Pang-chān:中信兄弟
From Wikipedia, the free encyclopedia
Remove ads
中信兄弟是中華職棒兮球隊之一,主場佇臺中洲際野球場。前身兄弟象是中職兮創始球隊之一,包含前身兄弟象攏總有19个季冠軍,是全聯盟上濟;總冠軍有10个,佮統一獅平濟,仝款是全聯盟上濟。雖然中信鯨佮中信兄弟攏夆叫做中信,但是歷史上中信鯨佮中信兄弟扞盤兮無仝[1][chù 1],而且中信兄弟嘛承接兄弟象兮歷史,所以佇中職佮官方記錄頂懸嘛是佮前身兄弟象兮隊史相接。[2]
![]() |
Chit phiⁿ bûn-chiuⁿ ū Pe̍h-ōe-jī ê pán-pún. Chham-khó chit phiⁿ bûn-chiuⁿ ê Pe̍h-ōe-jī pán-pún. |
Remove ads
歷史


兄弟飯店野球隊(1984年-1989年)
1984年9月1號,熱愛野球兮兄弟大飯店洪家5兄弟決定成立「兄弟大飯店野球隊」,是第一代兄弟象隊,球員攏總13儂,由曾紀恩擔任總教練。1985年3月12,得着中正盃成棒乙組錦標賽冠軍,成做甲組成棒兮第10隊。隔年佇第1屆甲組成棒聯賽創造14連勝兮紀錄,得着頭一个甲組成棒比賽冠軍。1986年11月1號,兄弟大飯店野球場啟用,成做第一支有家己專用球場兮球隊。1988年9月5號,「職棒籌備委員會」確定兄弟、統一、三商、味全是中華職棒創始兮四个球團。
兄弟象(1990年-2013年)
1990年-1999年
1990年3月17中華職棒開幕戰佇臺北市立野球場進行,落尾兄弟象以3:4拍輸統一獅,張永昌成做職棒頭一个敗戰投手。4月5號三商虎佮兄弟象4:4平手,是中華職棒歷史上第一擺和局。4月29龍象戰,臺北球場頭一擺滿場(16,000儂)。1992年兄弟象上、下半季攏提着冠軍,根據彼當陣兮規定,毋免拍季後賽自動着成做職棒三年兮總冠軍,1993年閣以4勝2敗拍贏統一獅,成做職棒四年兮總冠軍,嘛是中華職棒頭一个二連霸兮球隊。1994年兄弟象閣一擺提着上、下半季冠軍,完成中華職棒歷史上頭一擺兮三連霸。1996年8月3號,陳義信、洪一中、李文傳、陳逸松、吳復連五个儂佇臺中予烏道挈銃押走。仝年11月幾若个中職球員跳槽去臺灣大聯盟。
2000年-2013年
2001年兄弟象佇一勝三敗兮輸面之下連贏三場,以4勝3敗倒贏,得着職棒12年兮總冠軍,2002年閣拍贏中信鯨提着職棒13年總冠軍,完成連霸,2003年佇臺灣大賽以4勝2敗拍贏興農牛,完成隊史第二擺兮三連霸。但是2008年佇總冠軍賽拍輸統一獅,兄弟象得着隊史頭一个亞軍。2009年10月24臺灣大賽第六場佇臺南野球場對戰統一獅拍甲17局才結束,是中華職棒上長兮延長戰,攏總6點鐘14分,但是10月25兄弟拍輸統一,成做歷史上頭一个連紲2冬佇臺灣大賽失利兮球隊。佇冠軍戰結束了後,10月26隨爆發假球事件,因為這擺涉案兮球員內底大部份是兄弟象兮球員,所以閣號做「烏象事件」。2010年兄弟象四戰全贏拍贏興農牛,提着隊史第七个總冠軍,嘛是兄弟象兮上尾一个總冠軍。2013年10月19兄弟象球團董事長洪瑞河佇記者會頂懸說明,因為經營職棒24年了錢超過10億箍,兄弟大飯店已經無法度繼續經營,洪瑞河表示𪜶忝矣、欲歇睏矣,會佇年底揣買手。11月9號亞洲職棒大賽舉辦兮熱身賽第二場,兄弟象佮統一獅平手。這場比賽嘛是兄弟象兮上尾一場正式比賽,賽後球迷抌黃色色帶向兄弟象相辭。12月3號,兄弟大飯店宣布欲共球隊賣予中信金控[3]。
