林憶蓮
香港女歌手 From Wikipedia, the free encyclopedia
Remove ads
林憶蓮（粵拼：lam4 jik1 lin4；英文：Sandy Lam；1966年4月26號—）係香港女歌手、音樂人同演員，音樂事業遍佈香港、中國大陸、台灣、新加坡、馬來西亞同日本呢啲亞洲地區。佢15歲加入香港商業二台電台做DJ。1985年，出第一張個人粵語大碟。1990年，佢推出第一張個人國語大碟。1990到1992年，連續三年攞咗香港叱咤樂壇流行榜「叱咤樂壇女歌手金獎」。喺新加坡金曲獎中，林憶蓮喺1995年及2001年獲頒「最佳演繹女歌手獎」，同埋喺2002年榮獲「亞太最受推祟女歌手大獎」。 2013年7月，林憶蓮憑《蓋亞》喺台灣攞咗第24屆金曲獎最佳國語女歌手獎、最佳國語專輯獎、最佳專輯製作人獎（同常石磊共同監製），常石磊亦憑《蓋亞》攞到最佳編曲人獎，成為嗰屆金曲獎嘅大贏家。2017年，林憶蓮參加中國大陸湖南衛視嘅歌唱節目《歌手2017》，攞到總冠軍。2019年6月29號，林憶蓮憑《0》喺台灣第30屆金曲獎攞到最佳國語女歌手獎同最佳演唱錄音專輯獎，佢係繼莫文蔚之後第二次攞到台灣金曲歌后嘅香港女歌手。
Remove ads
底細
林憶蓮1966年喺香港出世，祖籍係浙江寧波，細個嗰陣住喺上海人聚居嘅香港北角明園西街。憶蓮同人講過佢個名點來：佢阿爸以前有個女朋友叫阿蓮，為咗紀念佢，個女出世嘅時候就幫佢起名做憶蓮。佢係大女，有兩個細佬，小學嗰陣讀北角街坊會陳維周夫人紀念小學，中學就升去跑馬地藍塘道名校瑪利諾書院（已改名做瑪利曼中學）。香港另一個出名女歌手陳慧嫻係佢中五時候嘅同班同學。
佢阿爸係一個二胡樂師，幫香港中樂團打工，阿媽間中喺酒樓唱上海越劇幫補家計，所以憶蓮自細就聽埋唔少中國音樂，成長嘅時候又鍾意聽英文歌。不過憶蓮細個嗰陣，冇唸過要做歌手，反而想做個畫家。
林憶蓮只有159厘米高，單眼皮、眼仔細細，自細就覺得自己唔靚，阿爸阿媽仲話佢「醜八怪」。
1970年代，美國電影《油脂》喺香港好紅，呢套戲嘅女主角叫做Sandy。憶蓮讀中學嘅時候，老師問佢英文名係乜，佢就隨口攞咗呢個名做佢嘅英文名。
演藝經歷
1982年—1986年：「六一一」
1982年，林憶蓮讀緊中四，嗰陣商業電台節目《第一次》請人做DJ。憶蓮有個同學唔想自己一個報名，於是就拉埋憶蓮陪佢，點知同學唔成功，但憶蓮就被取錄咗。結果佢就喺商台做兼職DJ。當時俞琤幫佢改咗個藝名「六一一」。6+1+1加埋就等如八，俞琤嘅意思係想將憶蓮塑造成八妹仔DJ。憶蓮當時主持嘅電台節目叫做《六一一學生週記》。佢做兼職就做咗兩年。後嚟中五畢業，佢就轉咗做全職，做咗一年。
1983年，喺一次電台表演度，憶蓮唱咗首英文歌〈Crying in the Rain〉，俾CBS/Sony 睇中，簽咗佢做合約歌手，但唱片公司冇即刻幫佢出碟，反而係等咗一年幾至出。呢段時間佢拍過電影叫《龍鳳智多星》，又演過香港電台嘅劇集《左鄰右裏》，仲主持港台電視部節目《青春道上》。1984年9月，佢以「611」嘅藝名同林姍姍、陳慧嫻、李麗蕊、鮑翠薇喺大專會堂演咗一部青春音樂劇《初戀五重奏》。
