Віктар Сотнікаў

Віктар Сотнікаў (нар. 27 ліпеня 2001 году) — беларускі футбаліст, паўабаронца барысаўскага БАТЭ.

Віктар Сотнікаў
Пэрсанальная інфармацыя
Нарадзіўся	27 ліпеня 2001(2001-07-27)[1] (24 гады) Рубель, Столінскі раён, Берасьцейская вобласьць, Беларусь[2]
Рост	186 см[3]
Вага	76 кг[3]
Пазыцыя	паўабаронца
Клюбная інфармацыя
Клюб	БАТЭ
Нумар	33
Клюбы
Гады	Клюб	Гульні (галы)¹
2020—2022	Шахцёр Салігорск	22 (0)
2022—4	БАТЭ	48 (2)
2023	→ Бунядкор[d]	8 (0)
Зборныя
2020—2022	Беларусь (да 21)	11 (0)
¹ Колькасьць гульняў і галоў за прафэсійны клюб лічыцца толькі для нацыянальнай лігі, адкарэктавана на 29 чэрвеня 2025.

Кар’ера

Клюбная

Пачынаў займацца футболам у Столінскім раёне, а ўлетку 2014 году далучыўся да акадэміі салігорскага «Шахцёра». З 2018 году пачаў гуляць за клюбны дубль. Дэбютаваў у асноўнай камандзе 29 ліпеня 2018 году ў матчы Кубка Беларусі супраць «Чысьці» (11:0), дзе адгуляў другі тайм. Да сэзону 2020 стаў рыхтавацца зь першай камандай. Дэбютаваў у Найвышэйшай лізе 25 красавіка 2020 году, выйшаўшы на замену ў канцы матча супраць берасьцейскага «Дынама» (2:0). У сэзоне 2021 году пачаў часам зьяўляцца ў стартавым складзе каманды, а ў 2022 годзе выходзіў на замену. У ліпені 2022 году перайшоў у барысаўскі БАТЭ, падпісаўшы кантракт да канца 2024 году^[4]. У барысаўскім клюбе стаў выкарыстоўвацца на пазыцыі абаронцы. У лютым 2023 году быў аддадзены ў арэнду ва ўзбэцкі «Бунядкор»^[5]. У ліпені 2023 году БАТЭ вярнуў абаронцу з арэнды^[6]. У 2024 годзе замацаваўся ў складзе барысаўчанаў, а ў пачатку 2025 году склаў новае працоўнае пагадненьне з клюбам^[7][8].

Міжнародная

У кастрычніку 2019 году гуляў за зборную Беларусі (да 19 гадоў) у кваліфікацыі чэмпіянату Эўропы. 4 верасьня 2020 году дэбютаваў у зборнай Беларусі (да 21 году), адгуляўшы першы тайм адборачнага матча чэмпіянату Эўропы супраць зборнай Нідэрляндаў (0:7).

Дасягненні

• Чэмпіён Беларусі: 2020, 2021
• Бронзавы прызэр чэмпіянату Беларусі: 2022
• Уладальнік Кубка Беларусі: 2019
• Уладальнік Супэркубка Беларусі: 2021