Друкарня (Мураваная Ашмянка)

Друкарня — помнік архітэктуры канца XVI — XIX стагодзьдзяў у Мураванай Ашмянцы. Знаходзіцца за 1 км на паўднёвы заход ад колішняга мястэчка, на беразе ракі Ашмянкі. Твор архітэктуры раньняга барока і клясыцызму.

Помнік грамадзянскай архітэктуры
Друкарня
Краіна	Беларусь
Вёска	Мураваная Ашмянка
Каардынаты	54°27′09.11″ пн. ш. 25°46′49.33″ у. д.
Архітэктурны стыль	клясыцызм
Друкарня на мапе Беларусі Друкарня

Гісторыя

Вялікае Княства Літоўскае

Мураваны будынак друкарні збудавалі ў канцы XVI ст. Яе заснаваў стольнік Мікалай Дарагастайскі. Друкарня дасягнула росквіту ў XVII ст., калі належала сыну Мікалая Крыштапу. Сярод выдадзеных тут кніг «Гіпіка» К. Дарагастайскага, «Цэнзура» В. Салінарыуса (1615 год).

Пад уладай Расейскай імпэрыі

У сярэдзіне XІX ст. будынак друкарні перабудавалі пад палац. У XІX — пачатку XX стагодзьдзя сфармавалася алея, якая вяла да палаца. Таксама тут збудавалі прыдарожную капліцу. У літаратуры ёсьць зьвесткі, што ў памяць пра будаваньне сядзібы каля яе ўваходу ўмуравалі камень з датамі «1590—1843 гады».

Апісаньне

Помнік архітэктуры раньняга барока. Гэта будынак з буйнапамернай цэглы (32 × 16 × 7 см), ад якога часткова захаваліся сутарэньні, цокаль і сьцены верхняга паверху. Сутарэньні мелі цыліндрычныя скляпеньні, цокаль — крыжовыя. Пры перабудове пад палац узьвялі верхні паверх у стылі клясыцызму, аркавыя вокны цокалю заклалі, сьцены абводам рытмічна прарэзалі прастакутнымі аконнымі праёмамі^[1].