1985年4月，佢出咗第一隻碟《林憶蓮》，主打歌〈愛情 I Don't Know〉改編自日本女歌手松田聖子嘅作品。當年佢眼仔細細，塊面肥肥地，所以公司就將佢包裝成日本少女。不過，因爲憶蓮嗰陣嘅唱歌好稚嫩，形象又太過似日本偶像，所以市場反應麻麻，銷量未達到金唱片水平（25000張）。對憶蓮嚟講，呢個係一個挫折。佢覺得自己唔識唱歌，樣又唔夠靚，又唔識點面對傳媒同批評。於是，佢就同唱片公司講，話自己唔啱做歌手。不過唱片公司老闆就鼓勵佢，不如出多一隻碟先講啦。就咁，從第二隻碟開始，憶蓮就開始有份揀歌，同埋學唱片嘅製作過程。
1986年，林憶蓮主持無綫電視音樂節目《新地任你點》，喺《蓮子廣場》環節入面專門報導日本藝能界嘅消息，後嚟《新地任你點》改革，林憶蓮主持晒成個節目。3月，佢推出第二隻碟《放縱》，主打歌〈放縱〉入面有句歌詞：「我空虛、我寂寞、我凍」，唱出咗反叛嘅聲音，結果得到唔少嘅迴響。呢隻碟幫佢攞咗白金唱片（5萬張）嘅好成績，於是佢嘅音樂事業就正式起飛。
1987年—1989年：《灰色》同《都市觸覺》
1987年，林憶蓮出第3隻碟《憶蓮》，形象有好大嘅改變。佢電咗頭髮，歌就偏向歐美 Adult Contemporary 路線，呢隻碟嘅銷量超過咗雙白金。7月，佢出第四隻碟《灰色》，同名歌〈灰色〉喺香港紅咗，裏面有句「灰色...hahaha, hahaha, ha」歌詞，喺香港人人都識得唱。〈灰色〉係林憶蓮第一首唱紅咗嘅歌，呢首歌幫佢推到一線歌手嘅位。
1988年6月，憶蓮剪短咗頭髮，出咗第五隻碟《Ready》，裏面引入咗當時香港樂壇少見嘅爵士同 R&B 風格。雖然呢隻碟嘅銷量少過《灰色》，但係樂評人就覺得佢唱得好有格調同品味。林憶蓮喺 CBS/Sony 出咗五隻碟之後，就轉咗去華納唱片。喺嗰陣，佢請咗資深歌手曾路得，同埋香港女高音歌唱家江樺教佢唱歌，結果歌藝就突飛猛進。
1988年尾到1990年，佢一連出咗3隻《都市觸覺》嘅概念大碟，包括《都市觸覺 Part I City Rhythm》（1988年）、《都市觸覺 Part II 逃離鋼筋森林》（1989年）同《都市觸覺 Part III Faces And Places》（1990年）。期間佢又推出三張混音EP，分別係：《City Rhythm Take Two》、《都市觸覺之推搪》同《傾斜都市燒燒燒 Dance Mega Mix》，成套叫做 City Project，係80年代香港樂壇少見嘅概念大碟。呢套碟嘅歌路偏向歐美流行樂，除咗輕爵士，仲有 R&B 同埋電子嘅元素，內容圍繞住都市女性嘅生活態度同方式。唱片封面喺紐約、馬尼拉、威尼斯、米蘭拍攝。其實自從出第三隻碟《憶蓮》以嚟，林憶蓮已經走向 City Girl 嘅定位，首先係外形，然後喺音樂都開始咁做。只不過《都市觸覺》更完整咁呈現出呢個風格。《都市觸覺》呢個系列無論喺銷量同口碑都好好，其實成個創作團隊都好大幫助。除咗憶蓮本身有特出嘅演繹之外，團隊仲包括概念同形象指導許願，監製倫永亮，音樂人杜自持、楊振龍，作詞人林振強、周禮茂、潘源良、攝影師毛澤西、平面設計師 Kinson Chan，髮型設計 Kim Robinson 同排舞師林青峰等。
1990年—1994年：《愛上一個不回家的人》同《野花》
