Аўдзі Вугоршчыны

«Аўдзі Вугоршчыны» — аўтамабілебудаўнічае прадпрыемства Вугоршчыны, заснаванае ў лютым 1993 году ў Д’ёры (Заходне-Задунайскі край).

«Аўдзі Вугоршчыны»
вуг. Audi Magyarország
Тып	таварыства з абмежаванай адказнасьцю
Заснаваная	18 лютага 1993 (32 гады таму)
Заснавальнікі	«Аўдзі» (Нямеччына)
Уласьнікі	«Аўдзі» (Нямеччына)
Краіна	Вугоршчына
Разьмяшчэньне	Заходне-Задунайскі край
Адрас	Д’ёр, дарога Аўдзі Вугоршчыны, дом 1
Ключавыя фігуры	Міхаэль Брэме (старшыня Рады кіраўнікоў), Герд Ўокер (старшыня Наглядальнай рады)[1]
Галіна	аўтамабілебудаваньне
Прадукцыя	электрарухавік, дызэльны рухавік, бэнзінавы рухавік унутранага згараньня, самаход-красовэр, гібрыдны самаход
Чысты прыбытак	425 млн € (2018)[2]
Лік супрацоўнікаў	11 663 (канец 2023 г.)
Матчына кампанія	«Аўдзі» (Нямеччына)
audi.hu
«Аўдзі Вугоршчыны» у Вікісховішчы

На 2025 год вырабляла электрарухавікі, рухавікі ўнутранага згараньня (РУЗ) і самаходы. Мела ўласны інструмэнтальны завод, прэсавы цэх, кузаўны цэх і цэх афарбоўкі, а таксама асяродак тэхнічных распрацовак. Была адным з найбольшых вытворцаў, укладальнікаў і экспартэраў Вугоршыны, а таксама найбольшым наймальнікам у Заходне-Задунайскім краі пры 11 663 супрацоўніках на канец 2023 году^[3]. Пастаўляла рухавікі для аўтазаводаў «Аўдзі», «Фольксвагену» і «Поршэ» (Нямеччына), «Лямбаргіні» (Італія), «Бэнтлі» (Ангельшчына), «Шкоды» (Чэхія), «Сеату» і «Купры» (Гішпанія), а таксама самаходы ў 37 краінаў^[4].

За 2024 год вырабілі 1 580 991 рухавік, зь іх 10 % (151 899) склалі электрарухавікі. Штодня на заводы канцэрну «Фольксваген» у 35 краінах пастаўлялі 5646 рухавікоў. Таксама вырабілі 179 710 самаходаў, зь іх 55 % прыпала на «Аўдзі Кю3», 36 % — на «Аўдзі Кю3 Спортбэк», а рэшта — на гібрыдныя самаходы «Купра Тэрамар». Сярод іншага, інструмэнтальны завод выпусьціў 35 520 кузаўных дэталяў для спартовых самаходаў канцэрну^[5]. Асяродак тэхнічных распрацовак меў акустычна-тармазны дынамомэтар, цэнтрыфугу выпрабаваньня ротара, выпрабавальню прываду, ролікавы дынамомэтар, кліматычную камэру і акустычную залю^[6].

Вырабы

На 2025 год «Аўдзі Вугоршчыны» вырабляў:

• электрарухавікі;
• 4- і 6-цыліндровыя дызэльныя рухавікі (17 % вытворчасьці рухавікоў);
• 3-, 4- (палова ўсіх вырабленых рухавікоў), 5-, 6- і 10-цыліндровыя бэнзінавыя рухавікі ўнутранага згараньня (РУЗ);
• 5-дзьверныя красовэры, у тым ліку «Аўдзі Кю3» і гібрыдныя самаходы^[7].

