李克勤
香港男歌手 From Wikipedia, the free encyclopedia
Remove ads
李克勤（粵拼：lei5 hak1 kan4；英文：Hacken Lee / Stephen Lee Hacken；1967年12月6號—）係香港男歌手、電視節目主持同講波佬。佢都係英國足球隊曼聯嘅忠實擁躉。佢係少數喺香港橫跨1980年代、1990年代、2000年代同2010年代重維持高知名度同保持定期出唱片嘅男歌手，同唯一一位喺呢4個年代都攞到歌曲獎嘅歌手。截至2017年度，李克勤攞過十大中文金曲頒獎禮嘅「優秀流行歌手大獎」18次，係攞呢個獎最多嘅歌手。
Remove ads
歌唱事業
出道同走紅時期：1986年－1990年
1985年，李克勤喺《第2屆全港十九區業餘歌唱比賽》以演唱佢偶像譚詠麟嘅《霧之戀》攞咗冠軍，之後同寶麗金唱片公司簽約，做咗旗下歌手。
1986年，出首張唱片《李克勤 EP》。1987年，出《命運符號》，入面收錄咗改編自河合奈保子作曲同演唱嘅《ハー フムーン·セレナーデ》，中文版定名做《月半小夜曲》。
啱啱出道嘅李克勤知名度唔高，但係1988年佢主演無線電視暑期播放嘅青春劇《不再少年時》，同主唱主題曲同幾首插曲，同一時間出嘅唱片《夏日之神話》都好快紅咗，重憑《夏日之神話》首次打入十大勁歌金曲季選。
1988年，李克勤、黃凱芹同葉蒨文將玉置浩二嘅同一作品改編做《絕對自我》同《答案》。
1989年，佢主唱嘅《一生不變》（亞洲電視連續劇《藍月亮》嘅粵語主題曲）攞咗香港電台《1989年度十大中文金曲頒獎典禮》同無綫電視《1989年度十大勁歌金曲頒獎典禮》金曲獎。
走勢減弱：1991年－1992年
1991年，同克勤同屬寶麗金旗下嘅黎明憑無綫電視劇集《人在邊緣》崛起，張學友都喺1991年憑《每天愛你多一些》做咗經典金曲同人氣急升，佢覺得唱片公司宣傳唔夠，同唱片公司不和，聲勢開始下滑。當時有傳公司將所有宣傳集中喺黎明，佢後嚟話係同黎明無關，但係當時公司太多人[1]。
1992年時，香港電台搞太陽計劃活動，宣佈策封樂壇「四大天王」，除咗張學友、劉德華、黎明之外，李克勤原本喺第4位人選呼聲最高，最後就揀咗由臺灣爆紅返香港發展一年嘅郭富城。佢幾年後自嘲自己已向「林尚義的接班人」邁進，即係話佢嘅講波事業可能重順利過唱歌事業。佢當年介意過「四大天王」冇佢份，但後來都已經識諗[1]。
1992年，改編立川俊之《最重要的事》，由克勤填詞、主唱同改名做《紅日》，推出後即刻紅到人人識唱，到依家重係香港經典勵志歌曲。喺四大天王紅緊嘅時候，佢雖有「第五天王」嘅稱號，但最終《紅日》剩係得十大勁歌金曲頒獎禮嘅最佳音樂錄影帶演繹獎，同金曲獎無緣。
輕微回升：1993年－1994年
1993年，克勤轉投星光唱片公司，《回首》令佢嘅歌唱事業重上軌道，佢憑呢首歌攞咗1993年度十大勁歌金曲嘅金曲獎，同晉身最受歡迎男歌手最後五強。同年年尾喺紅磡香港體育館（紅館）開首次個人演唱會，門票幾個鐘頭就賣嗮，要加日場去回饋樂迷，全數共8場嘅門票都好快賣嗮。
低潮時期：1995年－2000年
1995年，克勤喺紅館舉行第2次個人演唱會《天龍'95克勤聆的接觸演唱會》，合共10場，可惜票房唔好，最差嘅一場入座率得4成。之後聲勢一路下滑，加上同唱片公司嘅合約糾紛，佢嘅唱歌事業開始陷入低潮。
1996年，李克勤離開星光之後，差啲簽咗畀正東唱片，不過俾藝能動音嘅高層捉住，話正東開乜條件，藝能動音照畀佢，李克勤考慮人情之下加盟藝能動音[2]。期間出咗大碟《當找到你》，唱片銷量同人氣有啲起色。但係藝能動音幾次嘅人事變動，加上同唱片公司再次有合約糾紛，同埋簽約條件係每次出碟都要花一筆天文數字嘅宣傳費，自己出大碟《在克勤身邊》後，佢嘅唱歌事業停滯不前，新唱片亦推出無期。
