何珮珊

  提示：呢篇文講嘅唔係何佩珊。

何珮珊，CMSM（英文：Louise Ho Pui-shan，1967年12月31號—^[1]）係香港海關前任關長，2021年10月上任，係香港第一位女海關副關長同女海關關長。

何珮珊
何珮珊關長（2021年10月21號）
國籍	英屬香港
母校	沙田培英中學
職業	香港特別行政區主要官員
配偶	曾國衞
[改維基數據]
睇 傾 改

簡歷

何珮珊喺1991年2月加入香港海關任職海關督察，2013年晉升為高級監督，2017年晉升為助理關長，2019年晉升海關副關長。佢曾經喺1999年、2003年同2005年三次獲授香港海關助理關長嘉許狀，2009年獲頒香港海關長期服務獎章，2016年獲頒第一加敘勳扣，並喺2017年獲頒香港海關榮譽獎章^[2][3]。

海關關長

2021年10月17號，中華人民共和國國務院根據香港特別行政區行政長官林鄭月娥嘅提名同建議，任命何珮珊爲海關關長，同時免去鄧以海嘅海關關長職務，21號公佈同生效^[4][5][6]，成為第一位做香港海關首長嘅女人^[7]。

佢喺10月21號嘅就職典禮係2021年修訂《國旗及國徽條例》後嘅第一個主要官員就任宣誓儀式，所以做咗首位喺中華人民共和國國徽下宣誓就任嘅主要官員^[8]。儀式過後，佢同記者講澳洲嘅龍蝦喺香港走私去中國大陸會破壞中國對澳洲實施嘅貿易限制，仲會危害國家安全，海關會加強打擊^[9][10]。由於中國政府一直只係用公共衛生同檢測原因借機拖時間或唔畀澳洲龍蝦入口，何因為咁做咗第一個承認中國向澳洲實施經濟制裁嘅中方官員^[11][12]。隨後，澳洲外交貿易部部長丹·特漢就何珮珊嘅言論要求北京當局講明係咪對澳方做緊貿易限制^[9][13]。事後，佢喺接受香港中聯辦旗下《文匯報》專訪期間聲稱食物安全係國家安全之一，話自己嘅言論俾人扭曲咗，外間有關嘅說法係誤導公眾同醜化海關^[14]。

屋企

何珮珊老公係香港政府政制及內地事務局長、候選人資格審查委員會官守成員、入境事務處前處長曾國衞。兩人喺2003年至2004年借調保安局期間喺辦公室朝夕相對，漸生情愫。兩人喺2007年結婚，當時曾國衞派駐北京，由何珮珊一腳踢籌備婚禮，婚後一直各有各忙，冇蜜月旅行，亦冇計劃生細路^[15]。