Бананавы хлеб

Бананавы хлеб — хлеб з расьцёртых бананаў.

Бананавы хлеб
2009 год
Іншыя назвы	бананавы пірог
Тып	хлеб
Нацыянальная страва	амэрыканская
Паходжаньне	ЗША
Рэгіён	Паўночная Амэрыка
Аўтар	«Пілзбэры» (штат Мінэсота)
Дата зьяўленьня	1933 (92 гады таму)
Час прыгатаваньня	2 гадзіны
Асноўны складнік	бананы
Распаўсюджаныя складнікі	пшанічная мука, алей, цукар, сода
Энэргетычная каштоўнасьць (у 100 г)	303 ккал (1269 кДж)
Харчовая каштоўнасьць (у 100 г)	Бялкі: 6 г Тлушчы: 13 г Вугляводы: 39 г
Падобныя стравы	гарбузовы хлеб
Бананавы хлеб у Вікісховішчы

У 1933 годзе амэрыканскі перапрацоўнік збожжа «Пілзбэры» (штат Мінэсота) выдаў кнігу «Збалянсаваныя рэцэпты», якая ўпершыню зьмяшчала спосаб прыгатаваньня бананавага хлеба. Пазьней у ЗША ўсталявалі Дзень бананавага хлеба, які прызначылі на 23 лютага.

Складнікі

Для прыгатаваньня бананавага хлеба выкарыстоўваюць 500 грамаў (5) бананаў, 300 грамаў пшанічнай мукі найвышэйшага гатунку або з цэльнага збожжа, 80 мілілітраў алею, 70 грамаў цукру і 1 гарбатную лыжку соды^[1].

Прыгатаваньне

Спачатку бананы здрабняюць у блэндэры або відэльцам. Затым дадаюць муку і алей, цукар і соду ды разьмешваюць да атрыманьня густога цеста, каб тое трымалася на лыжцы. Атрыманае цеста перакладаюць у сыліконавую форму, інакш форму змазваюць алеем або засьцілаюць пэргамэнтам. Выпякаюць у разагрэтай духоўцы пры +180 градусах каля 40 хвілінаў. Гатовасьць хлеба правяраюць калыпком, пакуль на ім не застанецца мокрага цеста^[1].