1998年夏天，佢幫無綫電視嘅FIFA世界盃轉播做足球賽事主持，幫節目唱作嘅主題曲《球迷奇遇記》重令人熟悉，唱片公司乘勢幫佢出新歌加精選大碟。藝能動音嘅唱片合約屆滿後，佢有一段幾長時間搵唔到啱嘅唱片公司，佢從唱歌轉戰電視媒體，喺無綫電視拍電視劇同主持節目（如《勁歌金曲》）嚟保住曝光率。
1999年尾，已離開藝能動音約一年半嘅佢同環球唱片（前身即寶麗金唱片公司）簽約，同出首張大碟《一年半載》。同年12月，佢同香港話劇團合作演出音樂劇《歷奇》，跨世紀演出，迎接千禧年嘅來臨。
再次走紅：2001年－2002年
2001年，佢同香港管弦樂團合作舉辦4場《港樂·克勤Live》演唱會，重2次加場。演唱會嘅現場錄音CD同VCD攞咗2001年度《IFPI香港唱片銷量大獎》嘅「十大銷量大碟」。同年7月出專輯《飛花》，佢重憑同名主打歌《飛花》攞咗無綫電視《十大勁歌金曲頒獎典禮》嘅金曲獎、《新城勁爆頒獎禮》嘅「新城勁爆歌曲獎」，同《第二十四屆十大中文金曲頒獎典禮》嘅「優秀流行歌手大獎」。
2002年2月，佢舉行嘅6場《情情塔塔演唱會》，又被人哋好評。佢幫無綫電視世界盃節目獻唱嘅主題曲《Victory》，同由梁詠琪作曲、佢自己填詞嘅《高妹》，同後嚟嘅《愛不釋手》都好受歡迎。佢喺《2002年度十大勁歌金曲頒獎典禮》上首次攞咗「最受歡迎男歌星獎」。《李克勤情情塔塔演唱會》同《新城唱好音樂大派對》2張現場錄音專輯係《2002年度IFPI香港唱片銷量大獎》入面嘅其中2張「十大銷量廣東大碟」，而佢都係「全年最高銷量本地男歌手」。
巔峰時期：2003年－2007年
2003年頭，佢同譚詠麟合作嘅《左麟右李演唱會2003》，喺香港掀起一陣「左麟右李」熱潮，2次加場後合共喺香港演出18場，世界巡迴演唱都隨即展開。李克勤喺《第五屆CCTV-MTV音樂盛典頒獎禮》上攞咗「香港年度最佳男歌手獎」。同年10月出一張新歌加精選專輯《Custom Made》，同國際知名年青鋼琴家郎朗合作《我不會唱歌》。《2003年度叱吒樂壇流行榜頒獎典禮》上，佢以《愛一個人》同《我不會唱歌》攞咗2個歌曲獎同「叱吒樂壇我最喜愛的男歌手」；喺《十大勁歌金曲頒獎典禮》上亦再一次攞咗「最受歡迎男歌星」。佢嘅專輯《Custom Made》同演唱會現場大碟《左麟右李演唱會2003》係2003年度《IFPI香港唱片銷量大獎》中嘅2張「十大銷量廣東唱片大碟」，而後者重係「最高銷量廣東唱片」。另外，佢都開始展現同證明自己喺現場合唱時和音嘅功力。
2004年頭，佢再同譚詠麟舉行11場《左麟右李04開心演唱會》，繼續佢世界巡迴演出。由於演唱會不斷，引致佢嘅聲帶勞損同肌肉扭傷，聲線出問題，喺治療同調理服務·同時，佢喺11月同容祖兒合作《04拉闊壓軸李克勤×容祖兒拉闊音樂會》，同出合唱歌曲《刻不容緩》。年尾，佢再次橫掃樂壇頒獎典禮獎項，喺《第二十七屆十大中文金曲頒獎典禮》上攞咗「最優秀流行男歌手大獎」，而現場大碟《左麟右李04開心演唱會》喺2004年度《IFPI香港唱片銷量大獎》攞咗「十大銷量廣東唱片大碟獎」，佢亦再次攞咗「全年最高銷量本地男歌手」獎。同年重憑《吻別的位置》攞咗四台聯頒歌曲大獎。
2005年，佢出國語專輯《愛可以問誰》，係繼1997年《情牢》後第4張個人國語專輯，同時展開國內嘅一系列宣傳活動。佢亦喺12月推出《李克勤演奏廳》專輯，環球唱片為呢張專輯投資咗百幾萬蚊，請咗4位華人音樂大師幫專輯歌曲演奏，重唔要一般錄音模式，移師到音樂廳入面，一氣呵成以現場錄音方式灌錄全碟10首歌，呢張專輯亦係首位華人歌手以DualDisc格式印製嘅專輯。專輯喺出咗後一嘅禮拜內2次斷市，銷售量即刻突破白金數字。佢喺2005年度《新城勁爆頒獎禮》上除攞咗5個音樂獎項外，重攞咗「我最欣賞男歌手」獎。在2005年度《叱吒樂壇流行榜頒獎典禮》上，佢首次攞咗「叱吒樂壇男歌手銅獎」，同發表「西裝論」以解釋佢同商業電台嘅關係。佢亦喺2005年度《十大勁歌金曲頒獎典禮》上第3次攞咗「最受歡迎男歌星」獎。