1990年12月，憶蓮進軍台灣市場，喺飛碟唱片旗下出咗第一隻國語碟《愛上一個不回家的人》，隻碟喺台灣一出就賣咗60萬張。憶蓮就成為90年代第一個唱國語歌而成功打入台灣市場嘅香港歌手。隻碟喺大陸好受歡迎，全亞洲賣咗200萬張。1994年，呢隻碟仲入選埋台灣百張最佳專輯（1975年－1993年）。1990年《叱咤樂壇流行榜頒獎典禮》林憶蓮第一次攞到「叱咤樂壇女歌手金獎」。
雖然成績咁好，憶蓮嗰時對開個人演唱會仲係冇乜信心，所以佢一方面又請杜麗莎教佢唱歌，另一方面去咗美國學跳舞。1991年7月，佢終於喺香港體育館成功開咗第一次個人演唱會《憶蓮意亂情迷》，7場全部都爆滿，觀眾對佢嘅表演刮目相看，於是佢成功擺脫咗錄音室歌手嘅形象。
1991年2月，憶蓮同新加坡音樂人 Dick Lee 合作，出咗《夢了、瘋了、倦了》，將中西音樂元素結合埋一齊。1991年12月，佢繼續同 Dick Lee 合作推出新碟《野花》，主打歌《再生戀》將越劇嘅元素同 Hip Hop 節奏結合，大膽創新。成隻碟啲歌全部都用花嚟做主題，啲歌散發住中國現代女性嘅婉約、敏感同堅強。樂評人好讚賞呢隻碟，而且隻碟仲引起咗日本市場嘅關注，其中〈沒有你還是愛你〉呢首歌仲上咗日本 Billboard 雜誌嘅 J-Wave Top 100 大碟最高第42位，〈夜來香〉就最高上咗第49位，成為第一批打入 Billboard 附屬日本流行榜嘅中文歌。
但係，有樂評人就話《野花》唔夠商業化，好難被市場接受。事實上，呢隻碟嘅賣出少過《夢了、瘋了、倦了》。不過喺之後嘅20年，《野花》成日再版，結果變咗憶蓮再版次數最多嘅碟。
喺事業顛峰嘅時候，憶蓮結束同華納唱片嘅合作，轉咗去自己同許願合資開嘅星工廠。
1992年10月，憶蓮出《回來愛的身邊》，走翻商業啲嘅路線，聽眾對呢個做法有唔同嘅反應，有啲人認為啲歌容易啲聽，亦都有樂評人話冇咁多驚喜，不過憶蓮嘅唱歌技巧又明顯進步咗，例如〈沒結果〉結尾部分嘅嗰啲高音，就好受歌迷歡迎。
同一年，憶蓮同台灣李宗盛幫電影《霸王別姬》合唱主題曲〈當愛已成往事〉，呢次係佢哋兩個第一次合作。之後，李宗盛又幫憶蓮寫〈不必在乎我是誰〉。1993年5月，憶蓮喺滾石旗下出第一隻國語碟《不必在乎我是誰》，就係李宗盛監製嘅。7月，憶蓮喺香港體育館舉行第二次演唱會《1993 天地野花演唱會》，李宗盛就一連十場做佢嘅特別嘉賓。1993年，佢參加《SATCHI 至尊演唱會 蓮城一線勁歌 Show》綜藝節目。
林憶蓮想兼顧香港、台灣、日本三個地方嘅發展，1993年10月佢第一次出日文歌《Dakaratte…》（日文「だからって…」），最高上過 Oricon 細碟榜第48位，銷量4萬張。1994年3月推出第一隻日文大碟《Simple》，但啲歌冇包含日本人鍾意嘅亞洲新音樂風格，結果口碑同銷量都一般。
佢喺星工廠（華星發行）時期出過3張粵語碟，除咗《回來愛的身邊》（1992年），重有《不如重新開始》（1993年），都係由許願監製，星工廠最後幫佢做嘅大碟《Sandy '94》係憶蓮同倫永亮去洛杉磯錄同拍嘅，許願就冇參與，星工廠時期之後亦都結束。1994年，佢參加《加港愛心連線大行動》綜藝節目。
1995年—1999年：《傷痕》
