玩家

玩家（粵拼：waan2 gaa1），粵語口語又可以學英文叫 gamer（粵拼：粵化口語音：gem1 maa4），係指玩遊戲嘅人。玩家可以係獨自遊玩單人遊戲，亦可以同其他人一齊玩多人遊戲。喺唔同遊戲中，玩家可以扮演唔同角色、完成任務或者純粹探索虛擬世界。玩家未必一定係高手，只要參與遊戲就可以叫做玩家—由休閒玩家到職業選手都屬於玩家。

電競選手喺度打機。

玩家喺度打機。

玩遊戲初頭只係一項業餘活動，但係依家已經演變成一種職業。

基本詞彙

睇埋：電子遊戲詞彙

• Solo：喺網上遊戲當中唔參與團隊、甚至唔同其他玩家互動、自己一個人玩嘅玩家。
• Scrub：指覺得隻遊戲嘅官方規則「唔公平」而自設規則、仲嘗試迫第啲玩家跟佢哋嗰套規則嘅玩家^{[橋 1]}。
• 懷舊玩家（retro）：鍾意舊式遊戲嘅玩家；遊戲製作師有陣時會為咗氹呢啲玩家，而專登喺隻遊戲度加啲懷舊嘢（例如似舊式遊戲噉嘅圖像）^[1]。
• 破壞者：喺多人電子遊戲當中特登做啲嘢嚟令第啲玩家唔開心嘅玩家；例如可能喺一隻 MMORPG 裏面，有玩家成日惡意噉喺留言版上面留啲中傷性嘅留言，呢啲玩家就係破壞者^[2]。
• 觸手：喺動作遊戲當中對高手嘅稱呼。噉係因為呢啲高手好多時有接近人類極限嘅反應同手眼協調，俾人話佢哋唔係用兩隻手玩，而係好似八爪魚噉用八隻觸手^[3]。
• 按認真程度分^[4]：
  • 休閑玩家：對遊戲唔太認真、玩嚟純粹為開心嘅玩家。
  • 核心玩家：對遊戲認真嘅玩家，會嘗試提高自己技術，但未至於去到有競爭性。
  • 硬核心玩家（參見英文：hardcore）：好認真嘅玩家，鍾意參與比賽同人競技，通常技術上勁過休閑玩家同核心玩家。
  • 職業玩家：靠玩遊戲作為事業賺錢嘅玩家；可以睇埋電子競技。
• 新仔：指經驗尚淺、技術未成熟嘅玩家^[5]。
  • Newb：新仔一種，通常指態度良好、肯聽前輩勸嘅新仔^{[橋 2]}。
  • Noob：通常指態度惡劣、明明玩唔掂都唔聽勸嘅新仔；Noob 成日都會拖累同佢哋同隊嘅老練玩家（仲要態度囂張）而廣受人厭惡。Noob 呢隻字有陣時亦會俾人用嚟做普遍嘅辱罵。
  • 假新仔：實際上實力極高、但用低等級戶口扮成新仔嘅玩家^[6]。

理論分類

睇埋：巴圖玩家分類法

巴圖玩家分類法係一套將玩家按「玩遊戲嘅動機」分成幾類嘅方案，成日俾人攞嚟做遊戲設計上嘅理論性質討論^[7]；根據巴圖玩家分類法，玩家可以分做

• Achiever－鍾意喺遊戲入面攞高分同收集遊戲裏面嘅徽章（徽章係一啲成功做到某啲嘢就會得到嘅嘢）、
• Explorer－熱衷於探索遊戲內嘅世界，會想搵到嗮所有隱藏嘅嘢、
• Socializer－在乎嘅遊戲嘅社交性，例如想要隻遊戲可以攞嚟喺聯歡會上同朋友一齊玩、
• Beater－競爭性強，鍾意隻遊戲俾機會佢哋同第啲玩家競技、
• Completionist－成就者同探索者嘅合體，想要完美噉完成遊戲嘅內容同埋搵出隻遊戲所有嘅秘密（睇埋 100% 完成）；

遊戲設計學者指出，遊戲製作師要考慮佢哋隻遊戲傾向吸引邊種玩家，按此調整隻遊戲；例如如果知道隻遊戲吸引嘅玩家以社交者為主嘅，噉製作組就要諗多啲計，方便隻遊戲多人一齊玩^[7]。

玩家體驗

睇埋：用家體驗同快感

玩家體驗係講緊玩家喺遊戲過程中所感受到嘅情緒、投入感同滿足感等嘅心理反應。良好嘅玩家體驗能夠令人樂而忘返，有時甚至會進入一種叫做心流（參見英文：flow）嘅狀態。所謂心流，係指人完全專注喺某個活動上面，唔覺時間流逝，內心處於高度集中同愉悅之中。當遊戲嘅難度同玩家技能水平達到平衡，就最容易產生心流體驗。設計者好多時都會刻意調整遊戲節奏、難度曲線同畫面回饋，嚟提升玩家體驗，令玩家沉浸喺遊戲世界之中。

睇埋

• 博弈者
• 玩嘅行為
• 打機用語
• 遊戲人工智能

橋頁

1. Scrub. TV Tropes.
2. Noob. TV Tropes.