2006年1月28號至2月4號，佢喺香港體育館舉行8場《得心應手演唱會》，係全港首個用高清錄影嘅粵語演唱會。佢亦第三次幫無綫電視主持FIFA世界盃足球賽事，都幫節目主題曲《我著十號》填詞。佢喺年中去韓國首爾幫《李克勤演奏廳II》專輯現場錄製歌曲，呢隻碟繼《演奏廳》後再次係hi-fi發燒友嘅至愛。《李克勤演奏廳》、《李克勤演奏廳II》專輯同演唱會現場大碟《得心應手演唱會》，係《2006年度IFPI香港唱片銷量大獎》入面3張「十大銷量廣東唱片大碟」嘅得主，連同《我著十號》EP，4張唱片總銷售數字達18萬張，除咗成為2006年嘅「十大本地銷量歌手」，佢重獲頒「全年最高銷量本地男歌手」獎項。
平穩時期：2008年－2014年
2007年，佢參與香港特區政府為慶祝香港特別行政區成立10週年而舉辦嘅《龍聲鼓舞－萬人青年音樂會》，喺高潮環節《鼓樂飛揚》入面配合20幾位專業鼓手同10000名中港台同澳門嘅中小學生獻唱《龍的傳人》同《紅日》，內容項表演已列入健力士世界紀錄。佢亦被請做同台灣歌手小剛合唱無綫電視電視劇《歲月風雲》嘅同名主題曲，首歌由顧嘉煇作曲，張美賢填詞。同年7月出全新大碟《My Cup of Tea》，佢唔用既往一貫唱腔，受各界好評，而《花落誰家》重令佢攞咗《2007年度十大勁歌金曲頒獎典禮》嘅「金曲金獎」同幾個音樂頒獎禮嘅歌曲大獎。而喺《My Cup of Tea》嘅發佈會上，佢重承認太太盧淑儀懷孕嘅消息。同年10月22號，大仔李立仁（Ryan）喺養和醫院出世[3]。
2008年2月8號至18號，佢喺香港體育館舉行11場《你的克勤演奏廳》演唱會，2次加場，之後喺世界各地開辦超過10場同名巡迴演唱會。佢之後就開始籌備佢嘅新廣東專輯，請咗唔少唱作人參與創作，如范曉萱、陳奕迅、方大同、張敬軒、張繼聰、側田、Vincent Chow同林海峰。為咗慢功出靚貨，呢張專輯整咗9個月，佢嗰年度剩係派咗《她慈我悲》同《今夕是何年》2首新歌，都有唔同電台睇好。佢亦幫《左麟右李演唱會2009》主題曲《唔使驚》同陳奕迅作曲嘅新歌《換季》填詞。
2009年1月15號，佢出全新專輯《Today Special》，新碟訂單直逼白金數字。佢亦同譚詠麟第3次合作，舉行共12場由康文署同東亞運動會籌委會主辦嘅《東亞運動會2009：左麟右李演唱會》，以音樂推廣香港2009年東亞運動會同籌募經費，同時亦成為紅館裝修重開後舉行首場演唱會嘅歌手，同年6月開始到世界各地作巡迴演唱。自2003年起，「左麟右李」已喺中港台、澳門、東南亞、澳洲、美國同加拿大舉行超過百場演唱會。同年7月23號，佢被東亞運動會籌委會委任做「香港2009東亞運動會大使」，同做火炬手，8月29號接力傳遞運動會火炬，都幫12月5號嘅開幕匯演獻唱。12月30號出專輯《Threesome》，以analogue制式錄音，請咗林夕同林若寧包辦全碟嘅歌詞，2人亦同李克勤一齊拍攝唱片封套。除第一主打歌《嫲嫲》外，新碟內討論援交少女問題嘅《二十四城記》亦被網民一致好評。
2010年4月7號，李克勤親自撰寫喜訊，表示老婆盧淑儀上周剖腹產子，「二老闆」（克勤對佢二仔嘅稱呼）李力司（Rex）喺養和醫院順利出世，同時宣佈5月將繼續舉辦巡迴演唱會同灌錄全新廣東大碟。同年6月中，新歌《罪人》派台，係改編自方炯鑌嘅大熱華語歌曲《壞人》，首歌喺7月31號喺香港電台、叱咤903同新城勁爆榜攞咗「三冠軍」。8月4號，佢為就嚟出新專輯《罪人》舉行Moov Live演唱會，現場演繹新唱片嘅其中7首作品。9月15號，全新廣東專輯《罪人》正式推出。因為HKRIA版權風波嘅關係，鄭丹瑞喺Now香港台節目《Home Sweet Home》成功安排同佢進行訪問，該節目被編做第79集，喺同年10月2號播出。
