Ковэнтры Сіці

«Ковэнтры Сіці» (па-ангельску: Coventry City F.C.) — ангельскі футбольны клюб з гораду Ковэнтры. Клюб атрымаў мянушку «Нябесна-блакітныя» праз клюбныя колераў, якія займалі важнае месца цягам усёй гісторыі, а кашулі з такім колерам бесьперапынна выкарыстоўваюцца з 1962 году^[1]. У прамежак з 1967 па 2001 гады, то бок 34 сэзоны запар, «Ковэнтры» спаборнічаў у найвышэйшым дывізіёне, а ў 1992 годзе клюб стаў адным зь сябраў-сузаснавальнікаў Прэм’ер-лігі.

Ковэнтры Сіці
Поўная назва	па-ангельску: Coventry City Football Club
Заснаваны	13 жніўня 1883
Горад	Ковэнтры, Ангельшчына
Стадыён	Рыка-арэна Умяшчальнасьць: 32 609
Галоўны трэнэр	Фрэнк Лэмпард
Чэмпіянат	Футбольная ліга
· 2024—2025	5 месца
Галерэя здымкаў у Вікісховішчы ccfc.co.uk (анг.)

Гісторыя

Каманда «Сынгерз» сэзону 1985—1986 гадоў.

«Ковэнтры Сіці» быў заснаваны ў 1883 годзе як футбольны клюб «Сынгерз» пасьля сустрэчы Ўільяма Стэнлі і сямі калегаў з кампаніі «Сынгер Сайкл» у гатэлі Лорд Эйлзфард Ін у Гілфілдсе. Гэта быў адзін зь некалькіх клюбаў XIX стагодзьдзя, павязаных з роварнымі фабрыкамі Ковэнтры, а заснавальнік кампаніі Джордж Сынгер быў прызначаны першым прэзыдэнтам^[2]. У 1884 годзе «Сынгерз» далучыўся да Футбольнай асацыяцыі акругі Бірмінггэму. У першыя сэзоны ў іх не было сталага складу футбалістаў, а часам і абсталяваньня, напрыклад, сеткі на браму. «Сынгерз» сталі прафэсіяналамі ў 1892 годзе і ў 1894 годзе далучыліся да Бірмінггэмскай і акруговай лігі, спаборнічаючы з моцнымі рэзэрвовымі камандамі рэгіёну, як то з «Астан Вілай». Жыхары Ковэнтры, не павязаныя з роварнай кампаніяй, пачалі заўзець за клюб, і ў 1898 годзе ён быў перайменаваны ў «Ковэнтры Сіці». Гайфілд-Роўд адкрыўся ў 1899 годзе, але ягонае будаўніцтва выклікала фінансавы крызіс і наступныя спрэчкі з гульцамі аб заробках. Клюб стаў таварыствам з абмежаванай адказнасьцю ў ліпені 1907 году, а ў наступным сэзоне каманда дасягнула пэўнага посьпеху, упершыню дакрочыўшы да першага раўнду Кубка Ангельшчыны, перш чым дружына была выбітая «Крыстал Пэлас»^[3][4]. У 1908 годзе «Ковэнтры» далучыўся да Паўднёвай лігі, якая на той час была трэцім паводле моцы ангельскім дывізіёнам.

У 1919 годзе «Ковэнтры Сіці» пасьпяхова надаў заяўку на ўступ у Футбольную лігу, у выніку чаго клюб запрасілі ў Другі дывізіён на сэзон 1919—1920 гадоў. Рыхтуючыся да старту ў лізе, клюб інвэставаў у новых гульцоў і павялічыў умяшчальнасьць Гайфілд-Роўду да 40 тысяч чалавек. 1920-я гады былі няўдалымі, у 1928 годзе заўзятары нават ушчалі беспарадкі, спрабуючы дамагчыся ліквідацыі клюбу. У тым жа годзе была зафіксаваная найгоршая наведвальнасьць клюбу ў гісторыі, гэтак на матчы супраць «Крыстал Пэлас» былі прысутныя толькі 2059 гледачоў^[5]. Акрамя дрэннай гульні на полі, да канца 1920-х гадоў клюб сутыкнуўся зь фінансавымі цяжкасьцямі, бо быў вымушаны спадзявацца на збор сродкаў ад заўзятараў і грашовыя ўліваньні ад Дэйвіда Кука, які стаў прэзыдэнтам клюбу. Наступнае дзесяцігодзьдзе было больш пасьпяховым. Прызначэньне Дэрыка Робінза старшынём у 1958 годзе і Джымі Гіла трэнэрам у 1961 годзе паклала пачатак «блакітнай рэвалюцыі» ў клюбе^[6]. Гіл зьмяніў колер і мянушку формы клюбу, прасунуў песьню «Блакітнае неба» ў якасьці гімну ды распрацаваў перадматчавую забаўляльную праграму^[7]. Атрымаўшы грашовую падтрымку ад Робінза, Гіл прывёў «Ковэнтры» да перамог у Трэцім і Другім дывізіёнах у 1964 і 1967 гадах адпаведна, упершыню прасунуўшыся ў найвышэйшы дывізіён.