Берасьцейскі дзяржаўны тэхнічны ўнівэрсытэт

Берасьце́йскі дзяржа́ўны тэхні́чны ўнівэрсытэ́т (БрДТУ) — вышэйшая навучальная ўстанова Беларусі, заснаваная ў красавіку 1966 году ў Берасьці. Навучаньне дзённае (4 гады) і завочнае (5 гадоў). Асьпірантура з 1991 году. Мае 3 навукова-дасьледныя лябараторыі: 1) пульсавальнага гарэньня («Пульсар»), 2) будаўнічых канструкцыяў; 3) саманапружаных канструкцыяў^[2]. На 2016 г. ажыцьцяўляўся набор на 27 спэцыяльнасьцяў, зь іх у магістратуру і асьпірантуру на 14 з прысваеньнем адпаведна званьняў магістраў і кандыдатаў тэхнічных, фізыка-матэматычных і эканамічных навук. На 2015 г. бібліятэка ВНУ мела плошчу 1710 м² і 3 чытальні на 290 месцаў (1-ы і 5-ы корпусы), налічвала 432 тыс. асобнікаў выданьняў.

Берасьцейскі дзяржаўны тэхнічны ўнівэрсытэт
Брестский инженерно-строительный институт, Брестский политехнический институт, Брэсцкі інжынерна-будаўнічы інстытут, Брэсцкі політэхнічны інстытут, Берасьцейскі інжынэрна-будаўнічы інстытут, Берасьцейскі політэхнічны інстытут
Лягатып
Заснаваны	1 красавіка 1966 (59 гадоў таму)
Тып	урадавы
Рэктар	Сяргей Каспяровіч[1]
Факультэтаў	8
Колькасьць студэнтаў	10 139 (2013 г.)
Колькасьць магістрантаў	83
Месцазнаходжаньне
Геаграфічныя каардынаты	52°5′48″ пн. ш. 23°45′30″ у. д.
Горад	Берасьце
Краіна	Беларусь
Кампус	гарадзкі
Былыя назвы	Берасьцейскі інжынэрна-будаўнічы інстытут (да 1989 г.), Берасьцейскі політэхнічны інстытут (да 1 чэрвеня 2000 г.)
Знаходзіцца ў складзе	Міністэрства адукацыі Рэспублікі Беларусь
Вэб-сайт	bstu.by
Берасьцейскі дзяржаўны тэхнічны ўнівэрсытэт у Вікісховішчы
Берасьцейскі дзяржаўны тэхнічны ўнівэрсытэт на мапе Беларусі Берасьцейскі дзяржаўны тэхнічны ўнівэрсытэт

Факультэты

На 2016 г. унівэрсытэт меў у сваім складзе 8 факультэтаў, у тым ліку завочнага навучаньня і даўнівэрсытэцкай падрыхтоўкі, а таксама Інстытут павышэньня кваліфікацыі і перападрыхтоўкі.