Мінуўшчына

18 лютага 1993 году нямецкі аўтавытворца «Аўдзі» (зямля Баварыя) заснаваў завод рухавікоў «Аўдзі Вугоршчыны» ў Д’ёры (Заходне-Задунайскі край) на 600 працаўнікоў, які стаў першай замежнай вытворчасьцю «Аўдзі»^[3]. У 1994 годзе пачалі сэрыйную вытворчасьць 4-цыліндровых рухавікоў. У 1997 годзе дадалі вытворчасьць 6- і 8-цыліндровых рухавікоў^[8]. У 1998 годзе дадалі вытворчасьць самаходаў^[3] «Аўдзі ТТ» у выглядзе купэ і збудавалі лінію апрацоўкі каленчатых валаў і шатуноў. У 1999 годзе пачалі зборку родстэраў «Аўдзі ТТ». У 2000 годзе запусьцілі вытворчасьць дызэльных рухавікоў з помпа-фарсункай^[8].

«Аўдзі ТТ» першага пакаленьня на заводзе ў Д’ёры (2005 год)

У 2001 годзе дзейнасьць дапоўнілі тэхнічнымі распрацоўкамі рухавікоў^[3]. У 2001—2003 гадох выпускалі хэтчбэкі «Аўдзі А3» і «Аўдзі С3». У чэрвені 2005 году вырабілі 10-мільённы рухавік^[3]. У 2005 годзе запусьцілі інструмэнтальны завод, які быў адным з найбольшых у Сярэдняй Эўропе^[3]. У 2006 годзе «Аўдзі Вугоршчыны» стала асноўным спонсарам д’ёрcкага жаночага гандбольнага клюбу «Кляса гімнастыкі згоды», які перайменавалі ў «КГЗ Аўдзі». Да 2024 году клюб перамагаў 5 разоў у Эўрапейскай лізе чэмпіёнак і 16 разоў у Вугорскім першынстве. Таксама завод стаў асноўным спонсарам Д’ёрскага балету і Д’ёрcкага філярманічнага аркестру^[9].

У 2007 годзе стварылі вытворчасьць кабрыялета «Аўдзі А3» і сэрыйную вытворчасьць 4-цыліндровых дызэльных рухавікоў з накапляльнай падачай паліва і 10-цыліндровых бітурбаваных рухавікоў. У 2008 годзе стварылі сэрыйную вытворчасьць 12-цыліндровых рухавікоў з турбанадзьмуваным наўпроставым упрыскам. У 2010 годзе адчынілі асяродак запуску рухавікоў і запусьцілі сэрыйную зборку поўнапрывадных хэтчбэкаў «Аўдзі РС3». У красавіку 2011 году вырабілі 20-мільённы рухавік. У ліпені 2011 году пачалі пашырэньне заводу. У траўні 2012 году адчынілі новы аўтазавод. У лістападзе 2012 году стварылі вытворчасьць новых 4-цыліндровых рухавікоў абсягам 1,2 і 1,4 літры^[3]. У 2012 годзе пачалі выкарыстаньне геатэрамальнай электрастанцыі з гадавой вытворчасьцю 82 000 мэгават-гадзіна цеплавой энэргіі. Электрастанцыя стала пакрываць 70 % патрэбаў прадпрыемства ў цяпле, а рэшту пачалі забясьпечваць за кошт закупак біягазу^[10].

