Albium

Die Albium is ’n chronostratigrafiese etage sowel as ’n geologiese tydsnede van onderskeidelik die sisteem en periode Kryt (serie/epog Vroeë Kryt). Dit verwys dus na ’n tydperk sowel as die gesteentes wat in dié tydperk gevorm het.

Periode/ sisteem	Epog/ serie	Tydsnede/ etage	M. jaar gelede
Paleogeen	Paleoseen	Danium	jonger
Kryt	Laat	Maastricht	66,0–72,1
		Campanium	72,1–83,6
		Santonium	83,6–86,3
		Coniakium	86,3–89,8
		Turonium	89,8–93,9
		Senomanium	93,9–100,5
	Vroeg	Albium	100,5–~113,0
		Aptium	~113,0–~125,0
		Barremium	~125,0–~129,4
		Hauterivium	~129,4–~132,9
		Valanginium	~132,9–~139,8
		Berriasium	~139,8–~145,0
Jura	Laat	Titonium	ouer
Die verdeling van die Kryt (IKS).

Trigoniidae Trigonia Daedalea uit Strépy-Bracquegnies in België, (uit die Albium-tydsnede).

Die tydperk was van sowat 113 tot 100,5 miljoen jaar gelede.^[1] Dit is voorafgegaan deur die Aptium en gevolg deur die Senomanium.

Naam en definisie

Die Albium is in 1842 deur die paleontoloog Alcide d'Orbigny genoem na die Franse rivier Aube, wat deur die département met dieselfde naam vloei.

Die basis van die etage word gedefinieer deur die eerste voorkoms van die mikrofossiel Praediscosphaera columnata, en die bokant deur die eerste voorkoms van die Foraminifera Rotalipora globotruncanoides.

In die Albium het die voorheen seldsame bedeksadiges vir die eerste keer ’n groot deel van die flora begin vorm.