Язэп Крупскі

Язэ́п Рыго́равіч Кру́пскі (11 кастрычніка 1934, в. Куплін Палескага ваяводства Польшчы, цяпер у Пружанскім раёне Брэсцкай вобласці — 13 ліпеня 2014, Брэст) — беларускі мастак.

Язэп Крупскі
Дата нараджэння	11 кастрычніка 1934(1934-10-11)
Месца нараджэння	Куплін, Пружанскі павет, Палескае ваяводства, Польская Рэспубліка
Дата смерці	13 ліпеня 2014(2014-07-13) (79 гадоў)
Месца смерці	Брэст, Брэсцкая вобласць, Беларусь
Грамадзянства	Беларусь  СССР
Род дзейнасці	мастак
Жанр	станковы жывапіс і манументальна-дэкаратыўнае мастацтва
Вучоба	Мінскае мастацкае вучылішча (1960) Беларускі дзяржаўны тэатральна-мастацкі інстытут (1968)

У Вікіпедыі ёсць артыкулы пра іншых людзей з прозвішчам Крупскі.

Біяграфія

Нарадзіўся ў сялянскай сям’і, дзе акрамя яго яшчэ былі тры сыны і пяць дачок. Скончыў Мінскае мастацкае вучылішча (1960). Пасля службы ў арміі прадоўжыў навучанне ў Беларускім тэатральна-мастацкім інстытуце на аддзяленні станковага жывапісу. У 1968 годзе скончыў інстытут, атрымаўшы кваліфікацыю мастак-жывапісец. З 1968 года пачаў удзельнічаць мастацкіх выстаўках.

У 1978 годзе быў прыняты ў Саюз мастакоў Беларусі. Жыў у г. Брэсце.

Творчасць

Працаваў у станковым жывапісе (пейзаж, партрэт, тэматычная карціна) і манументальна-дэкаратыўным мастацтве (мазаіка, зграфіта, фрэска). На карцінах нярэдка звяртаўся да тэматыкі малой радзімы: «Вёска майго дзяцінства», «Пружанскія балоты»^[1], «Палессе», «Вербы над Бугам» і інш.

Асноўныя творы

Дэкаратыўная кампазіцыя «Беларусь» у кінатэатры «Беларусь»

Працы ў станковым жывапісе:

• тэматычны жывапіс: «Фарсіраванне Дняпра», «Абарона Брэсцкага вакзалу», «Пяшчотнасць», «Невядомыя жаўнеры», «Непакораны», «Катаванне актывіста», «Хлапчукі»
• партрэтны жывапіс: карціны «Тры грацыі», «Пяшчота», «Дзяўчына ў белым», «Маці», «Настаўніца», «Партрэт жонкі», «Аўтапартрэт»
• пейзажы: «Палессе», «Цёплы дзень», «Ускраіна Берасця», «Полацак і стагоддзі», «Затоплены човен»
• іншыя жанры: «Свята Купалле», «У майстэрні», «Навагодняя казка», «Нацюрморт з яблыкамі», «Адам і Ева», «Выгнанне з раю», «Апошнія дні святога Язэпа», «Раство Хрыстова».

Працы ў манументальным жывапісе і мазаіцы:

• зграфіта: «Беларусь» ў кінатэатры «Беларусь» (Брэст); «Ніць вечнасці» ў Палацы культуры камбінату верхняга трыкатажу (Пінск)
• роспіс: «Жыццё» ў кінатэатры «Мір» (Брэст); «Папараць-кветка» ў гарадскім Доме культуры Ганцавічы
• мазаіка: «Юнацтва» на фасадзе спарткомплексу Брэсцкага педагагічнага ўніверсітэта

Творы Язэпа Крупскага знаходзяцца ў Нацыянальным мастацкім музеі Рэспублікі Беларусь, фондзе Беларускага саюза мастакоў, Музеі сучаснага выяўленчага мастацтва, Брэсцкім абласным краязнаўчым музеі, Баранавіцкім краязнаўчым музеі, музеі-сядзібе «Пружанскі палацык».

У 1999–2006 гадах выязджаў на пленэры ў Польшчу, дзе напісаў шмат пейзажаў, партрэтаў, якія знаходзяцца ў музеях і прыватных калекцыях Польшчы і іншых краін.

Зноскі

1. Юры Зялевіч. Сустрэча на малой радзіме // Культура. — 15 верасня 2000. — № 36. — С. 10.