Toā-pi-ô͘ Iá-kiû-tiûⁿ

Ko-hiông Chhī-li̍p Tōa-pi-ô͘ Iá-kiû-tiûⁿ (Hôa-gí: 高雄市立澄清湖棒球場) ia̍h Têng-chheng-ô͘ Iá-kiû-tiûⁿ, sī ūi tī Tâi-oân Ko-hiông-chhī Chiáu-chhêng-khu ê chi̍t-ê iá-kiû-tiûⁿ, tī 1999 nî khé-iōng, bat sī Tâi-oân iông-liōng siōng tōa ê iá-kiû-tiûⁿ (chit-má sī Tâi-pak Tōa-kī-tàn). 2024 nî khai-sí chiâⁿ-chò Tiong-hôa Chit-pāng tē-6-tūi Tâi-kǹg Hiông-eng ê chú-tiûⁿ^[2].

Ko-hiông Chhī-li̍p Tōa-pi-ô͘ Iá-kiû-tiûⁿ
Kaohsiung Chengching Lake Baseball Stadium

Ki-pún chu-liāu
Ūi-tì	Tiong-hôa Bîn-kok Ko-hiông-chhī Chiáu-chhêng-khu Chiáu-chhêng-lí Tōa-pi-lō͘ 113-hō
Chō-piau	22°39′15.89″N 120°21′32.71″E
Tāng-kang	1996 nî 7 goe̍h 17
Khé-iōng	1999 nî 7 goe̍h 30
Gia̍p-chú	Ko-hiông-chhī Chèng-hú
Êng-ūn tan-ūi	Tâi-kǹg Hiông-eng
Chháu-po͘-á piáu-chân	Thian-jiân chháu-po͘-á, âng-thô͘
Kiàn-tio̍k-hùi	Sin-tâi-phiò 13-ek-kho͘
Iông-la̍p jîn-sò͘	20,000-lâng
Tiôⁿ-tē chhùn-chhioh	Tó-gōa-iá: 328 Eng-chhioh Tiong-gōa-iá: 400 Eng-chhioh[1] Chiàⁿ-gōa-iá: 328 Eng-chhioh
Sú-iōng-chiá	Ko-pîn Lûi-kong (1999 nî－2002 nî) Tē-it Kim-kong (2003 nî) La New Hîm (2004 nî－2011 nî 2 goe̍h) Gī-tāi Sai-gû (2013 nî－2016 nî) Tâi-kǹg Hiông-eng (2024 nî－)

Kài-siāu

Tōa-pi-ô͘ Hong-kéng-khu kah iá-kiû-tiûⁿ

Tōa-pi-ô͘ Iá-kiû-tiûⁿ tī Tōa-pi-ô͘ piⁿ--á tang-lâm-pêng hōaⁿ-piⁿ, óa-kīn Tiông-keng Pēⁿ-īⁿ kah Ko-hiông-chhī Lô-kang Io̍k-lo̍k Tiong-sim, chóng bīn-chek sī 10,848 pêⁿ, thang hō͘ chha-put-to 2-bān-ê koan-chiòng ji̍p-khì, lāi-iá khòaⁿ-tâi 14790-se̍k, gōa-iá khòaⁿ-tâi 5210-se̍k, kiû-tiûⁿ sī thian-jiân chháu-po͘-á, choân-lúi-táⁿ-piah kī-lī chiàⁿ tó gōa-iá 328 feet (100.0 m), tiong-gōa-iá 400 feet (121.9 m)^{[chù 1]}. Sī choân Tâi-oân thâu-chi̍t-ê ū tōa-hêng choân-chhái êng-bō͘ ê iá-kiû-tiûⁿ, pí-sài ê sî ē-tàng thê-kiong khah siông-sè ê chu-sìn, mā ē-tàng khǹg kóng-kò.

Le̍k-sú

Pún kiû-tiûⁿ tùi 1994 nî khai-sí tio̍h leh kui-ōe, tān-sī Sin-tâi-phiò cha̍p-gō͘, la̍k ek ê heng-kiàn keng-hùi chiâⁿ-si̍t sī chiok tōa ê hū-tam, hit-tang-chūn ê Ko-hiông-koān koān-tiúⁿ Û Chèng-hiàn chhin-chū khì séng-chèng-hú kah tiong-iong cheng-chhú pó͘-chō͘, lo̍h-bóe tī 1996 nî 7 goe̍h khai-sí heng-kiàn, keng-kòe 3-nî oân-kang, tī 1999 nî ê Sè-kài Chheng-pāng Kím-piau-sài khé-iōng.

Tú oân-kang ê sî pún-té hō-chò "Ko-hiông Koān-li̍p Iá-kiû-tiûⁿ", bóe-á kau hō͘ bîn-kan chìn-hêng kiû-tiûⁿ hō-miâ, chòe-āu í Tōa-pi-ô͘ chò kiû-tiûⁿ ê miâ, pēng-chhiáⁿ hō͘ tang-sî keng-êng Tâi-oân Chit-pāng Tōa-liân-bêng ê Ná-ló͘-oan Kong-si jīn-ióng.