1995年，林憶蓮正式加盟滾石唱片，1月25號出國語碟《Love, Sandy》，隻碟喺台灣賣咗80萬張，喺亞洲區就賣超過400萬張，呢個時候佢喺中、台、星、馬都好受歡迎，成為亞洲天后，佢嘅影響力甚至超越音樂。新加坡一個蘭花品種，用憶蓮英文名起名叫做 Dendrobium Sandy。
呢段時期，佢為咗喺日本發展，就搬咗去東京住，後嚟移民咗去加拿大溫哥華，冇乜喺香港。1996年1月出嘅粵語碟《感覺完美》、2月出嘅英文碟《I Swear 愛是唯一》同埋7月出嘅國語碟《夜太黑》都喺外地錄音。佢好少返香港宣傳，俾人感覺佢似台灣歌手多過香港歌手，呢幾隻碟嘅風格同香港發展時嘅碟好唔同，比較抒情保守。
1996年7到8月，佢喺台灣開《Love Sandy 1996亞洲巡迴演唱會》，臺中2場，高雄1場，臺北2場，9月喺紅磡香港體育館舉行4場《憶蓮盛放音樂會》，9月尾喺尾站新加坡舉行1場。
1997年3至5月，林憶蓮收到張學友邀請，臨時頂上喺香港體育館演出一連42場音樂舞台劇《雪狼湖》，飾演女主角寧靜雪，收到好多好評。
1998年，林憶蓮同李宗盛結婚生女，婚後住喺台北天母區。1999年1月，佢復出，推出咗搖滾風格嘅國語碟《鏗鏘玫瑰》，2009年嗰隻碟入選台灣百張最佳大碟（1993年－2005年）第91位。
2000年—2008年：《至少還有你》同《本色》
林憶蓮加盟維京唱片之後，2000年出咗國語碟《林憶蓮's》，主打歌〈至少還有你〉佔咗 KTV 點播排行榜有成8個月，被人叫咗做K場國歌。之後喺現場或錄音室翻唱呢首歌嘅歌手好多，包括張國榮、陳慧琳、許志安、蕭亞軒、陳潔儀、梁詠琪、迪克牛仔、動力火車、謝霆鋒、邰正宵、李樂詩、泳兒、張敬軒、巫啟賢、鍾鎮濤、周華健、譚詠麟、孫楠同杜麗莎，韓國偶像組合Super Junior-M重喺《迷 (Me)》大碟將呢首歌改編做韓語版，亦有歌手改編做英文版同粵語版，係林憶蓮到依家最多翻唱版本嘅歌，係經典，佢幾乎每次演唱會都要唱〈至少還有你〉，現場又會一齊大合唱，差唔多每次商業演出都會被指定要唱。
佢喺維京唱片旗下出咗3隻國語碟，《林憶蓮'S》同《2001蓮》嘅創作主腦係Jim Lee，監製係姚謙。2001年林憶蓮一家三口搬去上海。12月出嘅《原來...林憶蓮》，由林憶蓮自己監製，仲請埋新加坡音樂人黃韻仁喺上海錄音棚同佢一齊製作。同年，佢參加《音樂大不同》綜藝節目。
2002年開始，林憶蓮喺香港多咗演出，5月喺紅磡香港體育館舉行4場《憶蓮演唱會2002》，又出粵語EP《Encore》。2003年沙士期間，佢帶賣個女由上海搬到新加坡住，年尾李宗盛喺北京開廠造手造結他，佢哋成家又搬去北京。2004年3月、憶蓮受到香港管弦樂團邀請，同倫永亮喺香港體育館舉行咗五場《Volvo Cars港樂X林憶蓮X倫永亮Live》，另外佢又出咗一本烹飪美食自傳《上海回味》[2][3]。7月，佢宣布同李宗盛離婚，之後搬返香港。
2005年，林憶蓮入咗歌壇20年，佢加盟金牌娛樂，出咗粵語碟《本色》。11月，佢喺香港體育館開4場《夜色無邊演唱會2005》，2006年8月，出國語碟《呼吸》，跟住兩年主要就開世界巡迴演唱會。