2011年，佢憑《罪人》攞咗《十大中文金曲》獎，令佢成為唯一一位本地歌手喺4個年代（80年代至10年代）都能攞樂壇頒獎禮獎項嘅歌手。佢喺暑假期間舉辦共6場嘅《李克勤&香港小交響樂團演奏廳2011》演唱會，係佢同葉詠詩繼2001年嘅《港樂·克勤Live》演唱會後再次合作，每晚嘅歌都有30首以上。佢喺演唱會後出國粵語新專輯《似曾相識》，係佢繼2005年後再次出華語歌曲。而新專輯嘅粵語第一主打是《天河》，首歌喺香港電台、叱咤903同新城勁爆榜均上咗冠軍位置，攞咗「三冠軍」。而新專輯嘅第二主打都係粵語作品，叫《孔明燈》。首歌喺2011年10月29號喺香港電台、叱咤903同新城勁爆榜均上咗冠軍位置，係2011年另一首「三冠軍」作品。12月10號，佢喺無線電視慈善節目《歡樂滿東華》上亮相同獻唱，係HKRIA同無綫電視破冰後首位再次喺無綫參與演出嘅五大唱片公司旗下歌手。
2012年，1月佢憑《天河》攞咗叱咤樂壇流行榜頒獎典禮嘅「叱咤十大」第7位，被請去出席2011年度十大勁歌金曲頒獎典禮，做表演同頒獎嘉賓，演繹佢第一首金曲《一生不變》同《孔明燈》。年頭開始到北京宣傳國語專輯《似曾相識》，同舒文同馮翰銘2位監製整全新廣東大碟，其中舒文重係同佢首次合作。同年3月頭，佢被請去演唱Now TV轉播歐國盃而製作嘅香港版主題曲《決戰草原》，而佢都係歐國盃嘅評述員兼主持。5月尾，佢出新專輯嘅第一主打《活著為求甚麼》，佢首次試搖滾嘅曲風，歌曲好多好評，成為三台冠軍歌。6月，佢幫Now TV做歐國盃賽事評述員，表現有廣泛好評。8月尾，佢出概念係「大人的兒歌」嘅新專輯《在森林和原野》。繼2011年佢同香港小交響樂團合作嘅紅館演唱會好多好評後，9月舉行佢國內首次個人巡迴演唱會。11月幫無綫電視主持遊戲節目《決戰一分鐘》，係佢自2005年《殘酷一叮》後再次主持無綫節目，節目首集就高開30點收視，成績理想。
2013年1月，佢出席《十大中文金曲頒獎禮》，攞咗「優秀流行歌手大獎」，重憑《活著為求甚麼》攞咗「十大中文金曲」獎。5月全新廣東歌《前進》派台，重請咗香港兒童合唱團伴唱，係近年香港樂壇少有嘅勵志歌，都係佢近年少有嘅快歌派台作品。隔咗7年嘅《李克勤演奏廳》系列，佢喺同年7月出全新Hi-Fi大碟《復克》，再次由舒文同馮翰銘監製全碟，新碟被各界專業音樂人睇好，被樂迷好評，推出首個禮拜就佔iTunes熱門歌曲榜，唱片銷量重有雙白金佳績。佢喺10月出全新廣東EP《紙牌屋》，同名新歌《紙牌屋》重係年度金曲，喺各大電台頒獎禮都有唔俗成績。12月，佢同譚詠麟第4次以「左麟右李」名義，喺紅館舉行10週年紀念演唱會，都喺世界各地開辦巡迴演唱會。
2014年，佢同譚詠麟以「左麟右李」名義喺世界各地開辦巡迴演唱會。同年5月，由Eric Kwok、黃偉文一齊整嘅新歌《無朋友》派台，係繼《紙牌屋》後再次攞到電台、樂迷好多好評。同年6月幫無綫電視做世界盃評述員，同出新曲+精選大碟《精選到無朋友》。
再創高峰：2015年－依家
2015年，佢憑大熱歌曲《無朋友》再次攞咗「叱咤十大」，歌詞「工作做完握握手，說很想再以後聚頭」唱出港人心聲，係繼《孔明燈》、《紙牌屋》後再成經典金曲。同年6月，佢以「白稜鏡」面具代表香港出戰江蘇衞視嘅《蒙面歌王》，首集喺7月19號播出，佢成為首集冠軍，贏咗「歌王」嘅稱號。佢同容祖兒由9月11號至22號喺紅館開辦12場《亞洲萬里通呈獻 容祖兒李克勤演唱會2015》，令外界高度關注。
2016年1月，加盟湖南衛視《我是歌手》第四季、為首發歌手，喺4月8號總決賽對決黃致列落敗，未能晉級為「終極歌王候選人」。8月31號正式宣佈加盟英皇娛樂。加盟英皇後出《一個都不能少》好受歡迎，除咗喺中港各頒獎禮有好多收獲，亦係佢隔咗7年再次回歸勁歌金曲頒獎典禮，同攞咗金曲金獎。
