句

句（粵拼：geoi3），或者叫句子、語句，喺語言學入面係指一串根據文法連接起嚟，而且能夠表示一組完整意思嘅字詞。喺唔同嘅語言入面，「句」呢個概念嘅定義可以好唔同。絕大部份情況下，一個句子一定要有主語（除非係命令句），動詞或者謂語，但係亦都有啲語言允許冇主語或者唔一定要有主語都屬於句子。

按照功能分類

子句可以按功能嚟分類。

陳述句

陳述句^{[e 1]}係用嚟說明事實嘅。

喺粵語當中，呢種語句通常會係主語-動詞-賓語噉嘅樣，亦可以有主語-將-賓語-動詞噉嘅樣^[1]，例句：

我	飲緊	啤酒	。
主	動	賓

我	食緊	菠蘿包	。
主	動	賓

我	將	個	菠蘿包	食	落	肚	。
主		賓		動

祈使句

内文：祈使句

祈使句^{[e 2]}係用嚟要求對方做嘢嘅。

喺粵語當中，呢種語句可以有好多款，例如係動詞-賓語（VO）噉款，有陣時亦可以係動詞-賓語-主語（VOS）噉款，主語通常暗示咗係聽嘢嗰個人，例句：

買	菠蘿包	！
動	賓

買	菠蘿包	啦	你	！
動	賓		主

喺粵語裏便，祈使句可以配好多句尾助詞，例如啦被指可以令句嘢「軟化」冇咁似強硬嘅命令^[2]，而人稱代詞佢擺喺尾嘅話就被指可以強調做嗰個人嘅決心^[3]，例句：

• 啦：「買菠蘿包啦。」
• 啦：「快啲收衫啦。」
• 佢：「買晒啲菠蘿包佢！」
• 佢：「快啲收晒啲衫佢！」

疑問句

内文：疑問句

疑問句^{[e 3]}顧名思義係用嚟提問嘅。

粵語疑問句可以有好多個款：如果講嘢嘅人想知某樣嘢係咪成立，可以用 X-唔-X 噉嘅結構（正反問句）^[4][5]，由幾個當中揀一個嘅問句（選擇問句）可以用定係、抑或又或者係邊-量詞（邊個、邊度）嘅結構，而比較開放嘅問句就好多時會用點-X（點解、點樣）嘅結構... 等等。

• 點解問句：「你點解冇買菠蘿包？」

感嘆句

内文：感嘆句

感嘆句^{[e 4]}係用嚟抒發強烈情感嘅，例如：

• 「我頂！菠蘿包賣晒！」

書寫規範

喺書寫上，句尾一般都要有句號、問號或者感嘆號。

喺好多用拉丁字母書寫嘅語言入面，一個句子嘅第一個字母一定要大寫，但係亦都有例外，例如邏輯語啲句嘅第一個字母唔一定要大寫。

第個意思

個「句」字都可以係量詞，好似「一句話」或者「一句歌詞」噉。

相關嘅文

• 句法，專門研究句子嘅語言學領域。
• 子句
• 基本語序
• 句尾助詞