Ачакаў

Ача́каў (па-ўкраінску: Очаків) — места ў Мікалаеўскай вобласьці, на ўзьбярэжжы Чорнага мора, побач з утокай Дняпра. Адміністрацыйны цэнтар Ачакаўскага раёну.

Ачакаў
укр. Очаків
Герб Ачакава Сьцяг Ачакава
Першыя згадкі:	1396
Горад з:	1968
Былая назва:	Дашаў
Краіна:	Украіна
Вобласьць:	Мікалаеўская
Раён:	Ачакаўскі
Плошча:	12,49 км²
Вышыня:	37 м н. у. м.
Насельніцтва
колькасьць:	13 663[1] чал. (2022)
шчыльнасьць:
Часавы пас:	UTC+2
летні час:	UTC+3
Тэлефонны код:	+380 5154
Паштовы індэкс:	57500
КОАТУУ:	4810300000
Геаграфічныя каардынаты:	46°37′7″ пн. ш. 31°32′21″ у. д.
Ачакаў на мапе Ўкраіны Ачакаў
Галерэя здымкаў у Вікісховішчы
Ачакаўская меская рада

Знаходзіцца за 69 км на паўднёвы захад ад Мікалаева і найбліжэйшай чыгуначнай станцыі. Марскі порт.

Гісторыя

Дашаў

Асноўны артыкул: Дашаў

Я. Сухадольскі «Штурм Ачакава»

У 1396^[2] року вялікі князь літоўскі Вітаўт заснаваў на месцы сучаснага Ачакава новае места-фартэцыю.

Места Дашаў упершыню згадваецца ў дамове, складзенай паміж вялікім князем літоўскім Сьвідрыгайлам і каралём польскім Ягайлам у 1431 року. У 1480-я рокі Дашаў захапілі крымскія татары.^[2]

Ачы-Кале

У 1492 року крымскі хан Мэнглі-Гірэй пабудаваў на месцы зруйнавага вялікалітоўскага Дашава фартэцыю Кара-Кэрмэн, якая неўзабаве перайшла да Турэччыны і атрымала назву Ачы-Кале. Пазьней фартэцыю пераўтварылі ў вайскова-марскую базу — апору турэцкага панаваньня ў Паўночным Прычарнамор’і.

Падчас расейска-турэцкай вайны 1735—1739 рокаў расейскія войскі 2 ліпеня 1737 року занялі, аднак паводле Бэлградзкага замірэньня 1739 року места засталося за Турэччынай. Падчас расейска-турэцкай вайны 1787—1791 рокаў падчас аблогі Ачы-Кале расейскі флёт нанёс паразу турэцкаму флёту ў лімане, а расейскае войска пад камандаваньнем Р. Пацёмкіна 6 сьнежня 1788 року штурмам авалодала цьвердзю.

Ачакаў

Згодна зь Яскай мірнай дамовай 1791 року места адышло да Расейскай імпэрыі, дзе было ўлучана ў Хэрсонскую губэрню. Турэцкую назву адапатавалі да расейскай мовы праз суфікс -ов.^[3]

У 1795 року Ачакаў увайшоў у склад Вазьнясенскага намесьніцтва, а ў наступным року — у Наварасейскую, з 1802 году — Мікалаеўскую губэрню (у 1803 року пераназваная ў Хэрсонскую). З 1803 року Ачакаў — пазаштатнае мястэчка, з 1825 року — цэнтар Ачакаўскага павету. У 1855 року Ачакаў захапілі англа-францускія войскамі, але затым места вярнулі Расеі.

У савецкі час у месьце знаходзіліся вайскова-марская і вайсковая гэлікоптэрная база.

З 1991 року ў складзе незалежнай Украіны, курорт і вайскова-марская база.

Насельніцтва

• 2-я пал. XIX ст. — 5347 чал.^[4]
• 1974 год — 14,2 тыс. чал.^[5]
• 1991 год — 19,7 тыс. чал.^[6]
• 2008 год — 15 047 чал.^[7]

Турыстычная інфармацыя

Музэй Р. Судкоўскага

У Ачакаве знаходзіцца музэй марыністычнага жывапісу імя мастака Р. Судкоўскага (філія Мікалаеўскай мастацкай галерэі).

У наш час на Ачакаўскім узьбярэжжы месьціцца больш за чатыры дзясяткі санаторыяў, дзе шторок адпачывае каля 100 тысячаў чалавек.