2017年，代表香港喺香港亞洲流行音樂節2017壓軸表演，同埋佢嘅作品《高妹》亦入選香港音樂廿載情。憑《紅日》長江集團慶回歸獻禮《20 x 20 Jam Party》20首最喜愛歌曲。相隔8年重臨勁歌季選，《C3PO》成為2017第一回獲得最高票數嘅歌曲。
2018年1月4號，佢攞到香港電台頒發嘅四十週年特設榮譽大獎「金曲40全球傑出歌手大獎」，以表揚佢喺呢三十年嚟對廣東歌嘅貢獻同成就。
《我是歌手》第四季
2016年1月，加盟湖南衛視《我是歌手》第四季、為首發歌手，喺4月8號總決賽對決黃致列落敗，未能晉級為「終極歌王候選人」。
我是歌手第四季 李克勤競演排名 | |||||||||
| 期數 | 輪數 | 播出日期 | 演唱歌曲 | 原唱 | 歌曲介紹 | 排名 | 得票率 | 出場序 | 備註 |
| 全碟編曲：Johnny Yim（下面註明例外曲目） | |||||||||
| 1 | 第一輪排位賽 | 1月15號 | 《霧之戀》 | 譚詠麟 | 詞：林敏驄 曲：鈴木喜三郎 | 3 | 16.90% | 4 | — |
| 2 | 第一輪淘汰賽 | 1月22號 | 《當我知道你們相愛》 | 郭富城 | 詞／曲：小 美 | 5 | 11.76% | 6 | 兩場總成績第3名 |
| 3 | 第一輪踢館賽 | 1月29號 | 《遙遠的她》 | 張學友 | 詞：潘源良 曲：谷村新司 | 1 | 27.20% | 5 | 個人最高排名同得票率 獲得354票 |
| 4 | 第二輪排位賽 | 2月5號 | 《謝謝你的愛》 | 劉德華 | 詞：林秋離 曲：熊美玲 | 5 | 10.93% | 1 | — |
| 《一起走過的日子》 | 詞：小 美 曲：胡偉立 | ||||||||
| 5 | 第二輪淘汰賽 | 2月12號 | 《單車》 | 陳奕迅 | 詞：黃偉文 曲：柳重言 編曲：趙增熹、林嶽霆 | 3 | 15.12% | 2 | 兩場總成績第5名 |
| 6 | 第二輪踢館賽 | 2月19號 | 《友情歲月》 | 鄭伊健 | 詞：劉卓輝 曲：陳光榮 | 2 | 不詳 | 5 | 歌手互投第1名 |
| 7 | 第三輪排位賽 | 2月26號 | 《風繼續吹》 | 張國榮 | 詞：鄭國江 曲：宇崎龍童 編曲：唐奕聰 | 5 | 13.85% | 6 | 原參賽曲：宋冬野《董小姐》 |
| 8 | 第三輪淘汰賽 | 3月4號 | 《醜八怪》 | 薛之謙 | 詞：甘世佳 曲：李榮浩 | 6 | 11.17% | 1 | 個人最低排名同得票率 兩場總成績第6名 |
| 《我很醜可是我很溫柔》 | 趙 傳 | 詞：李格弟 曲：黃韻玲 | |||||||
| 9 | 第三輪踢館賽 | 3月11號 | 《可惜不是你》 | 梁靜茹 | 詞：李焯雄 曲：曹軒賓 編曲：趙增熹 | 5 | 11.06% | 2 | 前奏加入《飛花》 |
| 10 | 第四輪排位賽 | 3月18號 | 《天梯》 | C AllStar | 詞：鍾 晴 曲：賴映彤 | 2 | 18.92% | 3 | 原唱亦作現場和聲團 |
| 11 | 第四輪淘汰賽 | 3月25號 | 《我不會唱歌》 | 李克勤 | 詞：黃偉文 曲：曾奕文 | 1 | 19.78% | 7 | 個人最高排名 歌手互投第2名 兩場總成績第2名 由郎朗現場彈奏 晉級總決賽 |
| 12 | 突圍賽 | 4月1號 | 首發歌手進入總決賽 | ||||||
| 13 | 總決賽第一輪 | 4月8號 | 《左林右莉走一回》組曲 | 5 | 不詳 | 6 | 幫唱嘉賓：林子祥、葉蒨文 晉級第二輪 | ||
| 《瀟灑走一回》 | 葉蒨文 | 詞：陳樂融、王蕙玲 曲：陳大力、陳秀男 | |||||||
| 《阿Lam日記》 | 林子祥 | 詞：林子祥 曲：E Garcia | |||||||
