Mein Land

«Mein Land» ([ˈmaɪ̯n ˈlant], зь ням. — «Мая краіна»^{[К 1]}) — дваццаць чацьвёрты самотнік^[a] нямецкага NDH-гурта Rammstein. Ён быў выдадзены як першы самотнік са складанкі гурта Made in Germany 1995—2011^[8] 11 лістапада 2011 году ў Аўстрыі, Нямеччыне й Швайцарыі; ва ўсім сьвеце — 14 лістапада^[9].

«Mein Land»
Самотнік Rammstein з альбому Made in Germany 1995—2011
Выдадзены	11 лістапада 2011[1]
Жанры	поп-рок[2] мэтал[3] электронная музыка[4]
Лэйбл	Universal Music Group[5]
Фармат	пласьцінка CD стрымінг спампаваньне музыкі
Працягласьць	3:53
Прадусары	Rammstein і Якаб Гэльнар[5]
Мова	нямецкая
Кампазытары	Rammstein[5]
Храналёгія самотнікаў Rammstein
«Waidmanns Heil / Liebe ist für alle da» (2011) «Mein Land» (2011) «Mein Herz brennt» (2012)
Відэакліп
Відэа на YouTube

Апісаньне

Тэкст валодае правакацыйным патэнцыялам, мы гэта ўсьведамляем. Мы вельмі доўга абмяркоўвалі гэты тэкст <…> Зноў і зноў узьнікалі спрэчкі, ці можна яго няправільна зразумець, бо ён дапускае … шмат інтэрпрэтацыяў.

— Крыстаф Шнайдэр, Official Making Off^[10].

Паводле гітарыста Рыхарда Круспэ, першы накід тэксту песьні зьявіўся пасьля таго, як сьпявак Тыль Ліндэман займаўся сэрфінгам на амэрыканскім пляжы, і празь неўстаноўленыя прычыны, трапіў у непрыемнасьці зь мясцовымі «лідарамі»^[11]. Паўль Ляндэрс пракамэнтаваў песьню наступным чынам:

Я бачу гэта абсалютна абстрактна: ёсьць чалавек, у якога няма пашпарта <…> і ён прызямляецца дзесьці на Зямлі <…> і ён спрабуе ўвайсьці ў наш сьвет, і яго ніхто не ўпускае. Ён стукаецца ў кожную краіну, і ніхто ня кажа: «заходзь», але ўсе кажуць: «Гэта мая краіна» [Das ist mein Land].

— Паўль Ляндэрс, Official Making Off^[10].

Гісторыя рэлізу

Даты рэлізу для «Mein Land»

Рэґіён(ы)	Дата	Фармат	Лэйбл	Кр.
аўт  ням  шва	11 ліст. 2011	вініл CD лічбавы распаўсюд	Universal	[1][9]
Сьвет	14 ліст. 2011

Відэакліп

Відэакліп для песьні «Mein Land» быў зьняты 23 траўня 2011 году Юнасам Окерлюндам на ўзьбярэжжы Лос-Анджэлесу, Каліфорнія^[12]. Гэта ўжо чацьвёрты кліп, зьняты гэтым рэжысэрам. Прэмʼера кліпу адбылася 11 лістапада на афіцыйным сайце гурта^[13][14], працягласьць кліпу — 4 хвіліны 24 сэкунды^[12].

У пачатку кліп прадстаўлены як фільм 1960—1970-х гадоў^[15], зь нязграбнымі спэцэфэктамі. Дзеяньне кліпу адбываецца нібыта ў 1964 годзе, гурт удзельнічае пляжнай вечарынцы, у стылістыцы таго часу.

У канцы кліпу паказваецца ўжо 2011 год: той жа самы пляж, аднак паказаная сучасная пляжная вечарынка й канцэрт Rammstein зь іхнымі сучаснымі спэцэфэктамі (іскры, агнямёты й выбухі)^[15][16]. Удзельнікі гурта размаляваныя корпспэйнтам.

19 лістапада 2011 году гурт выпусьціў вэрсію кліпу «за сцэнай» працягласьцю 30 хвілінаў^[17].

Водгукі

Крысьціна Хофман з Die Welt піша, што «новае відэа <…> даволі выразна палітычна чытаецца як крытыка культурнай гегемоніі ЗША. На фоне сьветлага й сонечнага Rammstein стварае цяжкае, суровае й змрочнае, менавіта нямецкае»^[18].

Узнагароды

2 студзеня Rammstein былі абвешчаныя пераможцамі прэміі «Відэа году 2011» ад Loudwire Music Awards за кліп на «Mein Land»^[19][20]. Іншымі намінантамі былі «Walk» ад Foo Fighters, «Locust» ад Machine Head, «Curl of the Burl» ад Mastodon і «Public Enemy No. 1» ад Megadeth^[21][22].

Сьпіс кампазыцыяў

Аўтарамі тэкстаў песьняў і музыкі зьяўляюцца Rammstein.

CD^[23][24]

№	Назва
1.	«Mein Land» (Мая краіна)	03:53
2.	«Vergiss uns nicht» (Не забывайся на нас)	04:10
3.	«My Country (The BossHoss)» (Мая краіна)	04:08
4.	«Mein Land (Mogwai Mix)»	04:30

Вініл^[23]

№	Назва
1.	«Mein Land» (Мая краіна)	03:53
2.	«Vergiss uns nicht» (Не забывайся на нас)	04:10

Чарты

Найвышэйшыя пазыцыі ў чартах
АЎТ	9[25]
БЭЛ	28 (Фляндрыя)[26]
НІД	88[27]
НЯМ	5[28]
ФІН	14[29]
ШВА	21[30]
ВЯЛ · The Official Charts Company (OCC)
Rock & Metal	10[31]

Заўвагі

Асноўныя

1. У Apple Music самотнік названы «міні-альбомам-самотнікам»^[3].

Камэнтары

1. Слова das Land можа перакладацца на беларускую мову як «краіна», «край» для назоўніка Land з множным лікам die Länder і як «зямля», «глеба», «суша» для слова Land, якое ня мае множнага ліку^[6]. Зразумець які варыянт быў выкарыстаны ў назьве песьні можна толькі па назьве ангельскамоўнага рэміксу «My Country», у якім слова country перакладаецца ў першую чаргу як «краіна»^[7].