2007年11月，林憶蓮應邀喺新落成嘅九龍灣國際展貿中心Star Hall做第一位演出嘅歌手，舉行10場《憶蓮Live07》，呢場音樂會佢唱晒冷門歌。啲歌全部重新編曲，請咗中西嘅樂手演奏，其中包括日本映像創作人高木正勝，仲用影像投射代替慣用嘅機關、煙火，期間又講好少嘢，追求高端音響同視覺效果，呢個真係香港演唱會嘅一次新嘗試。但係口碑就兩極化，有啲觀眾覺得純音樂形式好悶，但行內音樂人就覺得好出色同勇敢。
2009年—依家：《蓋亞》同《0》
2009至2011年，佢好想喺製作唱片上有突破，想自己多啲寫歌同埋填詞。佢聯同兩個音樂人常石磊同恭碩良，用咗3年時間做國語碟《蓋亞》。隻碟用大地之母 Gaia（蓋亞）做主題，探討氣候變化同人嘅關係，風格有啲電子、搖滾、另類、古典、爵士嘅元素。2011年9月，佢喺紅磡香港體育館開咗3場《林憶蓮演唱會MMXI》，2012年3月，開咗兩場《林憶蓮MMXII Part 2演唱會》，仲開咗好多場世界巡迴，演唱會以搖滾嘅風格做主題，唱咗唔少《蓋亞》入面嘅歌。林憶蓮之前考慮過喺網上發行《蓋亞》，但後嚟改變注意。2012年佢簽咗環球唱片，代佢發行《蓋亞》。成隻碟佢自己出錢製作，估計用咗超過百萬港元。
2013年5月，第24屆台灣金曲獎入圍名單出爐，林憶蓮同《蓋亞》得到6項提名：最佳國語女歌手獎、最佳國語專輯獎（蓋亞）、最佳年度歌曲獎（無言歌）、最佳專輯製作人獎（林憶蓮、常石磊／蓋亞）、最佳編曲人獎（常石磊／蓋亞）同最佳音樂錄影帶獎（比爾賈／無言歌），係嗰屆提名最多嘅歌手。
7月6號頒獎典禮上，憶蓮憑《蓋亞》贏得最佳國語女歌手同埋最佳國語專輯獎。佢同常石磊就一齊攞咗最佳專輯製作人獎，常石磊又憑〈蓋亞〉呢首歌贏咗最佳編曲人獎，佢係嗰屆金曲獎嘅大贏家[4]。2015年，參加《12道鋒味II》第8集同《中國之星》。
林憶蓮2016-2017期間喺世界各地開《PRANAVA》同《PRANAVA II》世界巡迴演唱會。2017年1月，加盟湖南衛視《歌手2017》、為首發歌手，喺4月15號總決賽攞咗歌王。同年，佢參加《夢想的聲音2》節目。
2018年12月，林憶蓮出數碼碟《0》。2019年6月29號，憶蓮以《0》專輯喺台灣第30屆金曲獎喺7項提名下攞咗兩個獎，成為嗰年嘅大贏家，其中一個係「最佳國語女歌手」獎，第二次成爲金曲歌后。
Remove ads
私人生活
親情
林憶蓮同軟硬天師玩「超級無敵乒乓波」遊戲（1993年《蓮城一線勁歌Show》），透露阿爸個名係林德華，阿媽叫做李佩華。林德華係職業嘅二胡樂手，被香港中樂團請；李佩華係長城公司坤角女小生向群開嘅金鳳越劇團入面第一屆訓練班學員，喺大會堂演出的《碧玉簪》飾演春香。受阿媽影響，林憶蓮識唱少少上海越劇，喺1991年《歡樂滿東華》仲表演過越劇《黛玉葬花》，《再生戀》一曲開頭嘅上海話唸白就係嚟自《黛玉葬花》。
2001年頭《2001蓮》專輯宣傳期間，喺上海定居嘅林憶蓮阿媽發現患癌，林憶蓮為咗照顧阿媽，停咗宣傳工作飛到上海，之後一家三口搬到上海住咗大約兩年，2001年12月出嘅《原來...林憶蓮》碟入面嘅文案就透露佢掛住媽媽。
林憶蓮有兩個細佬，最細嘅細佬林泳頤Wayne Lam做過滾石唱片製作助理，佢個名出現喺林憶蓮1996年嘅《感覺完美》、《I Swear 愛是唯一》、《夜太黑》、《Love Returns》EP，同《記得憶蓮盛放》現場錄音大碟。林泳頤2001到2002年做王喜嘅唱片監製，包括《喜新唱歌》同《起身叫我》大碟，碟入面〈戀愛是個海〉、〈起身叫我〉兩首歌係佢作曲嘅。2005年，林憶蓮為尖沙咀山林道上尚日本火鍋料理剪綵，林泳頤係股東之一。2011年，林憶蓮再幫佢細佬嘅北京響料理主持開幕儀式，並多次喺微博貼相。