• Будаўнічы. Заснаваны 14 верасьня 1967 году. Месьціцца ў галоўным корпусе па вул. Маскоўская, д. 267. Рыхтуе архітэктараў, добраўпарадкавальнікаў будынкаў і тэрыторыяў, інжынэраў дарог, праектавальнікаў і рэстаўратараў будынкаў, тэхнолягаў будаўнічай вытворчасьці і экспэртаў нерухомасьці. Мае 10 катэдраў: 1) архітэктурнага праектаваньня і рысунка; 2) архітэктурных канструкцыяў; 3) будаўнічай мэханікі; 4) будаўнічых канструкцыяў; 5) геатэхнікі і транспартных камунікацыяў; 6) замежных моваў па тэхнічных спэцыяльнасьцях; 7) тэхналёгіі будаўнічай вытворчасьці; 8) тэхналёгіі бэтона і будаўнічых матэрыялаў; 9) фізычнага выхаваньня і спорту; 10) эканомікі і арганізацыі будаўніцтва.
• Інавацыйнай дзейнасьці, кіраваньня і фінансаў. Створаны ў 1999 годзе. Знаходзіцца ў корпусе № 7 па вул. Дзяржынскага, д. 22. Выпускае інжынэраў водазабесьпячэньня, інфарматыкаў, мэнэджараў, рахункаводаў і эканамістаў. Мае 1 катэдру: кіраваньня, эканомікі і фінансаў.
• Інжынэрных сыстэмаў і экалёгіі (раней — гідрамэляратыўны). Заснаваны ў 1971 годзе. Месьціцца ў галоўным корпусе. Рыхтуе інжынэраў ацяпленьня і каналізацыі, мэліяратараў і прыродаахоўнікаў. Мае 5 катэдраў: 1) водазабесьпячэньня, водаадвядзеньня і водных рэсурсаў; 2) інжынэрнай экалёгіі і хіміі; 3) накрэсьлівальнай геамэтрыі і інжынэрнай графікі; 4) прыродаўпарадкаваньня; 5) цеплагазазабесьпячэньня.
• Машынабудаўнічы (да 15 жніўня 2005 г. — электронна-мэханічны). Створаны ў 1984 годзе. Месьціцца ў корпусе № 2 (вул. Маскоўская, д. 267 корп. 2). Рыхтуе аўтаматызатараў вытворчасьці, аўтамэханікаў, мэханікаў харчовай вытворчасьці і машынабудаўнікоў. Мае 6 катэдраў: 1) аўтаматызацыі тэхналягічных працэсаў і вытворчасьці; 2) гуманітарных навук; 3) машыназнаўства; 4) супраціву матэрыялаў і тэарэтычнай мэханікі; 5) тэхналёгіі машынабудаваньня; 6) тэхнічнай эксплюатацыі аўтамабіляў.
• Эканамічны. Заснаваны 1 лютага 1995 году. Месьціцца ў галоўным корпусе. Выпускае аўдытараў, бухгальтараў, лягістыкаў, маркетолягаў, мэнэджараў і эканамістаў. Мае 6 катэдраў: 1) бухгальтарскага ўліку, аналізу і аўдыту; 2) замежных моваў эканамічных спэцыяльнасьцяў; 3) інфарматыкі і дастасоўнай матэматыкі; 4) мэнэджмэнту; 5) сусьветнай эканомікі, маркетынга і інвэстыцыяў; 6) эканамічнай тэорыі і лягістыкі.
• Электронна-інфармацыйных сыстэмаў. Створаны 25 жніўня 2005 году. Месьціцца ў корпусе № 2. Рыхтуе інжынэраў радыётэхнікі, праграмістаў і сыстэматэхнікаў. Мае 4 катэдры: 1) вышэйшай матэматыкі; 2) электронна-вылічальных машынаў і сыстэмаў; 3) інтэлектуальных інфармацыйных тэхналёгіяў; 4) фізыкі.

Мінуўшчына

Пры заснаваньні ў красавіку 1966 г. Берасьцейскі інжынэрна-будаўнічы інстытут налічваў 32 выкладнікі і 440 студэнтаў, зь іх 330 дзённага навучаньня і 110 — вечаровага. У 1969 г. лік выкладнікаў вырас да 186 чалавек пры 2700 студэнтах на 4 курсах, зь іх 1960 (72,6%) на дзённым аддзяленьні, 480 (17,8%) — на вечаровым і 260 (9,6%) — на завочным. У 1970 г. лік навучальнай і навуковай літаратуры ў бібліятэцы ВНУ перавысіў 100 тыс. асобнікаў.