У чэрвені 2013 году вытворчасьць самаходаў дапоўнілі прэсавым цэхам, кузаўным цэхам і цэхам афарбоўкі^[3]. Адначасна запусьцілі сэрыйную вытворчасьць сэдана і кабрыялета «Аўдзі А3». У верасьні 2013 году на заводзе працавала 10 000 супрацоўнікаў. У лістападзе 2013 году выпусьцілі 500-тысячны самаход «Аўдзі ТТ» і 25-мільённы рухавік. У 2014 годзе стварылі сэрыйную вытворчасьць новых купэ і родстэраў «Аўдзі ТТ». У верасьні 2014 году стварылі новую лябараторыю пры катэдры комплекснай распрацоўкі самаходаў Унівэрсытэту імя Іштвана Сечэньі, а ў лістападзе стварылі 5-ю катэдру ва Ўнівэрсытэце. У студзені 2015 году заснавалі факультэт аўтамабілебудаваньня ва Ўнівэрсытэце імя Іштвана Сечэньі. У лютым 2015 году стварылі новы навучальны цэх апрацоўкі мэталаў у Праектна-навучальным асяродку. У верасьні 2015 году адчынілі новы склад дастаўкі. У сьнежні 2015 году выпусьцілі 300-тысячны самаход. У 2016 годзе пачалі ўзводзіць кузаўны цэх плошчай 8 гектараў і выпусьцілі 30-мільённы рухавік. У 2017 годзе стварылі сэрыйную вытворчасьць сэдана «Аўдзі РС3», пашырылі інструмэнтальны завод на 1,5 га і ўсталявалі 4 новыя вялікія прэсы зь сілай заціску да 2500 тонаў. Распрацавалі рухавік на звадкаваным прыродным газе (ЗПГ) і запусьцілі яго вытворчасьць. Таксама выпусьцілі 500-тысячны самаход на новым аўтазаводзе^[8].

Пазадарожнік «Аўдзі Кю3» (2018 год)

У 2018 годзе пачалі сэрыйную вытворчасьць электрарухавікоў^[3]. У 2018 годзе стварылі сэрыйную вытворчасьць першых 3-цыліндровых рухавікоў і запусьцілі новую кліматычную камэру для выпрабаваньня пры тэмпэратуры ад –40 да +80 °C. Таксама пачалі вытворчасьць першых пазадарожнікаў «Аўдзі Кю3» і сэрыйную вытворчасьць 4-цыліндровых дызэльных рухавікоў для гібрыдных самаходаў. Сярод іншага, пашырылі інструмэнтальны цэх для пастаўкі кузаўных дэталяў для 120 самаходаў штодня. У 2019 годзе пачалі вытворчасьць самаходаў «Аўдзі Кю3 Спортбэк», у тым ліку гібрыдных, і вырабілі 100-тысячны прывад электроннай восі праз 1,5 паўтары гады пасьля запуску вытворчасьці^[8].

У 2020 годзе з канвэера сышоў 1,5-мільённы самаход. Толькі «Аўдзі Вугоршчыны» вырабляла дэталі для электрамабіляў «Аўдзі е-трон ГТ»^[8]. У 2020 годзе сумесна з прадпрыемствам «Эон Вугоршчыны» на дахах 2 складоў дастаўкі запусьцілі сонечную электрастанцыю з гадавой вытворчасьцю 9,5 гігават-гадзіна, што адпавядала патрэбам 3800 хатніх гаспадарак. Электрастанцыя складалася з больш як 36 000 сонечных панэляў на плошчы 16 гектараў. 1 ліпеня 2021 году запусьцілі вытворчасьць алюміну замкнёнага цыклю зь вяртаньнем адкідаў пастаўніку для паўторнага атрыманьня зь іх алюмінавых рулёнаў. Гэта дазволіла скараціць спажываньне энэргіі на 95 % пры вытворчасьці з другаснай сыравіны параўнальна зь першаснай^[10]. У 2021 годзе вырабілі 40-мільённы рухавік і 250-тысячны электрарухавік, а таксама 250-тысячын самаход «Аўдзі Кю3»^[8].

На канец 2023 году «Аўдзі Вугоршчыны» наймала 11 663 супрацоўнікаў^[3]. За 30 гадоў працы на заводзе вырабілі звыш 43 млн рухавікоў і каля 2-х млн самаходаў. За гэты час укладаньні ў вытворчасьць перавысілі 12 млрд эўра. У выніку вытворчасьці 1,66 млн рухавікоў і 177 тыс. самаходаў у 2023 годзе на «Аўдзі Вугоршчыны» прыпала 8 % вывазу Вугоршчыны. Гэта зрабіла прадпрыемства найбольшым прадпрыемствам краіны і найбольшым вытворцам рухавікоў у сьвеце^[11].