Опса (возера)

О́пса — возера ў Беларусі, у басэйне ракі Акунёўкі. Знаходзіцца ў Браслаўскім раёне Віцебскай вобласьці, за 16 кілямэтраў на паўднёвы захад ад места Браслава. Плошча паверхні возера 0,93 км². Даўжыня 3 км, найбольшая шырыня 580 м. Найбольшая глыбіня дасягае 20,2 м, сярэдняя складае 6, 1 м. Аб’ём вады 5,66 млн м³. Даўжыня берагавой лініі 7,8 км.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Опса (неадназначнасьць).

Возера Опса Панарама Опсы Возера Опса Краіна Беларусь Плошча 0,93 км² Плошча вадазбору 3,17 км² Максымальная глыбіня 20,2 м Сярэдняя глыбіня 6,1 м Празрыстасьць да 1,3 м Найбольшая даўжыня 3 км Найбольшая шырыня 0,580 км Даўжыня берагавой лініі 7,8 км Вышыня над узроўнем мора 154 м Аб’ём вады 0,00566 км³ Каардынаты 55°33′01″ пн. ш. 26°49′20″ у. д. Опса на мапе Беларусі Опса

Галерэя здымкаў у Вікісховішчы

На ўсходнім беразе возера стаіць гістарычнае мястэчка Опса.

Апісаньне

Катлавіна лагчыннага тыпу падзяляецца на 2 плёсы. Схілы вышынёй 15—18 мэтраў, у верхняй частцы разараныя. Шмат затокаў. Берагі вышынёй да 1 м, стромкія, пад хмызьняком, на поўдні нізкія, забалочаныя. Выспа 0,1 га. Дно на глыбіні 1,5—3 мэтру пясковае, да 8—10 м глеістае, ніжэй сапрапэлевае.

Возера эўтрофнае, слабапраточнае. Упадае канал і выцякае ручай у возера Пагошчу. Зарастае да глыбіні 2,5 м. Прыбярэжная расьліннасьць пашыраецца ў паласе ад 10—15 да 30 мэтраў^[1].

Каля возера вёскі Якавічы і Янулі. Праходзіць аўтамабільная дарога Р27 (Браслаў — Відзы — Паставы — Мядзел).

Флёра і фаўна

У возеры водзяцца шчупак, лешч, карп, язь, плотка, карась, акунь, лінь ды іншыя віды рыбаў.