文匯大公傳媒發佈假新聞爭議

香港大公文匯傳媒集團旗下《文匯報》、《大公報》及其他媒體，都曾經涉及發佈假新聞，有時以用作攻擊持對立政治觀點嘅人士（例如泛民主派）同國家（以美國為主），之後被一啲事實檢查嘅機構揭發或反駁，以及備受一啲批評。例如，末代港督彭定康喺回應蘋果日報同壹週刊停刊事件嘅時候，亦提到《文匯報》經常出版謊言、誣捏政府^[1]。

爭議列表

日期	事件 / 議題	針對對象	詳情
2023年6月2號	鑽石山荷里活廣場斬人案	遇害死者	喺針對兇手動機以及佢同受害人嘅資料方面，《文匯報》、《大公報》都先後發放受害人同兇手有關嘅假新聞，話事件涉及情殺，但警察之後公開回應話無證據顯示兇手同受害人係相識。呢啲發放假新聞嘅行為，受到一啲批評[2]。
2023年4月17號	美國就法國對中國立場	美國	2023年4月17號，《大公報》嘅Facebook專頁發佈咗一篇名為「美電台記者爆料：拜登要搞馬克龍？」嘅貼文。貼文引述咗美國電台節目主持人加蘭·歷臣（Garland Nixon）嘅Twitter貼文，話佢收到白宮內幕消息，話拜登命令中情局CIA運送武器同磚頭俾法國示威者，直至馬克龍喺中國議題上收聲。貼文仲附上咗呢個Twitter貼文嘅截圖。但係呢位歷臣嘅帳戶簡介寫住「諷刺內容供應者」，佢亦都長期置頂一段影片，解釋佢嘅貼文係諷刺嘅手法，係虛構嘅內容。不過，《大公報》未有解釋歷臣嘅貼文係諷刺手法，誤導公眾[3]。
2021年4月18號	超強颱風「舒力基」		《文匯報》報導話天文台預測超強颱風「舒力基」逼港、殺入800公里範圍內，但實情係，天文台只係預測個風最大機會喺1,000公里外掠過。事件被民間氣象網站香港天氣資訊中心批評，質問佢哋係咪真係睇住天文台預報去撰寫新聞，又話報導嘅錯處多到不堪入目[4]。
2019年1月16號	學生動源成員在台灣活動	學生動源	2019年1月16號，《大公報》頭版全版報導咗學生動源三名成員喺台灣嘅活動。報導指佢哋同台灣總統蔡英文嘅「密使」會面，話佢哋喺「台獨」同「港獨」之間有勾結。之後台灣媒體《自由時報》喺隔日出報道，指出《大公報》所講嘅「密使」其實係《自由時報》嘅資深黨政記者蘇永耀，而兩方嘅會面係為咗進行訪談[5]。
2014年1月16號	香港城市大學專上學院賣盤爭議	香港民主派	2014年初，教育界開始傳出城大專上學院賣盤嘅消息，嗰時有啲民主派人士關注賣盤事件，擔心影響學生前途[6][7]。《文匯報》同年曾經指控呢啲民主派人士生安白造、上綱上線[8]，但賣盤最終成真。