| 《數字人生》 | 詞：潘源良 曲：Denny Randell、Sandy Linzer | ||||||||
| 總決賽第二輪 | 《愛是永恆》 | 張學友 | 詞：林振強 曲：Dick Lee | 前六強 | 3 | 原參賽曲：張學友《真情流露》 喺前奏同中間加入李克勤嘅《紅日》 | |||
| 14 | 2016雙年巔峰會 | 4月15號 | 《克不容緩》組曲 | 編曲：何秉舜 | — | 3 | 以組合形式同容祖兒演出 | ||
| 《逃》 | 容祖兒 | 詞：黃偉文 曲：陳奐仁 | |||||||
| 《嘭門》 | 李克勤 | 詞：黃偉文 曲：陳輝陽 | |||||||
| 《說好的幸福呢》 | 周杰倫 | 詞：方文山 曲：周杰倫 | |||||||
Remove ads
專長同嗜好
李克勤除咗係歌手外，重係填詞人。佢填詞嘅歌超過80首，多以「克勤」做筆名，絕大部分由自己演繹。當中包括《大會堂演奏廳》、《紅日》、《高妹》、《深深深》等都係一時好紅嘅作品。除「克勤」嘅筆名外，有傳若他收到一些覺得不合心意的歌詞時，就會用「大雄」嘅筆名重新填詞，如《想妳的舊名字》等。2012年，佢喺新碟入面再次參與填詞工作，都包括由舒文監製嘅《鑽石人生》。
佢都拍咗唔少劇集，如《不再少年時》、《淘氣雙子星》、《浪族闊少爺》、《他來自天堂》、《廟街．媽．兄弟》等，2002年憑《法網伊人》所飾演「高志朗」呢個角色喺無綫電視台慶頒獎典禮入面攞咗「我最喜愛電視角色」，都係唯一一位獲得該獎項嘅歌星。
除拍攝劇集同歌唱外，佢都口才都好好，做節目主持都受好評，主持過嘅節目有《叻人新世紀》、《勁歌金曲》、《香港小姐》、奧運、1998年、2002年同2006年嘅FIFA世界盃等。2005年，佢同梁榮忠主持嘅《殘酷一叮》贏咗《TVB38週年台慶頒獎典禮》入面「最佳資訊節目」同「最具創意節目」2個獎。2005年6月4號播出嘅第一輯決賽《叮皇爭霸戰》重創下33點嘅一個禮拜收視冠軍紀錄。但係錄影期間，佢嘅愛犬Lucky（1995-2005）因為年紀老邁同腎衰竭而過世[6]。
佢好鐘意足球、高爾夫球同籃球運動，係香港明星足球隊嘅成員，雖然婚後少有上陣，但重參加訓練。佢重係英格蘭國家隊同曼聯嘅忠實球迷，佢屋企珍藏嘅球衣幾百件。2003年被香港版《曼聯官方雜誌》委任做香港曼聯球迷會榮譽會長。2004年又被請咗主唱曼聯廣東同國語版會歌，2005年重做咗曼聯中文官方網站嘅大中華區代言人。佢鐘意睇電視，特別係美國連續劇，曾喺自己嘅博文話：「又電視又美劇又波（足球），你知我點解唔使出街啦（你應該明白我為何不需要出外了）！」
2014年，因為曼聯易帥後半季後成績唔係咁好，佢喺微博話 ：「你（大衛·莫耶斯）對得起買了主場季票的球迷嗎？」同「同樣的球隊，同樣的球員，他（阿力士·費格遜）交給你時是排名第一的，你對得起他嗎？ 」，難掩佢失望嘅心情。
Remove ads
創業
2012年，李克勤同譚詠麟喺紅磡黃埔開設嘅左麟右李粥麵小菜專門店，主要係承研中國廣東傳統美食，特別係香港平民美食如雲吞麵、腸粉、米粥同地道小炒[7]。之後喺銅鑼灣同旺角開分鋪。
軼事
1996年，李克勤同劉德華被委任做無綫奧運大使去美國亞特蘭大奧運村採訪，佢哋未經港隊同意下擅自入咗港隊嘅升旗禮，被發現後被港隊請離場。同年無綫台慶，喺趣劇「超級無敵上海灘」環節入面，突然爆肚咁講咗一句「非法進入異性體內插旗」引起市民投訴，後來無綫被廣管局罰錢。
李克勤係曼聯嘅忠實球迷。2005年曼聯訪港，香港官方球迷會就安排佢同曼聯代表會面同送自己嘅CD封面砌成嘅紀念品，但係曼聯球員方面將啲嘢留咗喺更衣室內未有帶走，事件被媒體報導後，受到網民嘅極大關注，重幫佢改咗「送禮勤」嘅花名。去到2016年10月，李克勤喺商業電台《1圈圈 星光背後》節目被問到事件，佢話自己覺得其實小事，自己冇唔開心，亦無遇過人哋一定要認識自己[8]。