感情
佢到而家一共有4段公開嘅戀情，多數係佢喺工作上嘅拍檔。第一段係佢十幾歲喺商業電台做DJ時嘅同事陳輝虹，不過係 puppy love，戀情好快完。之後佢有2位緋聞男友，都冇正式承認，一位係商台時嘅同事李進，另一位係新力時期嘅唱片監製馮鏡輝。
1987年，佢第一次同許願合作，當時許願係佢嘅形象指導同排舞老師，之後公開戀情，許願擔任佢嘅唱片監製同經理人，曾合組製作公司星工廠，1991年宣佈分手。
1992年，佢同台灣音樂人李宗盛首次喺音樂上合作，一首《當愛已成往事》令大家都好熟，佢後嚟同李宗盛拍拖，但呢段感情處理得好低調。1998年1月20號，佢同李宗盛喺台灣舉行記者會，公開佢大肚同埋打算結婚嘅消息，兩個喺2月22號加拿大溫哥華搞婚禮，5月17號，林憶蓮喺台灣開刀生咗個女李喜兒。
婚姻期間，佢哋一家喺溫哥華、台北、上海、新加坡、北京住過。2004年7月12號，李宗盛發出聲明，引述寫俾辛曉琪嘅歌〈領悟〉入面嘅歌詞，大意係：「我哋嘅愛如果係錯誤，願你我冇白白受苦」，承認同佢兩個離婚。林憶蓮就用〈微涼〉呢首歌嘅英文版 And So It Goes 嘅歌詞「And when it goes, it goes」發俾傳媒一篇叫做「7.10怪風」嘅短文，佢話：「冇諗過要為自己嘅婚姻狀況寫聲明，的確有啲莫名嘅荒謬感… 做咗一啲準備，迎接各自嘅未來…就俾生命多添一種顏色啦[5]。」
同年，佢同個女搬返香港住。聖誕節期間，佢同舊男友、任職EMI亞太區新媒體副總裁嘅陳輝虹再拍拖。2006年8月，陳輝虹向傳媒承認同佢哋兩個再次分手。
音樂作品
内文：林憶蓮音樂作品一覽
錄音室同混音專輯
|
粵語專輯
|
國語唱碟
日文唱碟
英文唱碟
|
|
派台歌成績
（*）表示重喺榜上
(1)表示兩星期冠軍
Remove ads
香港演唱會
| 日期 | 中文名 | 英文名 | 場數 | 場地 | 備註 |
| 1991年7月12號—7月18號 | 憶蓮 意亂情迷 1991 | Sandy Lam in Concert Live 1991 | 7 | 紅磡體育館 | 首次個人演唱會 |
| 1993年7月8號—7月17號 | 林憶蓮天地野花93情撼紅館 | Sandy Lam in Concert '93 | 10 | ||
| 1996年9月5號—9月8號 | 憶蓮盛放音樂會 | Sandy Lam Live Concert HK '96 | 4 | ||
| 2002年5月3號—5月6號 | 憶蓮演唱會 | Sandy in Concert | 4 | 首次使用四面台形式 | |
| 2004年3月4號—3月8號 | 港樂x林憶蓮x倫永亮 Live | HKPO Sandy x Anthony Live | 5 | ||
| 2005年11月10號—11月13號 | 林憶蓮夜色無邊演唱會 2005 | Sandy Lam Concert 2005 | 4 | ||
