Марцыян Міхал Агінскі

Марцыян Міхал Агінскі (1672 — 1 красавіка^[3], паводле іншых зьвестак 29 кастрычніка^[4][5] 1750) — дзяржаўны і вайсковы дзяяч Вялікага Княства Літоўскага. Мечнік вялікі літоўскі (1695—1703), кашталян (1703—1730) і ваявода віцебскі (з 1730). Трымаў Барысаўскае, Прывальскае і Вярбоўскае староствы.

Марцыян Міхал Агінскі

Герб «Агінскі»
Асабістыя зьвесткі
Нарадзіўся	1672 Віцебск, Вялікае Княства Літоўскае
Памёр	1 красавіка 1750 Віцебскі павет, Віцебскае ваяводзтва, Вялікае Княства Літоўскае[1]
Пахаваны	Віцебск[1]
Род	Агінскія[2]
Бацькі	Шыман Караль Агінскі Тэадора Корсак
Жонка	Тэрэза з Бжастоўскіх Тэрэза з Тызэнгаўзаў
Дзеці	Тадэвуш Францішак, Ігнаці, Станіслаў Юры, Марцыяна, Бэнэдыкта

Марцыян Міхал Агінскі — патрон-заснавальнік Менскага езуіцкага калегіюму.

Біяграфія

Са старэйшай княскай лініі роду Агінскіх, сын Шымана Караля і Тэадоры з Корсакаў. Стрыечны брат Казімера Дамініка Агінскага.

У 1718 годзе атрымаў Барысаўскае староства ад удавы Канстанцыі (з роду Падбярэскіх), двойчы саступаючы яго свайму старэйшаму сыну Ігнацыю Агінскаму, да якога староства канчаткова перайшло ў 1744 годзе^[6].

Удзельнік апазыцыі ў 1720—1730-х гадох, маршалак Генэральнай канфэдэрацыі правінцыі ВКЛ. Абапіраўся на зьвязкі з расейскім дваром.

Пабраўся шлюбам з Тэрэзай Бжастоўскай (1701), зь якой меў 5 сыноў і 3 дачок. У другім шлюбе з Тэрэзай Тызэнгаўз меў 2 дачок^[4].

Памёр у 1750 годзе. Даты сьмерці розьняцца ад 1 красавіка да 29 кастрычніка. Пахавальныя ўрачыстасьці ў Віцебскім касьцёле езуітаў адбыліся 14—17 лютага 1751 году^[7].

Нашчадкі:

• Тадэвуш Францішак Агінскі (1711—1783)
• Ігнаці Агінскі (каля 1698 — 1775)
• Станіслаў Юры Агінскі (1710—1748)
• Марцыяна Агінская (1713—1766), пабралася шлюбам у 1723 з валыныскім ваяводай Міхалам Патоцкім
• Бэнэдыкта Агінская (памерла ў 1748), пабралася шлюбам у 1736 зь Юзэфам Скумінам Тышкевічам

Спэктакль

Першы тэатральны спэктакль у Менску — «Трыюмфальная брама» — быў пастаўлены ў гонар Марцыяна Міхала Агінскага^[8].