自然科學

自然科學（粵拼：zi6 jin4 fo1 hok6）泛指用科學方法嚟研究大自然嘅領域，即係會用實驗同觀察等嘅做法嚟描述、預測同埋解釋大自然入面嘅各種現象。自然科學可以按「研究大自然嘅邊一忽」嚟再細分做做好多範^[1]。

自然科學嘗試研究大自然嘅嘢：由左上到右下係 DNA、星雲、火山、物體郁動同自然環境入面嘅動物。

定位

睇埋：科學同自然

自然科學好似其他科學分支－譬如心靈科學同社會科學－都係用科學方法去研究大自然（廣義嚟講包括所有非人造嘅嘢^[2]）。自然科學嘅研究過程係：

1. 根據已知嘅事實提出理論（「根據觀察到嘅現象，我推測背後嘅法則係點樣，令到研究對象會有呢啲表現」），最好係可以用數學模型嚟表達；
2. 用邏輯性思考去推斷呢啲理論應該會有咩預測（「假如我呢個理論啱嘅，應該會見到...」）；
3. 做實驗同觀察收集數據，測試理論嘅預測啱唔啱（「如果我嘅理論啱，呢個實驗應該會得出咁嘅結果，而實際結果係...」）；
4. 如果數據顯示理論嘅預測唔夠準確，就要根據新數據修改理論令佢更準確，又或者諗過第個理論取代佢^[3]。

呢個過程會不斷重複，直到理論可以做出完全準確嘅預測為止－咁樣自然科學就可以持續進步，預測愈嚟愈準。到而家，自然科學已經有好大嘅理論體系，用唔同理論去解釋各種自然現象，而自然科學家仲會繼續研究新現象，測試現有理論可唔可以解釋，定係要諗新理論^[4][5][6]。

物理科學

内文：物理科學

物理科學主要研究冇生命嘅嘢，由細細粒嘅原子到大大粒嘅星球都包括喺入面。

• 物理學探討宇宙最基本嘅組成部分，包括物質、物質喺時間同空間度嘅運動，仲有能量同力呢啲概念。佢嘅研究範圍由最細嘅基本粒子去到成個宇宙都有。物理學透過研究同發現物理定律嚟了解宇宙運作嘅方式。因為宇宙入面差唔多乜嘢都要跟從呢啲定律，所以物理學可以話係最基本同覆蓋範圍最大嘅自然科學^[7][8]。

• 化學研究物質同物質特性，特別係物質可以點樣轉變。化學家研究化學元素（唔同種類嘅原子）同化合物（由幾種元素組成嘅物質）嘅組成、結構同特性。佢哋仲會研究化學反應－即係物質之間嘅相互作用，包括反應過程嘅能量變化（好似有啲反應會放熱）^[9][10]。

• 地球科學專門研究地球環境，包括地質學（研究岩石圈）、海洋學（研究海）同氣象學（研究天氣同氣候）。呢啲研究要用到物理學同化學嘅知識，例如地質學要了解地殼嘅化學成份同熱力對呢啲成份嘅影響－前者涉及化學知識，後者涉及熱能同壓力等物理學概念^[11][12]。

• 天文學研究天體，包括恆星、行星、衞星、彗星同星系等。天文學運用數學、物理學同化學嚟解釋宇宙入面嘅天體點樣運作，例如用物理學嘅重力理論去分析行星點樣圍住恆星公轉（可以參考天體物理學）^[13][14]。

牛頓擺嘅郁動可以點樣用數學模型描述呢？ 領域：物理學，尤其係力學 牛頓擺嘅郁動可以點樣用數學模型描述呢？ 領域：物理學，尤其係力學  湖等嘅水體嘅化學成份係乜呢？ 領域：化學，尤其係地球化學 湖等嘅水體嘅化學成份係乜呢？ 領域：化學，尤其係地球化學  大腸桿菌嘅行為係點嘅呢？ 領域：生物學，尤其係微生物學 大腸桿菌嘅行為係點嘅呢？ 領域：生物學，尤其係微生物學

生命科學

内文：生命科學

生命科學專門研究有生命嘅嘢，包括細菌同植物以至人類等。

• 生物學研究生命同生命點樣影響環境^[15]，可以分做幾個範疇：
  • 遺傳學係研究基因同遺傳物質嘅生物學分支。基因決定生物嘅特徵，研究佢哋可以幫科學家明白特定基因嘅作用同基因之間嘅關係。呢啲研究仲促成咗遺傳工程嘅發展^[16][17]。
  • 神經科學研究神經系統，包括神經解剖學（研究腦嘅解剖結構）同神經生理學（研究腦部嘅化學、藥理同電氣特性）^[18]。神經科學被認為係橋接自然科學同社會科學嘅學科－神經科學家除咗研究動物嘅神經系統，仲會研究人腦，所以可以幫助理解由人組成嘅社會特性^[19]。
  • 生態學研究生態系統，即係研究兩個或以上嘅生物物種共處，同埋佢哋同周圍環境入面冇生命嘅嘢（好似水同岩石）嘅互動關係^[20]。喺大部分地球生態系統入面，能量以太陽光形式入到去－植物用太陽光做光合作用製造養分，然後畀食草動物食，再畀食肉動物食－呢啲複雜嘅關係就係生態學研究嘅重點^[21]。

睇埋

• 科學哲學
• 自然哲學
• 數學
• 工程