| 2007年11月9號—11月18號 | 憶蓮 Live 07 | Sandy Concert Live 2007 | 10 | 九龍灣國際展貿中心 Star Hall | 首位歌手於Star Hall演唱 |
| 2011年9月23號—9月25號 | 林憶蓮演唱會 MMXI | Sandy Lam Concert MMXI | 3 | 紅磡體育館 | |
| 2012年3月3號—3月4號 | 林憶蓮演唱會 MMXII Part II | Sandy Lam Concert MMXII | 2 | 《林憶蓮演唱會 MMXI》嘅延續篇 | |
| 2016年3月25號—3月28號 | 林憶蓮造樂者世界巡迴演唱會 [11][12][13][14] | Sandy Lam Pranava World Tour | 4 | ||
| 2017年10月27號至10月30號 | 林憶蓮造樂者世界巡迴演唱會2017安哥場 | Sandy Lam Pranava World Tour Encore | 4 | 《林憶蓮造樂者世界巡迴演唱會》嘅延續篇 |
- 2016年—2018年 Pranava 造樂者 世界巡迴演唱會（32場）
Remove ads
影視作品
電視劇
| 首播 | 劇名 | 角色 | 合作 | 性質 | 電視台 |
| 1984年 | 《左鄰右里》 | 矇豬 | 招廣培，石燕子，雷安娜，鍾保羅，葉觀楫，劉一帆，陳迪匡，田啟文 | RTHK | |
| 1990年 | 《同居三人組》 | 劉綺君 | 郭晉安，李克勤，商天娥，郭政鴻，趙學而，黎姿 | TVB | |
電影
| 首播 | 劇名 | 角色 | 合作 | 導 演 | 註備 |
| 1984年 | 《聖誕快樂》 | 健康舞班同學 | 徐小鳳，麥嘉，陳百強，李麗珍 | 高志森 | 客串 |
| 1985年 | 《龍鳳智多星》 | 單眼皮 | 張國榮，倪淑君 | 黎應就 | |
| 1986年 | 《冒牌大賊》 | 蒙珠 | 黃日華，鄧浩光，蔡國權 | 黎應就 | |
| 1988年 | 《猛鬼學堂》 | Miss Bad Luck | 張學友，許冠英，劉美君 | 劉鎮偉 | |
| 《群龍奪寶》 | 卓非凡二女 | 劉德華，泰迪羅賓，徐少強，關之琳 | 袁振洋 | ||
| 《繼續跳舞》 | 精神病人 | 繆騫人，林建明，曾志偉，黃霑，吳耀漢 | 甘國亮 | ||
| 1989年 | 《打工狂想曲》 | Candy Lam | 鄭裕玲，王祖賢，爾冬陞，鄭浩南，張國強 | 錢永強 | |
| 1990年 | 《亂世兒女》 | Pao | 洪金寶，元彪，林子祥，梅艷芳 | 泰迪羅賓 | |
| 1991年 | 《歲月的童話》 | 岡島妙子（成人） | 高畑勳 | 配音 | |
音樂特輯（TVB）
- 今夕何夕音樂特輯 1989年（演出：林憶蓮、王敏德、曾江、黃秋生）
- 情傾黃埔江音樂特輯 1992年（演出：林憶蓮）
- 現代愛情戀曲《野花》1992年（演出：林憶蓮、梁朝偉）
- 現代愛情戀曲《心窗》1994年（演出：林憶蓮、梁朝偉）
Remove ads
《歌手2017》
2017年1月，加盟湖南衛視《歌手2017》、為首發歌手，喺4月15號總決賽攞咗歌王。
