花

  想搵第二個意思嘅話，請睇花 (搞清楚)。

  「鮮花」跳轉到呢度。想搵歌，請睇「鮮花 (歌)」。

花（faa1）（英文：flower / bloom / blossom）係開花植物（學名：Angiosperms）嘅生殖用構造：一樖開花植物生到咁上下，就會開花；喺多數用蟲做傳粉媒介嘅開花植物當中，一朵花會同時有齊雄蕊同雌蕊^{[註 1]}，雄蕊會生產花粉，雌蕊會生產胚珠；蟲媒花通常會分泌花蜜，靠噉嚟吸引蜜蜂同蝴蝶等嘅昆蟲走入花嗰度採蜜，當有隻蟲做呢樣嘢嗰陣，花粉會黐上佢身，然後等隻蟲飛去第朵同種嘅花採蜜嗰陣，花粉就有機會掂到另外嗰朵花嘅雌蕊，做受粉產生孕育下一代嘅種子以及令胚珠發育成果實，令個植物物種能夠繁衍後代^{[註 2][1]}。喺呢個過程當中，開花植物進行緊有性繁殖－靠公同乸兩種配子嘅結合，產生出喺遺傳上似父母、但唔係同父母完全一樣嘅下一代^[2][3]。

12 種唔同植物嘅花

花喺生態系統入面扮演咗重要嘅角色：有好多動物都會食蟲媒花嘅花蜜、花粉同果實（雌蕊受粉之後發育成嘅嘢）維生，包括係蜜蜂、蝴蝶、飛蛾同好多甲蟲^[4][5]，好多肉食性動物又會靠食呢啲昆蟲維生，例子有螳螂同蜻蜓等食肉昆蟲同埋各種嘅雀鳥；就連人類都會用到花所產生嘅糧食－例如蜜蜂採咗花蜜之後，會將花蜜饟做蜜糖，而蜜糖喺人類社會當中一種相當重要嘅嘢食同調味料，據估計，全世界淨係有機蜜糖嘅總銷售量喺 2017 年經已有成五億美元咁多^[6]。

另一方面，花喺人類嘅文化當中亦有相當重要嘅地位：花（尤其係蟲媒花）嘅鮮艷顏色以及多樣姿態令好多人都覺得佢哋好靚；因為噉，花嘅形象常見於畫、文學同舞蹈等嘅文化產物當中^[7][8]；而且世界多地嘅族群都有用花做裝飾嘅習俗，好似係粵文化噉，粵人傳統喺過年嗰陣會買花返屋企用嚟粉飾家居、增添節日氣氛，而過年嗰時粵人對花嘅需求上漲造就香港同廣州等地一過年就有大型花市嘅盛況^[9]。

形態

喺現代嘅植物學當中，花定義上係指開花植物（學名：Angiosperms）嘅生殖用構造，會分做以下嘅部份：

花被

内文：花被

雄蕊

内文：雄蕊

雌蕊

内文：雌蕊

結構

花嘅主要結構

唔理係咩花都好，一朵完全嘅花係由花柄、花托、花萼、花冠同花冧组成，其中最明顯嘅係花冠。重有好靚嘅色彩，有保護花冧同引啲昆蟲傳花粉過嚟。

樣同色

花冠有好多唔同嘅樣，有十字形、蝶形、筒形、唇形、長方形，漏斗形同喇叭形7種。而花嘅顏色方面，有白、紅、橙、茶、黃、綠、藍、靛、紫、黑10種。冇一種固定嘅色，主要係由花瓣入面嘅色素而定。其中紅、藍、靛、紫嘅花有花青素，佢係變色「魔術師」：遇酸變紅，遇鹼變靛。而黃、橙嘅花有胡蘿蔔素；白花冇色素。由於每朵花有嘅色素、酸鹼性物質、水份、溫度、太陽光嘅環境條件都唔一樣，而且差咗好遠，所以花色有深淺同濃淡之分。

味

大多數嘅花都有香味。根據科學家嘅統計，喺香花樹種入面，白、黃、紅嘅花種好多都比較香，尤其係白花，可以話係「香花之最」。佢之所以散發噉嘅味係因為花瓣有個油細胞嘅化工廠響度。佢可以整芳香油，經過陽光加熱之後可以散發迷人嘅清香。重有啲花嘅細胞入面有配糖體，經過酵素分解之後同樣可以散發清香。佢喺醫呼吸疾病起咗個示範作用。

分類

• 蟲媒花

  蟲媒花係通過引嚟嘅昆蟲，喺佢嘅蜜腺傳花粉，搞結果同出籽。呢啲花一般有香氣、花蜜同花冠。

• 風媒花

  風媒花係通過風嚟傳花粉，搞結果同出籽。呢啲花一般冇香味、甚至連花蜜同花冠都冇。

醉夢花都

• 
  有「英雄木」之稱嘅木棉；
  木棉不嬲都係嶺南文化嘅象徵。
• 
  香港嘅象徵洋紫荊
• 
  「花中隱士」菊花；
  菊花出咗名係晉朝文人陶淵明嘅最愛。
• 
  紫菊
• 
  長江以南各地都見得到嘅梅花；
  梅花係冬天花嘅代表，象徵堅毅。
• 
  「中國玫瑰」月季；
  月季係北京嘅市花。
• 
  「寒冬仙女」水仙
• 
  「國色天香」牡丹；
  牡丹象徵富貴，係常見年花。
• 
  杜鵑；
  杜鵑花語係「永遠屬於你」。
• 
  「花中君子」蓮花；
  蓮花喺多個文化當中都係象徵純潔^[10]。
• 
  出名擅長淨化空氣嘅茶花
• 
  「金秋嬌子」桂花；
  除咗睇得，桂花仲可以用嚟整桂花糕。
• 
  木芙蓉喺四川嗰頭好常見，
  而成都仲有「蓉城」之稱。
• 
  「瑩潔清麗，恍疑冰雪」玉棠春；
  玉棠春係上海嘅市花。
• 
  蒲公英係一種出名嘅風媒花。
• 
  吉祥嘅瑞香
• 
  象徵多子多孫嘅石榴
• 
  太陽花
• 
  紫菀呢種花喺日本花語入面係「唔會忘記你」噉嘅意思^[11]。
• 
  盛開之後話咁快散落嘅櫻花俾好多人認為佢體現咗侘寂^[12]。

註釋

1. 不過有啲開花植物係會分雄蕊花同雌蕊花嘅。
2. 有陣時，會有一朵花嘅雄蕊同源自同一朵花嘅雌蕊做受粉。

睇埋

• 花序
• 花蜜
• 生果
• 蜜蜂
• 蝴蝶
• 花樽
• 雪月花
• 花美男

文獻

• Esau, Katherine (1965) Plant Anatomy (2nd ed.). John Wiley & Sons, New York.
• 曹慧娟．植物学（第2版）[M]．北京：中国林业出版社，1992年
• 中国少年儿童百科全书 自然·环境 第390－391页　浙江教育出版社 ISBN 7-5338-1946-2/G·1942