Жаночая зборная Гішпаніі па баскетболе

Жаночая зборная Гішпаніі згуляла свой першы афіцыйны матч у Мальграт-дэ-Мар супраць зборнай Швайцарыі 16 чэрвеня 1963 году, атрымаўшы паразу зь лікам 31:40^[1]. Праз два дні яны выйгралі свой першы матч супраць той жа каманды зь лікам 47:39. Спатрэбілася шэсьць гадоў, каб згуляць яшчэ адзін міжнародны таварыскі матч, гэтым разам гішпанкі зазналі паразу ад зборнай Кубы зь лікам 50:70 28 верасьня 1969 году^[1].

Першыя афіцыйныя гульні былі згуляныя ў сакавіку 1970 году, калі спартоўкі спрабавалі кваліфікавацца на чэмпіянат Эўропы 1970 году. Баскетбалісткі здабылі перамогу ў матчы супраць зборнай Швайцарыі зь лікам 61:44, але саступілі зборным Вугоршчыны і Францыі. Каманда адабралася на свой першы буйны міжнародны турнір у наступнай спробе, згуляўшы на чэмпіянаце Эўропы 1974 году. Пасьля паразаў у трох гульнях групавога этапу яны выгулялі ў сваім першым матчы на фінальным турніры супраць зборнай Даніі, заняўшы 12-е месца. Роза Кастыльля ўважалася найлепшай гульчыхай краіны зь сярэдзіны 1970-х да сярэдзіны 1980-х гадоў. Да 1985 году Гішпанія брала ўдзел у большасьці розыгрышаў Эўрабаскету, звычайна фінішуючы ля 10-га месца. Важным годам дзеля разьвіцьця каманды стаўся шосты радок на хатнім турніры чэмпіянату Эўропы 1987 году. У 1988 годзе каманда ўпершыню згуляла ў кваліфікацыі на летнія Алімпійскія гульні, але не дала рады. Тым ня менш, з улікам таго, што летнія Алімпійскія гульні 1992 году ладзіліся ў Барсэлёне, мясцовая зборная аўтаматычна атрымала месца ў турніры, фінішаваўшы на пятым радку.

Пасьля таго, як гішпанкі ня здолелі адабрацца на два папярэднія Эўрабаскеты і аніколі не гулялі ў плэй-оф на буйных турнірах, залаты мэдаль на чэмпіянаце Эўропы 1993 году стаў нечаканасьцю, бо ў паўфінале каманда выгуляла нядаўна сфармаваную зборную Славаччыны зь лікам 73:55, а ў фінале пірэнэйкі былі мацнейшыя за зборную Францыі, абгуляўшы іх зь лікам 63:53. Ключавой баскетбалісткай той зборнай была Блянка Арэс, якая зьбірала блізу 19 пунктаў за гульню. У дадатак, у той час праз палітычныя пераўтварэньні зьніклі да таго дамінуючыя зборныя Югаславіі, Чэхаславаччыны і асабліва СССР. Перамога на эўрапейскім турніры надала Гішаніі права ўпершыню ўзяць удзел на чэмпіянаце сьвету 1994 году, дзе спартоўкі былі восьмымі. З таго часу каманда набыла статус сталага ўдзельніка турніру. З 2001 па 2009 гады зборная ўвайшла ў цыкль, здабыўшы пяць мэдалёў запар на чэмпіянатах Эўропы, але золата ім бракавала. Некалькі разоў тая каманда трапляла ў чвэрцьфіналы летніх Алімпійскіх гульняў ды чэмпіянатаў сьвету, а трыюмфу дасягнула на чэмпіянаце сьвету 2010 году. З моманту свайго дэбюту ў 1995 годзе да завяршэньня кар’еры ў 2013 годзе нападніца Амая Вальдэмора сталася лідэркай гішпанскай дружыны, узяўшы ўдзел у 13 буйных турнірах і здабыўшы 7 мэдалёў.

Параза ад зборнай Харватыі 26 чэрвеня ў Катавіцах на другім этапе чэмпіянату Эўропы 2011 году і наступная адсутнасьць на летніх Алімпійскіх гульнях 2012 году называлася сярод шэрагу каталізатараў залатога часу зь сямі запар камплектамі мэдалёў за часам трэнэра Люкаса Мандэлё^[2]. Гішпанкі выйгралі чэмпіянат Эўропы 2013 году, пасьля чаго здабылі срэбра на чэмпіянаце сьвету 2014 году, бронзу на чэмпіянаце Эўропы 2015 году, срэбра на летніх Алімпійскіх гульнях 2016 году і зноў золата на чэмпіянаце Эўропы 2017 году. Зборная таксама атрымала бронзавыя мэдалі чэмпіянату сьвету 2018 году, які ладзіўся ў Гішпаніі. У ліпені 2019 году каманда пасьпяхова абараніла свой эўрапейскі тытул, абгуляўшы зборную Францыі зь лікам 86:66 у фінале Эўрабаскету 2019 году. Гэты ўдалы шэраг турніраў быў спынены ўлетку 2021 году, калі каманда заняла 7-е месца на чэмпіянаце Эўропы 2021 году ды 6-е месца на летніх Алімпійскіх гульнях 2020 году. Тым ня менш, зборная трымалася на другім радку сусьветнага рэйтынгу ФІБА. На чэмпіянатах Эўропы 2023 і 2025 гадоў гішпанскія баскетбалісткі выходзілі ў фінал, дзе абодва разы яны саступалі зборнай Бэльгіі. Паміж гэтымі турнірамі на летніх Алімпійскіх гульнях 2024 году гішпанкі прабіліся ў плэй-оф турніру, дзе таксама саступілі бэльгійкам, але яшчэ на стадыі чвэрцьфіналу.

Жаночая зборная Гішпаніі па баскетболе

Гісторыя

Крыніцы

Вонкавыя спасылкі

Wikiwand - on