Жаўрукі

Жаўрукі (буські^[2], галушкі, кулікі, сарокі^[3]) — абрадавае святочнае печыва ў выглядзе птушак.

Жаўрукі
Уваходзіць у нацыянальныя кухні
славянская абрадавая ежа і напоі[d][1]
Краіна паходжання	Беларусь
Кампаненты
Асноўныя	жытняя мука, вада, алей, цукар, дрожджы
Падача
Тып стравы	печыва
Роднасныя стравы
Падобныя	галёпы
Медыяфайлы на Вікісховішчы

Выпякаюцца напярэдадні свята Саракі 22 сакавіка. Яно прысвячаецца 40 Севасційскім мучанікам, якіх за хрысціянскую веру закатавалі рымскія язычнікі ў 320 годзе. У народным календары свята іх памяці лічыцца днём сустрэчы вясны і жаўрукоў. Таму на Саракі выпякаюць па 40 «жаўрукоў» з жытняга цеста. Пры гэтым у адзін з іх запякаюць 20 капеек («саракоўку») або пярсцёнак. Абрадавае спажыванне дзецьмі спалучаецца з нанізваннем печыва на пруток і спевам песні «Жавароначкі, прылятайце» на страсе дома. Таксама жаўрукі выстаўляюць на дах, у хляве з жывёлай, у гумне са збожжам і ў печы. Сярод іншага, імі частуюць адно аднаго. Ядуць печыва ўвечары^[3].

Складнікі

Для цеста бяруць 2 кг мукі і паўлітры вады, 250 грам алею і шклянку цукру, 50 грам дрожджаў і драбок солі. Для змазкі атрыманага цеста выкарыстоўваюць салодкую моцную гарбату^[3].

Прыгатаванне

Для прыгатавання жаўрукоў змешваюць муку і ваду, алей і цукар, дрожджы і соль. Атрыманую сумесь вымешваюць да атрымання моцнага, пругкага цеста. Затым з цеста лепяць шар, ад якога адшчыпваюць невялікія кавалкі. З гэтых кавалкаў раскочваюць жгуты, якія завязваюць вузлом. Пры гэтым галоўцы надаюць выгляд птушынай. З разынак робяць вочкі, прыціснуўшы пальцамі. Затым лепяць хвосцік і робяць надрэзы-«пёркі»^[3]. Духоўку або печ разаграюць да +180 °C. Бляху засцілаюць пергаментам для выпечкі і выкладаюць на яго жаўрукоў^[2].

Для надання адцення паверхню атрыманых фігурак змазваюць настоем моцнай гарбаты з цукрам^[3] або алеем. Пасля посуд з жаўрукамі ставяць у духоўку на 20 хвілін. За тры хвіліны да заканчэння прыгатавання жаўрукі прамазваюць узбітым яйкам для надання румянага адцення. Пасля астывання жаўрукі падаюць да гарбаты з варэннем і мёдам^[2].