Ляік Рэмі

Ляік Рэмі (па-француску: Loïc Rémy; нар. 2 студзеня 1987 году, Рыё-ля-Пап, Францыя) — колішні францускі футбаліст, нападнік. Былы гулец нацыянальнай зборнай Францыі.

Ляік Рэмі
Пэрсанальная інфармацыя
Нарадзіўся	2 студзеня 1987(1987-01-02)[1][2][3] (38 гадоў) Рыё-ля-Пап[d][4]
Рост	185 см
Вага	75 кг
Пазыцыя	нападнік
Клюбы
Гады	Клюб	Гульні (галы)¹
2006—2008	Алімпік Ліён	12 (0)
2008	→ Лянс	10 (3)
2008—2010	Ніцца	68 (26)
2010—2012	Алімпік Марсэль	68 (27)
2013—2014	Кўінз Парк Рэйнджарз	16 (6)
2013—2014	→ Ньюкасл Юнайтэд	26 (14)
2014—2017	Чэлсі	32 (8)
2016—2017	→ Крыстал Пэлас	5 (0)
2017—2018	Ляс-Пальмас	12 (5)
2018	→ Хэтафэ	11 (3)
2018—2020	Ліль	46 (14)
2020—2022	Рызэспор	27 (7)
2022	Адана Дэмірспор	2 (0)
2023	Брэст	0 (0)
Зборныя
2009—2014	Францыя	31 (7)

Кар’ера

Клюбная

Рэмі пачаў сваю кар’еру ў моладзевай камандзе «АСПТТ Ліён»^[5]. Там яго знайшлі скаўты клюбу «Ліён», якія запрасілі маладога футбаліста да сябе. Пасьля некалькіх гадоў у акадэміі клюбу 11 кастрычніка 2006 году Рэмі падпісаў свой ​​першы прафэсійны кантракт тэрмінам на 3 гады. Праз 3 дні, 14 кастрычніка, дэбютаваў у асноўным складзе каманды ў матчы супраць «Сэнт-Эт’ену», замяніўшы на 73 хвіліне Сыльвэна Вільтора. У 2008 годзе ня маючы дастатковай гульнявой практыкі Ляік на правах арэнды перайшоў у склад клюбу «Лянс».

5 чэрвеня 2008 году Рэмі перайшоў у табар «Ніццы». Сума трансфэру склала 8 млн эўра, стаўшы найбуйнейшай у гісторыі клюбу^[6]. Гулец дэбютаваў у складзе новай каманды 9 жніўня ў матчы супраць «Гаўру», у якім ягоная каманда трывала паразу зь лікам 0:1. У наступных 6 гульнях Рэмі забіў 6 галоў, у лік якіх увайшоў мяч у браму свайго былога клюбу, «Ліёну». Надалей Ляік паказваў выдатную гульню, дзякуючы чаму быў запрошаны ў «Марсэль». Сума трансфэру не была адкрытая, аднак, паводле некаторых зьвестак, яна ацэньваецца ў 15 млн эўра^[7].

13 студзеня Рэмі афіцыйна далучыўся да складу ангельскага клюбу «Кўінз Парк Рэйнджарз», які на той час імкнуўся захаваць месца ў Прэм’ер-лізе, аднак паводле вынікаў сэзону клюб вылецеў у дывізіён ніжэй. 5 жніўня гулец на правах арэнды перайшоў у клюб «Ньюкасл Юнайтэд». Пасьля цудоўных выступаў за «Ньюкасл» у 2014 годзе гулец вярнуўся ў «Кўінз Парк Рэйнджарз», які зноўку трапіў у Прэм’ер-лігу, аднак у хуткім часе перайшоў у «Чэлсі». У лёнданскім клюбе Ляік звычайна выходзіць на замену Дыега Коста ў канцы матчу.

Міжнародная

24 сакавіка 2008 году з-за траўмы Т’еры Анры Рэмі ўпершыню быў выкліканы ў склад зборнай Францыі на таварыскія гульні супраць зборнай Ангельшчыны і Малі. Рэмі выйшаў на поле ў матчы супраць зборнай Малі, замяніўшы на 54-й хвіліне сустрэчы Саміра Насры. 9 кастрычніка 2010 году Ляік забіў першы мяч за зборную, паразіўшы браму зборнай Румыніі ў адборачным раўндзе да чэмпіянату Эўропы 2012 году.

Дасягненьні

«Ліён»:

• Чэмпіён Францыі: 2007, 2008
• Уладальнік Супэркубка Францыі: 2007

«Марсэль»:

• Уладальнік Кубка францускай лігі: 2011, 2012
• Уладальнік Супэркубка Францыі: 2011

«Чэлсі»:

• Чэмпіён Ангельшчыны: 2015
• Уладальнік Кубка ангельскае лігі: 2015