Аляксей Палуян

Аляксе́й Палуя́н (нар. 18 кастрычніка 1989, Баранавічы) — беларускі кінарэжысэр дакумэнтальных і мастацкіх фільмаў, удзельнік міжнародных кінафэстываляў.

Вікіпэдыя мае артыкулы пра іншых асобаў з прозьвішчам Палуян.

Аляксей Палуян
Дата нараджэньня	18 кастрычніка 1989
Месца нараджэньня	Баранавічы, БССР
Грамадзянства	Беларусь
Месца вучобы	Беларускі дзяржаўны ўнівэрсытэт інфарматыкі і радыёэлектронікі (2012)
Занятак	рэжысэр
Гады дзейнасьці	з 2013
Сябра ў	Belarusian Independent Film Academy[d]
Узнагароды	шмат
IMDb	ID nm8667793
Аляксей Палуян у Вікісховішчы

Жыцьцяпіс

Скончыў баранавіцкую гімназію №4. У 2012 годзе скончыў Беларускі дзяржаўны ўнівэрсытэт інфарматыкі і радыёэлектронікі. У 2013 годзе паступіў на факультэт кіно і тэлебачаньня Акадэміі мастацтваў у Касэлі ў майстэрню Яны Друзь.

Творчасьць

Ягоны фільм «Возера радасьці», зьняты ў 2017 годзе паводле раману беларускага пісьменьніка Віктара Марціновіча, з моманту яго сусьветнай прэм’еры на фэстывалі ў Клермон-Фэране (адзін з найбуйнейшых фэстываляў кароткага мэтру ў сьвеце) атрымаў Гран-пры на кінафэстывалі ў Лос Анджэлесе (ЗША) і быў кваліфікаваны на Оскар 2021, а таксама быў вылучаны кандыдатам на прэмію Эўрапейскай кінаакадэміі^[1].

У 2021 годзе сусьветная прэм’ера дакумэнтальнай карціны Аляксея Палуяна «Сьмеласьць» (па-расейску: Кураж) адбылася ў праграме 71-га Бэрлінскага міжнароднага кінафэстывалю. «Сьмеласьць» афіцыйна была кваліфікаваная на прэмію Амэрыканскай кінаакадэміі «Оскар» у намінацыі «Найлепшы дакумэнтальны фільм».

Фільмаграфія

• 2021 — Сьмеласьць
• 2019 — Возера радасьці
• 2018 — Парушэньне спакою
• 2017 — Край жанчын
• 2015 — Вяртаньне
• 2013 — Сафія

Узнагароды

За фільм «Возера радасьці»

• 2020 — Гран-пры і кваліфікацыя на Оскар 2021 на кінафэстывалі ў Лос Анджэлесе (ЗША), LA Shorts International Film Festival
• 2020 — найлепшы кароткамэтражны фільм на міжнародным кінафэстывалі ў Трыесьце (Італія), Trieste Film Festival
• 2020 — узнагарода «Silber EGG» міжнароднага кінафэстывалю Эміра Кустурыцы ў Кюстэндорфе (Сэрбія), Küstendorf Film and Music Festival
• 2020 — найлепшы кароткамэтражны фільм на кінафэстывалі цэнтральна- і ўсходнеэўрапейскага кіно ў Люксэмбургу, Central and Eastern European Film Festival CinEast
• 2019 — вылучэньне фільму кандыдатам на Эўрапейскую Кінаакадэмію 2020 на міжнародным кінафэстывалі ў Лёйвэне (Бэльгія), Leuven International Short Film Festival
• 2019 — узнагарода «Найлепшы рэжысэр» на міжнародным кінафэстывалі кароткамэтражных фільмаў у Драме (Грэцыя), Drama International Short Film Festival
• 2019 — перамога на нямецкай кінапрэміі Hessen Film Awards у намінацыі «Найлепшы кароткамэтражны фільм» ^[2]
• 2019 — галоўная ўзнагарода 19-га фэстывалю Nevada Сity Film Festival у ЗША^[3][4]
• 2019 — намінацыя на Нямецкую Кінаакадэмію, German Short Film Award 2019