Віктар Яўгенавіч Кульбачанка

Віктар Яўгенавіч Кульбачанка (1962—2007) — беларускі альпініст. Заслужаны майстар спорту РБ. Майстар спорту міжнароднага класа па альпінізме і скалалазанні.

Віктар Яўгенавіч Кульбачанка
Пол	мужчынскі пол
Спецыялізацыя	альпінізм
Нарадзіўся	27 красавіка 1962(1962-04-27) Светлагорск, Светлагорскі раён, Гомельская вобласць, Беларуская ССР, СССР
Памёр	14 чэрвеня 2007(2007-06-14) (45 гадоў) Маскоўская вобласць, Расія
Пахаванне	Жлобін
Грамадзянства	СССР
Альма-матар	БДМУ
Трэнер	Леанід Іванавіч Лазоўскі

У Вікіпедыі ёсць артыкулы пра іншых людзей з прозвішчам Кульбачанка.

Біяграфія

Віктар Кульбачанка нарадзіўся ў 1962 годзе ў Светлагорску. У 1976 годзе з сям’ёй пераехаў у Жодзіна, дзе ён у 1979-м скончыў СШ № 2, а ў 1985 годзе — Мінскі медыцынскі інстытут па спецыяльнасці «ўрач-гігіеніст»^[1].

Займаўся прамысловым альпінізмам^[1].

Жыў у Зеленаградзе разам з жонкай і дачкой Ульянай. У чэрвені 2007 года быў знойдзены мёртвым у падмаскоўным возеры^[2].

Пахаваны ў Жлобіне^[2].

Спартыўныя дасягненні

Сваё першае ўзыходжанне здзейсніў у 1981 годзе ў альплагеры «Узункол». Далей былі горы Каўказа, Паміра-Алая, Цянь-Шаня^[1].

Быў урачом у беларуска-югаслаўскай экспедыцыі 1990 года на піку Каржанеўскай. Здзейсніў сем узыходжанняў вышэйшай катэгорыі складанасці ў двойцы^[1].

У 1991 годзе атрымаў званне «Снежны барс» за заваяванне ўсіх «сямітысячнікаў» СССР^[3].

Лепшыя ўзыходжанні: Улу-Кара, Улу-Тау Усходняя ў двойцы, пік Камунізму, пік Перамогі, пік Вольная Іспанія ў двойцы зімой, Канчэнджанга — 1994 год^[1].

18 мая 1998 года стаў першым грамадзянінам Беларусі, які здзейсніў паспяховае ўзыходжанне на гару Эверэст^[1].

Зноскі

1. Жодинец Виктор Кульбаченко стал первым белорусом, покорившим вершину Эвереста Архівавана 20 верасня 2021. (руск.)
2. Погиб Виктор Кульбаченко (руск.)
3. Спіс альпіністаў, якія атрымалі званне «Снежны барс» (англ.)