中信兄弟(2014年-)
2014年-2020年:咒讖展威,七年六亞

2014年1月中信金控公布新兮隊名是「中信兄弟」,保留原本兮代表色黃色佮代表動物象[4]。10月得着已經三冬毋捌提着兮季冠軍,但是落尾佇臺灣大賽以1勝4負輸Lamigo桃猿。2015年宣布認養臺中洲際野球場。10月中信兄弟佇臺灣大賽當中,捌得着3勝1敗,但是落尾Lamigo桃猿倒贏、2016年總冠軍賽以2勝4敗拍輸義大犀牛,2017年因為Lamigo桃猿得着上、下半季冠軍,年度第3兮中信兄弟會使佮年度第2名兮統一獅進行季後挑戰賽,落尾以3勝1敗拍贏統一獅,進入臺灣大賽,但是閣以1勝4敗輸予Lamigo桃猿,連紲四冬佇臺灣大賽失利。2018年雖然成績4隊上䆀,但是佇選秀會選着足濟後日成做中信兄弟主力兮球員,嘛是兄弟轉型重要兮一冬。2019年閣拍入去臺灣大賽,但是落尾以1勝4敗閣一擺輸予Lamigo桃猿。2020年兄弟佇2015年兮惡夢閣一擺出現,佇臺灣大賽得着3:1聽牌兮優勢了後,落尾予統一獅反盤,中信兄弟倒輸,是七年以來第六擺佇臺灣大賽失利。
2021年-2022年:十年一刻,得着二連霸
2021年,中信兄弟4戰全贏,拍贏統一7-ELEVEn獅,總算是提着隊史第8个、11年毋捌提着兮總冠軍,嘛是中信金控接手了後兮頭一个總冠軍,結束「七年六亞」兮咒讖[5]。2022年中信兄弟閣一擺拍入去臺灣大賽,並且4戰全贏拍贏樂天桃猿得着總冠軍,完成二連霸。這嘛是兄弟象佇總冠軍賽內底頭一擺佇主場封王[6]。
2023年:衛冕失利,無緣三連霸
2023年5月10號,中信兄弟雄雄共𤆬球隊提着二連霸兮一軍總教練林威助換掉,改做彭政閔。因為傷突然矣,予球迷非常兮無理解[7]。10月22,中信兄弟拍輸樂天桃猿,確定無法度拍總冠軍賽,無緣三連霸[8]。
2024年:重返榮耀,十冠達成
2024年9月21到9月22,佇臺北大巨蛋舉辦周思齊引退賽,加上五月天9月21賽後佇大巨蛋表演,兩場攏有4萬个觀眾,是大巨蛋第一、第二擺滿場兮例行賽[9][10]。10月25佇臺灣大賽以4勝1敗拍贏統一7-ELEVEn獅,得着隊史第十个總冠軍[11]。
Remove ads
逐年成績
逐年上下半季佮全年戰績
- (紅粗字是聯盟歷史上上好兮成績)
- (烏粗字是隊史上好兮成績)
季後賽戰績
Remove ads
球員
中信兄弟現役成員 | |||||||||
---|---|---|---|---|---|---|---|---|---|
球員 | 教練 | ||||||||
投手 |
捕手
內野手 |
外野手 |
一軍總教練
一軍教練
二軍總教練
二軍教練 | ||||||
註跤:有標「◎」兮是自主培訓選手。 |
註解
参考資料
外部連結
Wikiwand - on
Seamless Wikipedia browsing. On steroids.
Remove ads