Браслаўская града

Бра́слаўская града́, Бра́слаўскае ўзвы́шша — града на крайнім паўночным захадзе Беларусі, займае большую частку Браслаўскага і частку Мёрскага раёнаў Віцебскай вобласьці. Некаторыя дасьледчыкі лічаць яе часткай Беларускага Паазер’я. Працягнулася з захаду на ўсход на 66 км, з поўначы на поўдзень — амаль на 60 км, плошча 1,9 тыс. км². Найбольшая вышыня 210 м над узроўнем мора каля вёскі Слабодка. Цэнтар — места Браслаў.

Браслаўская града

азёрная вобласьць, узгорак

Краіна	Беларусь
Адміністрацыйная адзінка	Беларусь
Геаграфічныя каардынаты

Краявід Браслаўскай грады

На поўначы града абмежавана далінай Дзьвіны, на ўсходзе і поўдні — Полацкай нізінай.

Града канчаткова сфармавалася ў час браслаўскага прыпынку (стадыялу) паазерскага ледавіка. У рэльефе вылучаюцца дугападобныя грады, паміж якімі паніжэньні і невялікія азёры. Трапляюцца шматлікія озавыя і камавыя ўзгоркі.

Карысныя выкапні: керамічная сыравіна, пяскова-жвіровы матэрыял, торф.

Рэкі належаць да басэйну Дзьвіны, найвялікшая — Друйка, якая працякае празь некалькі азёраў. Пад азёрамі каля 10% тэрыторыі, большасьць зь іх належыць да Браслаўскай групы азёр. Найбуйнейшыя — Дрысьвяты, Снуды і Струста.

Разараныя каля 60%, пад лесам і хмызьняком каля 20% тэрыторыі.

Браслаўская града вызначаецца маляўнічасьцю краявідаў, асабліва там, дзе аблесеныя ўзгоркі спалучаюцца з азёрнымі плёсамі. Тут разьмешчаныя Браслаўскі нацыянальны парк, зоны адпачынку, санаторыі, дамы адпачынку, турбаза.

Адным з найвышэйшых пунктаў грады зьяўляецца гара Маяк, разьмешчаная паміж азёрамі Струста і Снуды^[1].