Анцінея Рыгораўна Мурашка

У Вікіпедыі ёсць артыкулы пра іншых людзей з прозвішчам Мурашка.

Анцінея Рыгораўна Мурашка (15 кастрычніка 1924, вёска Кірава, Слуцкі раён, Мінская вобласць — 18 студзеня 2011) — беларускі мовазнавец, кандыдат філалагічных навук, лаўрэат Дзяржаўнай прэміі СССР (1971).

Анцінея Рыгораўна Мурашка
Дата нараджэння	15 кастрычніка 1924(1924-10-15)
Месца нараджэння	Цараўцы, Кіраўскі сельсавет, Слуцкі раён, Слуцкая акруга, Беларуская ССР, СССР
Дата смерці	18 студзеня 2011(2011-01-18) (86 гадоў)
Грамадзянства	Беларусь
Бацька	Рыгор Мурашка
Род дзейнасці	мовазнаўца
Месца працы	Інстытут мовазнаўства НАНБ філалагічны факультэт БДУ
Альма-матар	філалагічны факультэт БДУ

Біяграфія

Бацькі

Бацька — Рыгор Мурашка, маці Соф’я (Саламея). У 1927 годзе сям’я пераехала ў Менск. Тут скончыла 9 класаў сярэдняй школы. На пачатку вайны разам з піянерскім лагерам, які знаходзіўся ў Ратамцы, была эвакуіравана ў Хвалынск у Саратаўскай вобласці. Жыла ў дзіцячым доме, тут скончыла 10 клас, працавала выхавацелькай у дзіцячым інтэрнаце саюза пісьменнікаў у Чыстапалі ў Татарстане. У 1948 годзе закончыла Беларускі дзяржаўны ўніверсітэт. З 1950 года супрацоўнік Інстытута мовазнаўства АН БССР, з 1963 па 1993 год дацэнт кафедры рускай мовы БДУ. Два гады (1978—1980) узначальвала кафедру рускай мовы для замежных студэнтаў. Выкладала рускую мову за мяжой, у Польшчы (1971—1973), на Кубе (1982—1984).

Навуковая дзейнасць

Даследчык беларускай дыялекталогіі, пытанняў узаемадзеяння народных гаворак з літаратурнай мовай, беларускай мовы з суседнімі славянскімі і неславянскімі мовамі. Абараніла кандыдацкую дысертацыю «Формы прыметнікаў у беларускіх гаворках» (1958), апублікавала артыкулы «Формы меснага склону адзіночнага ліку прыметнікаў мужчынскага і ніякага роду ў беларускіх гаворках», «Ступені параўнання якасных прыметнікаў» і інш. Даследавала, у прыватнасці, метэаралагічную лексіку. Сааўтар «Хрэстаматыі па беларускай дыялекталогіі» (1962), «Дыялекталагічнага атласа беларускай мовы» (ч. 1-2, 1963), «Нарысаў па беларускай дыялекталогіі» (1964), атласа «Лінгвістычная геаграфія і групоўка беларускіх гаворак» (1969), «Сучаснай рускай мовы» (ч. 1-2, 1981).

Сям’я

Маці перажыла вайну. Муж — Барыс Сцяпанавіч Лапаў, мовазнавец (1925—1967). Дзеці — Таццяна і Алена.

Гл. таксама

• Ганна Уладзіміраўна Арашонкава
• Мікалай Васілевіч Бірыла
• Ніна Трафімаўна Вайтовіч
• Іосіф Мартынавіч Гайдукевіч
• Аляксей Пятровіч Груца
• Аляксандр Антонавіч Крывіцкі
• Яўгенія Міхайлаўна Рамановіч
• Кандрат Крапіва
• Юзэфа Фларыянаўна Мацкевіч

Зноскі