音樂作品
内文：李克勤音樂作品一覽
派台歌成績
Remove ads
四台總成績
- 四台指《叱咤樂壇流行榜頒獎典禮》、《十大中文金曲頒獎音樂會》、《新城勁爆頒獎禮》、《勁歌金曲頒獎典禮》攞到金曲嘅成績。
- 睇香港四台冠軍歌同頒獎禮攞獎一覽
Remove ads
演出作品
李克勤除咗係歌手外，重系一個好受歡迎嘅演員，但佢嘅演技就一直受批評。曾經喺一個遊戲節目入面被庾澄慶揶揄「難怪你一直以來沒拿過影帝，只拿最佳男歌手」。而其中一套電影《左麟右李之我愛醫家人》令佢喺金話梅電影選舉入面攞咗「最佳拍檔」，一年後嘅《美女食神》重攞咗「影帝」同「最佳拍檔」。
電視劇（無綫電視）
歷年電視劇一覽
| 年份 | 劇集 | 角色 | 同劇演員 |
| 1985年 | 中四丁班 | 不詳 | 吳啟華、王書麒、陳敏兒 |
| 1988年 | 不再少年時 | 米家勇 | 羅明珠、楊羚、鍾淑慧、劉錫明、蘇永康 第一男主角 |
| 1989年 | 淘氣雙子星 | 查星宇 | 郭富城、黃貫中、余倩文、黃寶欣、梅小惠 第一男主角 |
| 1990年 | 同居三人組 | 戴日歡 | 郭晉安、李國麟、梁佩瑚、商天娥、李家聲、黃寶欣、羅蘭、曾近榮、陳曼娜、張鳳妮 單元男主角 |
| 1991年 | 浪族闊少爺 | 蔣傑 | 鄭秀文、劉玉翠 第一男主角 |
| 1992年 | 龍影俠 | 傳家寶 | 關禮傑、黎姿、楊美儀、雷宇揚 第一男主角 |
| 他來自天堂 | 吳福基 | 袁詠儀、周文健、樊亦敏、劉玉翠、陳曼娜、黃一山 第一男主角 | |
| 1994年 | 黃飛鴻系列之鐵膽梁寬 | 梁寬 | 宣萱、傅明憲、梁家仁、梁榮忠 第一男主角 |
| 1998年 | 師奶強人 | 李小森 | 滕麗名、梁榮忠、陳秀珠、阮兆祥、郭少芸、梅小惠 第一男主角 |
| 2000年 | 廟街·媽·兄弟 | 楊帶寶 | 黃淑儀、梁漢文、葉璇、鍾麗淇 第一男主角 |
| 2002年 | 法網伊人 | 高志朗 | 郭可盈、謝天華、吳綺莉、石修 第一男主角 |
| 2003年 | 富豪海灣非凡情緣之 一家一愛情故事 | 水剛 | 宣萱 單元角色 |
電影
歷年電影一覽
| 年份 | 劇集 | 角色 | 同片演員 |
| 1992年 | YES 一族 | 勤仔 | 黎明 周慧敏 草蜢 |
| 1993年 | 太子傳說 | 探長 | 張學友、關之琳、劉嘉玲、陳惠敏、陳元 |
| 1996年 | 運財智叻星 | 神仙 | 陳百祥、袁詠儀、王敏德、鍾麗緹、吳鎮宇、譚詠麟、鍾鎮濤、王晶、曾志偉、梅艷芳、黃一飛、成奎安、程東、文雋、苑瓊丹、朱咪咪、魯芬、羅家英、羅文、張可頤、苗僑偉、鍾定一、鄧建明、Joe Junior |
| 2001年 | 漫畫風雲 | 不詳 | 不詳 |
| 不解之謎 | |||
| 2004年 | 六壯士 | ||
| 2006年 | 左麟右李之我愛醫家人 | 譚詠麟 | |
| 2007年 | 美女食神 | 杜樹堅（S.K.To／SK2） | 佘詩曼、元秋、鄭希怡、梁敏儀、劉洋、王晶、李思蓓、黃文慧、張達明、吳志雄、鄧健泓、陳 煒、田啟文、劉以達、Otto@EO2、喬寶寶、黃一飛、李健仁、林子聰、李力持、周中 |
| 女人·本色 | 不詳 | 不詳 |
舞台劇
- 1999年：《歷奇》飾 Ricky
節目主持
Remove ads
獎
獎
| 年份 | 獎 |
| 1988年 |
|
| 1989年 |
|
| 1990年 |
|
| 1991年 |
|
| 1992年 |
|
| 1993年 |
|
| 1994年 |
|
| 1995年 |
|
| 1996年 |
|
| 1998年 |
|
| 1999年 |
|
| 2000年 |
|
| 2001年 |
|
| 2002年 |
