Pang-chān:味全龍

From Wikipedia, the free encyclopedia

Remove ads

味全龍中華職棒兮一支球隊,嘛是中職兮創始球隊之一,捌佇1999年解散,但是2019年又閣轉來中職。味全佇1979年着有業餘野球隊,1990年職棒成立着成做創始球隊之一,佇職棒元年着提着中職第一个總冠軍。1999年頂新國際集團收購味全,但是頂新無想欲繼續經營野球隊,味全龍自按呢解散。2019年味全龍閣一擺加入中華職棒,2020年開始佇二軍比賽,2021年正式成做中華職棒一軍兮第五隊,並且佇第三冬2023年拍敗樂天桃猿得着轉來中職以後兮頭一个總冠軍。

Quick facts 所屬聯盟, 球團法人 ...
Thumb
味全龍兮衫
Remove ads

歷史

業餘時期

1979年,味全企業佮中國文化大學合作,中國文化大學野球隊改組做味全成棒隊。1988年,味全佮中國文化大學結束合作,味全成棒隊予味全獨立經營。

1990年代

1990年,中華職棒創立,味全成棒隊改組做味全龍。味全龍佇頭一冬着得着下半季冠軍進入總冠軍賽,並且以4:2拍敗上半季冠軍三商虎,成做中華職棒兮頭一个總冠軍。1991年,味全龍得着上半季冠軍,但是佇總冠軍賽G7輸予下半季冠軍統一獅,無緣二連霸。1996年,味全龍得着下半季冠軍,但是佇總冠軍賽2勝4敗閣一擺輸予上半季冠軍統一獅。

1997年,味全龍得着下半季冠軍,並且佇總冠軍賽以4:2拍敗上半季冠軍時報鷹得着𪜶 (in)兮第二个總冠軍。毋過因為2支季冠軍球隊攏佇另外一个半季填底,而且年度頭3名攏無法度拍季後賽,所以中職共球季改做「單一球季+季後挑戰賽」。1998年,味全龍以年度第3名拍入去季後挑戰賽,先倒贏統一獅,紲落來閣拍敗年度第1名興農牛成功得着總冠軍。1999年,頂新國際集團購併味全,但是味全董事長魏應行無想欲繼續經營野球隊;龍隊佇這年以年度第3名進入季後賽,先佇季後挑戰賽拍贏統一獅,閣佇總冠軍賽4:1拍敗和信鯨,成做史上第2支三連霸兮球隊。龍隊兮成績佮中職其他球團兮關切,攏予龍隊公佈解散兮日期拖較久兮。彼當陣味全龍部分兮球員甚至自願減薪四成,希望會當共球隊留落來。球迷嘛透過網路佮媒體發起連署佮遊行抵制味全,佇仝年12月12發起「野球迷眾大遊行」。但是魏應行猶原堅持解散龍隊,龍隊總教練徐生明講:「魏家來矣,才知黃家兮好。」[1][2][3]

2020年代

Thumb
2019年8月17,嘉義市長黃敏惠佇〈老龍新龍趣味對抗賽〉開球。

2019年2月21,頂新集團表示已經成立「味全龍職業野球隊籌備處」,並且請味全龍前領隊任中傑擔任顧問,加速球隊籌組兮進度[4]。4月17,味全龍佇面冊發布影片公布領隊、教練團名單,總教練予葉君璋擔任,教練予張泰山黃煚隆擔任[5]。4月29,味全龍正式提交中職加盟企劃書[6]。5月13,中職常務理事會通過味全龍兮申請[7]。6月24,經過中華職棒會員大會確認了後完成加盟程序,味全龍成做中華職棒第五隊,會佇2021年球季加入[8],並且繼承原本味全球團兮紀錄,共斗六野球場𪜶 (in)兮訓練基地[9][10]

2020年球季,佇二軍兮比賽以53勝31敗2和兮戰績排佇第一,進入冠軍賽面對中信兄弟,落尾以3勝1敗得着二軍兮總冠軍[11]

2021年球季𪜶 (in)轉去到中職一軍兮頭一冬,味全龍上半季填底、下半季排佇第三,落尾佇頭一冬排佇年度第五[12]2022年球季,味全龍佇熱身賽排佇第一,佇上半季佇轉去到中職了後勝率頭一擺超過五成(31勝29敗),雖然中央捌因為COVID-19造成誠濟主力球員確診,好佳哉戰績無落落去。下半季味全龍捌經歷九連敗兮洘流,落尾因為排佇年度第三拍入去季後挑戰賽,毋過落尾1勝3敗輸予下半季冠軍中信兄弟,佮臺灣大賽無緣。2023年球季,味全龍佇10月19得着下半季冠軍佮全年度勝率第一,嘛是味全兮第5个季冠軍,進入臺灣大賽[13]。落尾味全龍佇11月12兮臺灣大賽G7以6:3拍贏樂天桃猿,落尾4勝3敗得着轉去中職兮頭一个臺灣大賽冠軍,嘛是隊史第五个總冠軍[14],另外佇11月4號兮臺灣大賽G1,味全龍兮劉基鴻閣摃出臺灣大賽歷史上頭一支再見hőng-bú-láng[15]。2024年3月30中華職棒開幕戰,是中華職棒頭一擺佇大巨蛋舉辦例行賽,兩爿分別是樂天桃猿佮前一冬兮總冠軍味全龍,攏總28,618个觀眾入場,超過中華職棒開幕戰上濟觀眾兮紀錄[16]。9月29,因為中信兄弟以8:5拍敗樂天桃猿得着下半季冠軍,龍隊自按呢失去季後挑戰賽兮資格,無緣二連霸。12月12,味全龍公布以4冬兮合約加上激勵獎金4800萬共朱育賢簽落來,成做隊史頭一位FA球員[17]

Remove ads

逐年成績

逐年上下半季佮全年戰績

  • 烏粗字是隊史上好兮成績)
More information 球季, 上半季 ...

季後賽戰績

More information 球季, 挑戰賽 ...
Remove ads

球員

More information 球員, 教練 ...

參考資料

Loading related searches...

Wikiwand - on

Seamless Wikipedia browsing. On steroids.

Remove ads