Táⁿ-kek-lu̍t	Chiōⁿ-lúi-lu̍t	Tn̂g-táⁿ-lu̍t
2007	LAD	12	29	5	7	0	1	2	5	0	0	8	0.241	0.241	0.517
2008		65	116	16	21	2	2	0	9	2	11	23	0.181	0.252	0.233
2009		5	5	2	2	1	0	0	2	0	0	2	0.400	0.333	0.600
2010		14	23	2	3	1	0	0	1	1	0	5	0.130	0.160	0.174
2011	NYM	22	20	6	1	0	0	0	1	1	1	11	0.050	0.091	0.050
Ha̍p-kè	5-tang	118	193	25	34	4	3	2	18	4	12	49	0.176	0.225	0.259

Tiong-hôa Chit-pāng

• (Chho͘-o͘-jī sī hit-nî siōng-hó ia̍h siōng-koân ê sêng-chek)

Nî-tō͘	Kiû-tūi	Chhut-sài	Táⁿ-sò͘	An-táⁿ	Hőng-bú-láng	Táⁿ-tiám	Tit-hun	Thau-luí	Sì-sí	Sa̋n-sín	Lúi-táⁿ-sò͘	Siang-sat	Táⁿ-kek-lu̍t	Chiōⁿ-lúi-lu̍t	Tn̂g-táⁿ-lu̍t	OPS
2013	Gī-tāi Sai-gû	99	393	135	5	38	71	12	17	24	183	15	0.344	0.368	0.466	0.834
2014		115	463	162	5	55	81	12	33	35	212	16	0.350	0.391	0.458	0.849
2015		108	446	171	16	76	99	15	38	37	249	11	0.383	0.429	0.558	0.987
2016		79	327	122	10	55	73	10	32	31	174	7	0.373	0.427	0.532	0.959
2017	Hù-pang Hān-chiòng	92	351	113	11	71	52	3	31	49	175	8	0.322	0.372	0.499	0.871
2018		100	385	144	14	80	68	7	29	40	214	8	0.374	0.414	0.556	0.970
2019		107	427	146	13	60	69	6	31	47	206	8	0.342	0.384	0.482	0.866
2020		41	158	49	6	31	31	5	13	21	74	2	0.310	0.354	0.468	0.822
2022	Thóng-it 7-ELEVEn Sai	90	269	83	3	40	26	4	26	41	102	6	0.309	0.365	0.379	0.744
2023		64	215	59	2	24	23	0	13	40	73	8	0.274	0.312	0.340	0.652
2024		46	106	37	0	15	6	1	6	11	43	3	0.349	0.381	0.406	0.787
Ha̍p-kè	11-tang	941	3540	1221	85	545	599	75	269	376	1705	92	0.345	0.388	0.482	0.870

Cheng-gī Sū-kiāⁿ

• 2020 nî 6 goe̍h 25, ū bāng-iú tī PTT hun-hióng chi̍t-ê su-jîn kûn-cho͘ hō-chò Lâm-eng Siong-kang Iá-kiû-tūi Hāu-iú-hōe ê chia̍t-tô͘, lāi-té ū chi̍t-ê kháu-chō hō-chò Clhu15 ê lâng lâu-ōe kóng: "Kā Hù-pang phah kah mi-mi-mauh-mauh ōaⁿ chóng--ê! Kok-ūi hāu-iú ka-iû!" hőng jīn-ûi sī Hù-pang Hān-chiòng kiû-oân Ô͘ Kim-liông. Keng-kí kong-si hoat-piáu seng-bêng kóng sui-jiân chia̍t-tô͘ lāi-té ê sī Ô͘ Kim-liông pún-lâng ê kháu-chō, tān-sī he sī Ô͘ Kim-liông ê sió-tī iōng i ê chhiú-ki-á hoat ê, Ô͘ Kim-liông ê sió-tī mā í-keng khà-tiān-ōe hō͘ Lâm-eng Tân Hiàn-êng kàu-liān kah Hù-pang Hān-chiòng chóng-kàu-liān Âng It-tiong hōe-sit-lé^[4][5]. M̄-koh keh-ji̍t Ô͘ Kim-liông sûi hőng pàng lo̍h-khì jī-kun^[6], koh hō͘ kiû-thoân kui-ê léng-tòng--khí-lâi, kìm-chí i sûi-tūi kah chham-ka kiû-tūi jīm-hô oa̍h-tāng, it-ti̍t-kàu 2021 nî 2-tang ê ha̍p-iok kiâⁿ liáu kiû-kùi kiat-sok liáu-āu lī-khui Hù-pang.