Жаночая зборная Італіі па баскетболе

Жаночая зборная Італіі па баскетболе — нацыянальная каманда, якая прадстаўляе Італію на міжнародных баскетбольных турнірах. Кіруецца Італьянскай баскетбольнай фэдэрацыяй.

Італія Nazionale femminile di pallacanestro dell'Italia
Асноўныя зьвесткі
Рэйтынг ФІБА	16 (9 лютага 2025)
Чалец ФІБА з	1932
Рэгіён ФІБА	Эўропа
Фэдэрацыя	Італьянская баскетбольная фэдэрацыя
Трэнэр	Marco Crespi
Алімпійскія гульні
Удзелаў	3
Мэдалёў	0
Чэмпіянаты сьвету
Удзелаў	5
Мэдалёў	0
Чэмпіянаты Эўропы
Удзелаў	35
Мэдалёў	Золата: (1938) Срэбра: (1995) Бронза: (1974, 2025)
Форма
Сьветлая Цёмная
Спасылкі
Вэб-старонка
(абнаўленьне: 29 чэрвеня 2025)

Гісторыя

Зборная Італіі дэбютавала на міжнароднай арэне на першым чэмпіянаце Эўропы 1938 году на родным паркеце ў Рыме, дзе каманда адразу ж здабыла залатыя мэдалі. Пры гэтым цягам турніру італьянкі перамаглі зборныя Францыі, Польшчы і Швайцарыі, але саступілі баскетбалісткам зборнай Летувы. Галоўным трэнэрам той каманды быў Сыльвіё Лёнгі. Гэта быў першы і адзіны эўрапейскі чэмпіянат да Другой сусьветнай вайны. Узнавіліся турніры ў 1950 годзе. На ім баскетбалісткі выйшлі з сваёй групы, але ў фінальным раўндзе занялі толькі 5-е месца, тройчы саступіўшы сваім суперніцам. Асабліва цяжкой была параза ад зборнай СССР, бо матч скончыўся зь лікам 65:16.

Зборная Італіі ў 1948 годзе.

У 1950-я і 1960-я італьянскія спартоўкі зазвычай бралі ўдзел у кожным чэмпіянаце Эўропы, прапусьціўшы толькі турнір 1958 году ў Польшчы, але заўжды саступалі зборным Усходняга блёку, як то зборным Баўгарыі, Вугоршчыны, Польшчы, СССР і Чэхаславаччыны. Вышэй за шостае месца каманда не ўзьнімалася. Нават на хатнім чэмпіянаце Эўропы 1968 году, які ладзіўся ў гарадах Сыцыліі, італьянскія баскетбалісткі адразу трапілі ў фінальны турнір, дзе зазналі чатыры паразы ад зборных НДР, Польшчы, Баўгарыі і СССР. На чэмпіянаце Эўропы 1972 году зборная нават фінішавала толькі на 10-м радку. Наступны посьпех зборнай адбыўся ў чарговым хатнім чэмпіянаце Эўропы 1974 году, дзе італьянкі здабылі бронзавыя мэдалі. Сытуацыя ня выправілася ў другой палове 1970-х і 1980-х гадах, то бок зборная брала ўдзел у кожным Эўрабаскеце, але не ўзьнімалася вышэй за 5-е месца. На хатнім чэмпіянце Эўропы 1993 году зборная нечакана стала першай у сваёй групе, перагуляўшы ўсіх пяцёх сваіх суперніц. На другім этапе каманда таксама працягнула перамагаць, адолеўшы зборныя Баўгарыі, Польшчы і Гішпаніі. У паўфінале італьянкі саступілі зборнай Францыі, а матчы за бронзу зазнала паразу ад зборнай Славаччыны. У Брно ў 1995 годзе італьянская каманда пад кіраўніцтвам Рыкарда Салеса заняла другое месца, прагуляўшы ў фінале зборнай Украіны зь лікам 66:77.

29 чэрвеня 2025 году, праз трыццаць гадоў, зборная Італіі вярнулася на п’едэстал на чэмпіянаце Эўропы, здабыўшы бронзавыя мэдалі ў матчы супраць зборнай Францыі^[1].