種群樽頸

種群樽頸（粵拼：zung2 kwan4 zeon1 geng2；英文：population bottleneck）係進化論上嘅一個概念，指一個種群因為一啲災難事件，搞到短時間內有好多—例如講緊起碼 50%—嘅個體死亡或者喪失生殖嘅能力，因而令到個種群數目勁跌。常見嘅「災難事件」有饑荒、瘟疫或者山火呀噉^[1]。

Y 軸係個種群嘅個體數量，而 X 軸係時間。

種群樽頸好多時都會搞到一種物種絕種。就算個物種最後數目恢復返，種群樽頸都會搞到佢哋一嘢唔見咗好多「可以傳落下一代」嘅基因，呢點成日會引致個種群基因多樣性下跌，或者加劇基因漂變嘅現象^[2]。

如果讀者遇到唔識嘅概念，可以去參考吓進化論。

動物案例

獵豹

2005 年影到嘅一隻獵豹

獵豹（學名：Acinonyx jubatus）被指係佢哋進化史上經歷過種群樽頸。事實表明，好多跡象顯示獵豹嘅基因多樣性唔夠高：獵豹之間好多時就算直接做植皮都唔會引起免疫反應（反映個體之間嘅喺遺傳上唔係爭咁遠），又成日對啲病冇抵抗力；而且獵豹公仲成日出現精子濃度唔夠或者精子畸型等嘅問題；有科學家推測，獵豹喺大約 10,000 年前嘅對上一個冰河時期嗰陣經過咗種群樽頸，加上長時間嘅近親繁殖，搞到佢哋好唔夠基因多樣性^[3]。

人類

有唔少科學家都有研究喺人類當中發生過嘅種群樽頸。

根據一份 1999 年做嘅研究，大約二百萬年前，直立人（homo eretus）啱啱開始出現嗰時，一班南猿之間曾經出現過種群樽頸^[4]。

一份2023年喺《科學》期刊出版嘅研究就推算話，80萬年前左右因為極端氣候嘅關係，早期人類遇上咗種群樽頸，由大概10萬人跌到淨低千幾人。即係話，現代人類嘅祖先試過幾近滅種，而且人口數字之後11萬年都冇起色。^[5][6]不過有科學家覺得，海德堡人嘅出現就係源自於呢次種群樽頸，佢哋可能係我哋同尼安德特人嘅共同祖先。^[7]

而一份 2005 年嗰陣做嘅研究就話，1492 年打前美洲大陸嘅土著，全部都係嚟自一群喺對上一次冰河時期^{[註 1]}由亞洲經陸橋行到去美洲嘅人，而呢個古老族群估計得嗰 70 個人咁少，造成美洲土著基因多樣性唔夠^[8]。

第啲動物

• 歐洲野牛（Bison bonasus）：據講現存嘅族群源自於一個得 12 隻個體咁少嘅種群。
• 美洲野牛（Bison bison）：喺 1890 年代，佢哋嘅數量曾少過 1,000 隻。
• 華南虎（Panthera tigris amoyensis）
• 柴犬：喺二戰期間柴犬爭啲完全絕咗種咁滯。

睇埋

• 人工選擇
• 集體絕種

註釋

1. 冰河時期表示當時全世界好多水都結晒冰，海平面下跌，亞洲同美洲之間嗰條陸橋仲喺海平面上面。