Саломенка (Магілёўская вобласьць)

Сало́менка^[1] (Sałomienka) — вёска ў Сычкаўскім сельсавеце Бабруйскага раёну. Знаходзіцца за 7 км ад чыгуначнае станцыі Мірадзіна на лініі Бабруйск — Менск, за 12 км на паўночны захад ад Бабруйску каля шашы Бабруйск — Менск, за 122 км ад Магілёва.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Саломенка.

Саломенка
Вобласьць:	Магілёўская
Раён:	Бабруйскі
Сельсавет:	Сычкаўскі
Насельніцтва:	33 (2007)
Колькасьць двароў:	23
Паштовы індэкс:	213847
Геаграфічныя каардынаты:	53°14′8″ пн. ш. 29°6′10″ у. д.
Саломенка на мапе Беларусі Саломенка

Гісторыя

У 18 ст. паселішча ў Рэчыцкім павеце Менскага ваяводзтва Вялікага Княства Літоўскага, у 1793 захоплена Расеяй пасьля Другога падзелу Рэчы Паспалітай. У 1797 вёска Салома ў Бабруйскім павеце Менскае губэрні, уласнасьць Дамініка Радзівіла, 62 жыхары мужчынскага полу. У 1897 — казённая варта пры былым менскім паштовым тракце ў Гарбацэвіцкай воласьці Бабруйскага павету. У 1907 — 2 двары. У 1916 урочышча (1 двор і 7 жыхароў) і казённая варта (1 двор і 6 жыхароў).

У 1926 — вёска, 50 двароў, 267 жыхароў. У 1934 створаны калгас «Чырвоны сьцяг», мелася кузьня. У нямецка-савецкай вайне 37 вяскоўцаў загінулі на фронце. У 1959 158 жыхароў, у 1970 — 160. У 1986 44 гаспадаркі, 100 жыхароў, сама вёска ў складзе цяплічнага саўгасу-камбінату «Бабруйскі».

Пляніроўка

Вёска ўяўляе сабой прамалінейную вуліцу арыентаваную з паўднёвага захаду на паўночны ўсход з двухбаковай драўлянай забудовай сядзібнага тыпу. На паўднёвым захадзе й паўночным усходзе вёска мяжуе зь лесам.