歌手2017 林憶蓮競演排名 | |||||||||
| 期數 | 輪數 | 播出日期 | 演唱歌曲 | 原唱 | 排名 | 得票率 | 得票數 | 出場序 | 備註 |
| 1 | 第一輪排位賽 | 1月21號 | 《不必在乎我是誰》 | 林憶蓮 | 2 | 22.60% | 314 | 8 | 歌手互投第3名 |
| 2 | 第一輪淘汰賽 | 1月28號 | 《無賴》 | 戴佩妮 | 3 | 13.43% | 199 | 7 | 第一輪兩場總成績第2名 |
| 3 | 第二輪補位賽 | 2月4號 | 《Run》 | Snow Patrol | 6 | 10.13% | 150 | 1 | 個人最低排名、得票率同得票數 |
| 4 | 第二輪淘汰賽 | 2月11號 | 《我最親愛的》 | 張惠妹 | 2 | 17.50% | 234 | 7 | 第二輪兩場總成績第4名 歌手互投第1名 |
| 5 | 第三輪補位賽 | 2月18號 | 《克卜勒》 | 孫燕姿 | 2 | 16.09% | 231 | 5 | — |
| 6 | 第三輪淘汰賽 | 2月25號 | 《盛夏光年》 | 五月天 | 3 | 17.30% | 255 | 7 | 第三輪兩場總成績第3名 歌手互投第1名 抽樣觀眾投票第1名 |
| 7 | 第四輪排位賽 | 3月4號 | 《藍蓮花》 | 許巍 | 1 | 19.83% | 251 | 5 | 個人最高排名 歌手互投第1名 |
| 8 | 第四輪淘汰賽 | 3月11號 | 《崇拜》 | 梁靜茹 | 4 | 13.68% | 204 | 4 | 第四輪兩場總成績第3名 樂手投票第1名 |
| 9 | 第五輪補位賽 | 3月18號 | 《多得他》 | 王菲 | 5 | 12.60% | 178 | 4 | — |
| 10 | 第五輪淘汰賽 | 3月25號 | 《柿子》 | 林憶蓮 | 1 | 18.68% | 247 | 3 | 第五輪兩場總成績第2名 個人最高排名 歌手互投第2名 晉級半決賽 |
| 11 | 突圍賽 | 4月1號 | 首發歌手進入半決賽 | ||||||
| 12 | 半決賽 | 4月8號 | 《Leslie Forever》組曲 | 1 | 22.60% | 299 | 6 | 個人最高排名 歌手互投第1名 晉級決賽 | |
| 《拒絕再玩》 | 張國榮 | ||||||||
| 《無心睡眠》 | |||||||||
| 13 | 決賽 | 4月15號 | 《也許明天》 | 張惠妹 | 1 | 22.89% | 319 | 8 | 總成績冠軍（22.74%） 個人最高排名、得票率同得票數 幫唱嘉賓：張惠妹 |
| 14 | 2017巔峰會 | 4月22號 | 《小情歌》 | 蘇打綠 | — | 9 | — | ||
Remove ads
廣播劇
- 1990年：《情是永遠著迷》港台
- 2000年：《七年三日》新城
- 2002年：《日與夜》商台
廣告代言
獎
内文：林憶蓮得獎同提名一覽
參考
出面網頁
Wikiwand - on
Seamless Wikipedia browsing. On steroids.
Remove ads