Ná-ló͘-oan Kong-si kái-sàn liáu-āu, chiap-chhiú Tē-it Kim-kong ê La New Hîm mā bat jīn-ióng chiâⁿ chē tang, āu--lâi chú-tiûⁿ sóa khì Thô-hn̂g liáu-āu, kiû-tiûⁿ keng-êng-khoân tńg-khì kàu Ko-hiông-chhī Chèng-hú chhiú-lāi.

2014 nî Ko-hiông-chhī Chèng-hú tio̍h leh phah-sǹg kā Gī-tāi Sai-gû ê chú-tiûⁿ só͘-ū sài-sū lóng an-pâi tī Tōa-pi-ô͘ Iá-kiû-tiûⁿ chìn-hêng, tān-sī āu--lâi in-ūi hia̍p-siong sit-pāi tio̍h bô chìn-hêng. 2015 nî Gī-tāi Sai-gû chham-khó Lamigo Thô-oân ê "Choân-oân Chú-tiûⁿ", kā in 60-tiûⁿ chú-tiûⁿ sài-sū lóng pâi tī Tōa-pi-ô͘ Iá-kiû-tiûⁿ chìn-hêng, tān-sī 2016 nî tio̍h chhú-siau ah, kan-na an-pâi 30-tiûⁿ tī Tōa-pi-ô͘^[3]. M̄-koh 2017 nî Gī-tāi Sai-gû kiû-tūi bē hō͘ Hù-pang Chi̍p-thoân liáu-āu, kiû-tūi jīn-ióng ê chú-tiûⁿ kái chò Sin-chng Iá-kiû-tiûⁿ^[4].

Bī-choân Liông tī 2021 nî kiû-kùikhai-sí tńg-khì kàu Tiong-hôa Chit-pāng it-kun, jīn-ióng Thian-bú Iá-kiû-tiûⁿ chò chú-tiûⁿ, tān-sī Thian-bú Iá-kiû-tiûⁿ siū-tio̍h koán-chè, pài-it kàu pài-sì bô-hoat-tō͘ an-pâi chit-pāng lē-hêng-sài, só͘-í tī Sin-tek Chhī-li̍p Tiong-chèng Iá-kiû-tiûⁿ 2022 nî oân-kang chìn-chêng, chiām-sî kā Tōa-pi-ô͘ Iá-kiû-tiûⁿ chò sûn-hôe chú-tiûⁿ, an-pâi pài-jī kàu pài-sì ê lē-hêng-sài.

Tâi-kǹg Hiông-eng tī 2022 nî 6 goe̍h 8 hô chèng-sek ka-bêng Tiong-hôa Chit-pāng chiâⁿ-chò liân-bêng tē-6-tūi, pēng-chhiáⁿ kè-ōe jīn-ióng Tōa-pi-ô͘ Iá-kiû-tiûⁿ chò chú-tiûⁿ, tī 2024 nî kiû-kùi khai-sí tī it-kun chhut-sài^[5].

Tiōng-iàu Ji̍t-chí

• Tiong-hôa Chit-pāng thâu-chi̍t-chiàn: 1999 nî 8 goe̍h 17 (Thóng-it Sai 2:4 Hô-sìn Keng)
• Tē-34-kài Sè-kài-poe Iá-kiû Kím-piau-sài (2001 nî)
• Kùi-āu-sài: 2008 nî
• Bêng-seng-sài: 2005 nî, 2011 nî
• Chóng-koan-kun-sài: 2003 nî, 2004 nî, 2006 nî, 2007 nî, 2008 nî, 2009 nî, 2012 nî, 2013 nî, 2021 nî
• 2010 MLB Tâi-oân-sài (2010 nî)
• 2011 MLB Choân-bêng-seng Tâi-oân Tōa-sài (2011 nî)

Bat Jīn-ióng ê Kiû-tūi

• Ko-pîn Lûi-kong (í Ná-ló͘-oan Kong-si bêng-gī jīn-ióng)
• La New Hîm
• Gī-tāi Sai-gû
• Tâi-kǹg Hiông-eng

Chù-kha

1. 2015 nî 5 goe̍h, Hit-tang-chūn ê Gī-tāi Sai-gû chóng-kàu-liān Tāi-ui iōng phôe chhioh niû tiong-gōa-iá choân-lúi-táⁿ-piah kī-lī sī 407 feet (124.1 m)^[6], m̄-koh Ko-hiông-chhī Chèng-hú Ūn-tōng Hoat-tián Kio̍k tī 2022 nî 4 goe̍h piáu-sī, in iōng lûi-siā tiông-sin niû kòe, kī-lī sī 400 feet (121.9 m)^[1]。