У 1997 г. стварылі электронны каталёг бібліятэкі. У 1998 г. у 5-м корпусе (эканамічны факультэт) адчынілі 2 дадатковыя чытальні. На сакавік 2012 г. унівэрсытэт выпусьціў за 45 гадоў свайго існаваньня каля 25 тыс. адмыслоўцаў. На 7 факультэтах навучаліся звыш 10 тыс. студэнтаў, зь іх 190 замежных (2%; Кітай, Нігерыя, Туркмэністан, Шры-Ланка)^[3]. На 1 сьнежня 2013 г. унівэрсытэт налічваў 10139 студэнтаў, зь іх 5259 (51,9%) на дзённым навучаньні, 2725 (26,9%) — на завочным, 436 (4,3%) — у інстытуце павышэньня кваліфікацыі і перападрыхтоўкі, 231 (2,3%) — на факультэце даўнівэрсытэцкай падрыхтоўкі, 83 (0,8%) — у магістратуры.

2020—2021 годы

Асноўны артыкул: Пратэсты ў Беларусі (2020—2021)

Рэктар Аляксандар Драган(be), які падтрымаў студэнтаў унівэрсытэта падчас акцыяў пратэсту ў Беларусі, быў вызвалены ад займанай пасады 20 кастрычніка 2020 году^[4]. Новым рэктарам быў прызначаны доктар тэхнічных навукаў, дацэнт Аляксандар Бахановіч^[5].

28 кастрычніка 2020 году 9 студэнтаў будаўнічага факультэту й факультэту электронна-інфармацыйных сыстэмаў былі адлічаныя за г. зв. «парушэньне грамадзкага парадку»^[6]. Дакладная запіска на адлічэньне студэнтаў была падпісана прарэктарам унівэрсітэту Натальляй Ялавой(be)^[7]. Адна скарга на незаконнае адлічэньне дайшла да суда^[8].

29 кастрычніка звольнілася юрысконсульт БрДТУ Вольга Аўдзяйчук, бо не хацела падпісваць загад аб адлічэньні студэнтаў, да якога ў жанчыны паўсталі справядлівыя пытаньні^[9]. Начальніца юрыдычнага аддзелу Тацьцяна Крывушчанка таксама сышла з пасады ў знак пратэсту супраць нелегітымнага загаду, як і некаторыя іншыя выкладчыкі ўнівэрсытэту^[10].

Дзеяньні кіраўніцтва ўнівэрсытэту былі асуджаныя на міжнародным узроўні^[11][12]. 21 чэрвеня 2021 году рэктар Аляксандар Бахановіч, прызначаны на пасаду Аляксандарам Лукашэнка, быў унесены ў Чорны сьпіс Эўразьвязу^[13]. Паводле рашэньня ЭЗ, Бахановіч «нясе адказнасьць за рашэньне адміністрацыі ўнівэрсытэту адлічыць студэнтаў за ўдзел у мірных акцыях пратэсту», пастановы аб чым былі прыняты пасьля закліку Лукашэнкі 27 кастрычніка 2020 году адлічаць студэнтаў унівэрсытэтаў, якія ўдзельнічаюць у акцыях пратэсту й страйках — рэпрэсіі супраць грамадзянскае супольнасьці й падтрымку рэжыму Лукашэнкі^[14].

Рэктары

• Ігар Белагорцаў (1966—1980)
• Леанард Коршун (1980—1995)
• Уладзіслаў Фёдараў (1995—2002)
• Пётар Пойта (2002—2018)
• Аляксандар Драган(be) (2018—2020)
• Аляксандар Бахановіч (2020—2023)
• Сяргей Каспяровіч (з 2023)

Выпускнікі

• Аляксей Андрэюк — дацэнт БрДТУ
• Юры Дарагакупец(be) (2002) — дэпутат Палаты прадстаўнікоў Беларусі 5-га і 6-га скліканьня (2012—2020)
• Міхаіл Мясьніковіч (1972) — 2-і кіраўнік Адміністрацыі прэзыдэнта Рэспублікі Беларусь (1995—2001), 12-ы старшыня Нацыянальнай акадэміі навук Беларусі (2001—2010), 7-ы прэм’ер-міністар Рэспублікі Беларусь (2010—2014)