Сяргей Сасноўскі (футбаліст)

Сярге́й Анато́льевіч Сасно́ўскі (нар. 14 жніўня 1981 году) — колішні беларускі футбаліст, гуляў у абароне. На сёньня працуе ў структуры каманды АБФФ Ю-17.

Вікіпэдыя мае артыкулы пра іншых асобаў з прозьвішчам Сасноўскі.

Сяргей Сасноўскі
Пэрсанальная інфармацыя
Нарадзіўся	14 жніўня 1981(1981-08-14)[1][2] (43 гады) Менск, БССР, СССР
Рост	190 см[3]
Вага	80 кг[3]
Пазыцыя	абаронца
Клюбы
Гады	Клюб	Гульні (галы)¹
2000—2001	Трактар[d]	39 (2)
2002—2004	Партызан Менск	60 (1)
2005—2006	Энэргетык-БДУ	25 (2)
2006—2007	Нёман Горадня	49 (4)
2008—2010	БАТЭ	56 (1)
2011—2012	Том Томск	22 (0)
2013	Менск	30 (2)
2014	Тарпэда-БелАЗ	1 (0)
2015—2016	Нёман Горадня	44 (0)
Зборныя
2002	Беларусь (да 21)	1 (0)
2009—2011	Беларусь	17 (0)
Трэнэрскія клюбы
2022	Менск
2025—4	АБФФ U-19[d]
2025—4	Беларусь (да 19)[d]

Кар’ера

Клюбная

Выхаванец менскай школы «Алімпія». Пачаў прафэсійную кар’еру ў менскім «Трактары», а пазьней бараніў колеры МТЗ-РІПА, «Зорцы-БДУ» і «Нёмана».

У 2008—2010 гадах гуляў у складзе барысаўскага БАТЭ, зь якім тройчы стаў чэмпіёнам краіны. У матчы плэй-оф Лігі Эўропы зь «Літэксам» (Баўгарыя) 27 жніўня 2009 году забіў два галы ў гульні, тым самым «рэабілітаваўся», бо ў першай гульні з той камандаю, з-за яго памылкі БАТЭ прайграў дома 0:1. У пачатку 2011 году стаў гульцом расейскай «Тамі». Большую частку 2012 году прапусьціў праз траўму.

У студзені 2013 году перайшоў у клюб «Менск»^[4]. У сталічным клюбе быў асноўным абаронцам каманды. Прывёў гэты клюб да перамогі ў Кубку Беларусі 2012—2013. У фінале забіў гол, а пасьля атрымаў пашкоджаньне, але застаўся на полі зь перавязанай галавой. У канцы 2013 году падпісаў кантракт з жодзінскім клюбам «Тарпэда-БелАЗ»^[5]. У жодзінскім клюбе, аднак, згуляў толькі ў першым матчы сэзону, то бок 29 сакавіка з «Нафтанам». Пасьля атрымаў траўму, празь якую прапусьціў увесь сэзон 2014 году. У студзені 2015 году пакінуў «Тарпэда-БелАЗ» па заканчэньні кантракту^[6].

У лютым 2015 году падпісаў кантракт з гарадзенскім «Нёманам»^[7]. У сакавіку 2015 году быў абраны капітанам каманды^[8] і стаў асноўным цэнтральным абаронцам гарадзенцаў. У студзені 2016 году падоўжыў кантракт зь «Нёманам»^[9]. У другой палове сэзону 2016 году, калі галоўным трэнэрам гарадзенцаў стаў Ігар Кавалевіч, страціў месца ў асноўным складзе. Пакінуў «Нёман» пасьля сэзону 2016 году^[10]. У студзені 2017 году прыбыў на прагляд у «Іслач»^[11], аднак клюб перад самым пачаткам сэзону адмовіўся ад падпісаньня абаронцы, і той завяршыў кар’еру.

Міжнародная

У 2003 годзе згуляў свой адзіны матч за моладзевую зборную Беларусі. Дэбютаваў у нацыянальнай зборнай 1 красавіка 2009 году ў матчы з Казахстанам. Усяго за зборную згуляў 17 матчаў.

Трэнэрская праца

Па завяршэньні кар’еры перайшоў на трэнэрскую працу на юнацкім узроўні. Працаваў у структуры «Менску». У жніўні 2019 году атрымаў трэнэрскую ліцэнзію катэгорыі B^[12], у сьнежні 2021 году — трэнэрскую ліцэнзію катэгорыі A^[13].

У сэзоне 2022 уваходзіў у трэнэрскі штаб асноўнай каманды «Менску», а ў лістападзе 2022 году, пасьля сыходу Вадзіма Скрыпчанкі, ачоліў каманду на апошні матч сэзону, якім стала сустрэча ў Кубку Беларусі супраць салігорскага «Шахцёра»^[14]. Пасьля пачаў працаваць старшым трэнэрам у Акадэміі футболу АБФФ. У пачатку 2024 году ўвайшоў у трэнэрскі штаб каманды АБФФ Ю-17, якая далучылася да Першай лігі чэмпіянату Беларусі^[15][16][17].

Узнагароды

• Чэмпіён Беларусі: 2008, 2010
• Уладальнік Кубка Беларусі: 2013
• Найлепшы абаронца Беларусі: 2008
• У сьпісе 22 найлепшых футбалістаў чэмпіянату: 2008

Статыстыка

Клюб	Сэзон	Чэмпіянат
		Дывізіён	Матчы	Галы
Нёман	2015	Найвышэйшая ліга	25	0
	2016	Найвышэйшая ліга	19	0