|
| 2003年 |
|
| 2004年 |
|
| 2005年 |
|
| 2006年 |
|
| 2007年 |
|
| 2008年 |
|
| 2009年 |
|
| 2010年 |
|
| 2011年 |
|
| 2012年 |
|
| 2013年 |
|
| 2014年 |
|
| 2015年 |
|
| 2016年 |
|
| 2017年 |
|
| 2018年 |
|
Remove ads
個人生活
李克勤求學時，其他男同學嘅偶像多係日本當紅女藝人，佢嘅偶像係麥當勞叔叔同譚詠麟，所以講笑曾被親友懷疑佢嘅性取向。[10] 出道後到依家緋聞唔多，除依家嘅老婆——1992年香港小姐冠軍盧淑儀外，就剩係得同佢音樂上合作過嘅關淑怡同合演電視劇《法網伊人》嘅女演員郭可盈。
盧淑儀喺當選香港小姐後冇耐就同李克勤相戀，1993年卸任後，就退出咗娛樂圈，好少喺公開場合露面，喺幕後默默支持佢嘅事業。即使被叫咗李事業谷底時期，盧仲對李唔離唔棄，甚至喺1995年演唱會上，公開喺表演台上同佢表示愛意同支持。
以歌傳情，可以話係佢嘅「拿手好戲」。李克勤喺2001年2月23號首場《港樂．克勤Live》演唱會上公開多謝盧淑儀8年嚟喺佢背後嘅默默支持，唱咗一曲《在我身邊》以示感激，令喺觀眾席嘅盧淑儀感動到喊，克勤都喺高歌緊，一時感觸熱淚盈眶而停唱咗幾秒，氣氛感人。
《妳是我的太陽》係李克勤喺1992年識盧淑儀後寫畀對方嘅第一首情歌，其他以佢女友做題材嘅李克勤歌有《在我身邊》、《當找到你》、《依依不捨》、《尋最》、《飛花》、《三千零一夜》、《十年前後》、《我不會唱歌》、《婚前的女人》等。而喺2005年徐小鳳演唱會上，李克勤都同盧淑儀同往欣賞，被徐小鳳請咗上台，兩口子多年嚟首次罕有公開手拖手亮相。
2006年1月15號，李克勤喺《2005年度十大勁歌金曲頒獎典禮》攞咗「最受歡迎男歌星」之時，正式當場宣佈同拍拖13年幾嘅盧淑儀喺年內結婚。2006年5月佢同盧秘密去英國曼聯奧脫福球場同Chatsworth古堡影婚紗相，因為克勤曾經答應過佢喺結婚時一定會去奧脫福影一輯相。兌現承諾，2人帶埋化妝師，髮型師同攝影師等一行十幾人去球場攞景，機票同酒店費用由好友商人陳國強贊助[11]，做結婚賀禮。11月中派發用心整嘅黑色絲絨喜帖。
同年11月28號，李克勤同盧淑儀喺尖沙咀香港洲際酒店設宴。由譚詠麟同陳百祥做婚禮「領導人」，劉德華做伴郎，盧淑儀嘅胞妹做伴娘。梁榮忠、劉偉恆同錢國偉做戥穿石，鍾麗淇同蔡少芬做姊妹團。盧淑儀喺婚宴上數次感動落淚，佢剖白心聲話嫁到克勤係佢嘅驕傲，克勤都被感動到眼濕濕，場面浪漫溫馨。嗰晚賓客都有送一對新人喺英國影嘅婚紗照紀念冊。
喺新碟《My Cup of Tea》發佈會上，李克勤重承認太太盧淑儀懷孕。2007年10月22號，大仔李立仁（Ryan）[12] 喺養和醫院出世。
2009年12月宣佈太太盧淑儀再次懷孕。佢重唔出席頒獎禮去陪盧淑儀待產。2010年3月27號，二仔李力司（Rex）喺養和醫院出世。[13]
政治立場
李克勤有時會被視為親中派。喺1989年，佢曾經參加《民主歌聲獻中華》。但去到2002年，當時做保安局局長葉劉淑儀因推銷《基本法23條》而民望減少時，李克勤公開力撐佢有原則，同讚佢喺被大批話有居港權嘅內地人包圍一事上表現冷靜同果斷。之後佢重請葉劉淑儀同佢個女一齊睇2003年頭搞嘅《左麟右李演唱會》[14]。2006年做咗「國民教育大使」。之後喺立法會港島選區補選加入葉劉淑儀嘅助選團，同讚佢敢接受挑戰同承擔責任，佢稱敢公開支持自己嘅偶像唔係壞事[15]。
但喺2012年，李克勤就表態反對政府推行國民教育嘅計劃[16]。
參考
出面網頁
Wikiwand - on
Seamless Wikipedia browsing. On steroids.
Remove ads