Pang-chān:臺灣民主國國旗

臺灣民主國國旗，是1895年5月23到10月佇臺灣建立个臺灣民主國咧用个國旗佮國徽，因為伊个圖是藍地黃虎，閣號做藍地黃虎旗抑是黃虎旗，著佇這面旗仔公佈个彼工，唐景崧發表「臺灣民主國獨立宣言」。

Chit phiⁿ bûn-chiuⁿ ū Pe̍h-ōe-jī ê pán-pún. Chham-khó chit phiⁿ bûn-chiuⁿ ê Pe̍h-ōe-jī pán-pún.

臺灣民主國

名	藍地黃虎旗
使用	國旗佮船旗
採用	1895年5月23 臺灣民主國永清元年 清光緒21年 日本明治28年
設計	藍色背景，中央有一隻黃色个虎，目睭內底尪仔仁圓圓
臺灣民主國變款旗
設計	反面虎个目睭內底尪仔仁親像月娘

囥佇國立臺灣博物館个藍地黃虎旗

歷史

第一面「藍地黃虎旗」佇1895年5月23臺灣民主國成立个時陣出現，因為《馬關條約》共臺灣佮澎湖割予日本。為著莫夆 (hőng)割出去，宣佈成立「臺灣民主國」，舉薦臺灣巡撫唐景崧做大總統。無偌久，日軍佔領基隆，唐景崧旋去滬尾（今 (taⁿ)淡水區）个得忌利士洋行（Douglas），後來閣坐德國輪船鴨打號（Arthur）去廈門。仝年6月，賰个儂閣佇臺南成立「第二共和」，大將軍劉永福成做民主國第2任大總統。1895年10月，臺灣民主國嘛因為劉永福兵敗著隨解散。^[1]

臺灣民主國為著欲呼應著清帝國國旗个「黃地藍龍」，著挈「藍地黃虎」做國旗，所以號做「藍地黃虎旗」。根據《臺灣民主國臨時憲法》第四條，臺灣「採用藍地黃虎國旗，並作為國徽^[2]。」

2012年，國立臺灣博物館經過1年半个考證佮修復，確定黃虎旗原底是雙面个。正反兩面个虎目睭無仝，正面个虎尪仔仁圓圓，是「暗時个虎」；反面个虎尪仔仁彎彎若像月娘仝款，是「日時个虎」，正反兩面代表个是晝夜或者陰陽，有「日夜護國」个講法^[3][4]。

閣看

• 臺灣民主國
• 臺灣總統