Пажар на курорце Карталкая (2025)

21 студзеня 2025 году ў гатэлі Grand Kartal на гарналыжным курорце Карталкая ў турэцкай правінцыі Балу адбыўся пажар. Агулам 76 чалавек загінулі, яшчэ 51 быў паранены^[1][2][3].

Перадгісторыя

Карталкая  — гарналыжны курорт у турэцкай правінцыі (глеі) Балу^[4]. Знаходзіцца ў гарах на вышыні 2200 мэтраў над узроўнем мора^[5]. Пажар адбыўся ў 12-павярховым (паводле іншых зьвестак  — 11-павярховым) гатэлі Grand Kartal^[6], фасад якога пакрыты дрэвам^[4]. У гэты момант там адпачывалі 238 чалавек пры агульным нумарным фондзе ў 161^[7]. Катастрофа прыйшлася на школьных канікулах, калі многія семʼі зь дзецьмі з Стамбулу і Анкары едуць у Балу на горныя курорты^[8].

Пажар

Пажар пачаўся каля 3:27 TRT (UTC+3). Паводле папярэдніх зьвестак, узгараньне адбылося ў рэстараннай зоне на чацьвертым паверсе, а затым распаўсюдзілася на верхнія паверхі^[9][10]. На месца былі накіраваныя каля 267 супрацоўнікаў экстранных службаў^[9], 30 пажарных машын і 28 карэт хуткай дапамогі. Губэрнатар правінцыі Балу Абдулазіз Айдын заявіў, што ратавальнікі прыбылі толькі каля 4:15^[7]. Затрымка ўзьнікла з-за аддаленасьці гатэля ад горада Балу і марознага надворʼя^[10]. Разьмяшчэньне будынка на схіле скалы таксама нэгатыўна адбілася на намаганьнях па тушэньні^[7]. У якасьці меры засьцярогі быў таксама эвакуіраваны суседні гатэль^[10]. Апэрацыя па тушэньні працягвалася 12 гадзін^[11].

Некаторыя людзі спрабавалі пакінуць будынак з вокнаў па вяроўках, зробленым з пасьцельнай бялізны^[6]. Па словах відавочцаў, ні сыстэма выяўленьня пажару, ні пажарная сыгналізацыя не спрацавалі, і гасьцям давялося прабірацца па задымленых калідорах у поўнай цемры^[12]. Выжылы паскардзіўся на адсутнасьць якіх-небудзь мер бясьпекі, такіх як пажарныя лесьвіцы або датчыкі дыму^[13].

Ахвяры

У выніку пажару загінулі прынамсі 76 чалавек, у тым ліку двое, якія ў спробе выратавацца выскачылі з вокнаў. Яшчэ 51 чалавек быў паранены, адзін у цяжкім стане^[7][6]. Большасьць сьмерцяў, верагодна, былі выкліканыя ўдушшам^[14].

Рэакцыя

Прэзыдэнт Турэччыны Рэджэп Таіп Эрдаган заявіў, што для каардынацыі неабходных работ на месца накіраваныя міністры ўнутраных спраў, аховы здароўя, працы і сацыяльнага забесьпячэньня, культуры і турызму. Расьсьледаваньне прычын катастрофы даручана групе з шэсьць пракурораў і экспэртнай камісіі зь пяці чалавек^[15]. Міністар турызму Мехмет Нуры Эрсой заявіў, што пажарная служба не выявіла сурʼёзных праблем у дачыненьні да пажарнай бясьпекі ў гатэлі падчас праверак у 2021 і 2024 гадах^[7].

Эрдаган абвясьціў сераду, 22 студзеня, Днём нацыянальнай жалобы^[7]. Дзень жалобы таксама быў абвешчаны на Паўночным Кіпры^[16].

Свае спачуваньні накіравалі Эўрапейскі Зьвяз^[17], Азэрбайджан^[18], Пакістан^[19], Грэцыя^[20], Аб’яднаныя Арабскія Эміраты^[21], Ярданія^[22], Кувэйт^[23], Украіна^[23], Армэнія^[24], Катар^[25], Іран^[26], Сэрбія^[27], Нямеччына^[28], Расея^[28], Босьнія і Герцагавіна^[29], Косава^[29], Грузія^[29], Этыёпія^[29], Самалі^[29], Эгіпет^[30], Бахрэйн^[31] і Узбэкістан^[32].