Нагахвосткі

Нагахвосткі, калембалы (Collembola) — атрад членістаногіх. Раней разглядаўся як атрад (клас) першаснабяскрылых насякомых.

Нагахвосткі
Isotoma habitus
Навуковая класіфікацыя
прамежныя рангі Дамен:  Эўкарыёты Царства:  Жывёлы Падцарства:  Эўметазоі Без рангу:  Двухбакова-сіметрычныя Без рангу:  Першаснаротыя Без рангу:  Ecdysozoa Без рангу:  Panarthropoda Тып:  Членістаногія Падтып:  Трахейнадыхальныя Надклас:  Шасціногія Клас:  Скрытнасківічныя Падклас:  Нагахвосткі
Міжнародная навуковая назва
Collembola Lubbock, 1870
Сістэматыка на Віківідах Выявы на Вікісховішчы ITIS   99237 NCBI   30001 EOL   336 FW   133900

Апісанне

Даўжыня да 2, зрэдку да 10 мм. Разнастайныя па форме і афарбоўцы цела. Вочы з 1—8 фасетак, у некаторых (глебавыя формы) адсутнічаюць. Вусікі 4—6-членікавыя. Брушка сегментаванае (да 6 сегментаў), заканчваецца скакальнай вілкай. Ротавыя органы грызучыя, колюча-сысучыя.

Пашырэнне

Вядомы з дэвону (каля 400 млн г. назад). Падзяляюцца на 2 падатрады, адрозніваюць каля 3,5 тыс. відаў.

Пашыраны ўсюды, пераважна ва ўмеранай (імхі тундры і тайгі, стэпы, лугі) і трапічнай зонах. На Беларусі найбольш трапляюцца прадстаўнікі сямействаў аніхіўрыд (Onychiuridae), бязвусікавых, гіпагаструрыд (Hypogastruridae), ізатамід (Isotomidae), смінтур (Sminthuridae), энтамабрыід (Entomobryidae); найбольш пашыраны нагахвостка вадзяная (Podura aquatica), ізатома зялёная (Isotoma viridis) і інш. Жывуць у глебе, лясным подсціле, гнілой драўніне, на водных раслінах, паверхневай плеўцы стаячых вод, у гнёздах птушак і інш.

Асаблівасці біялогіі

Сапрафагі, фітафагі, драпежнікі. Некаторыя віды жыццяздольныя пры нізкай тэмпературы, могуць трапляцца на снезе ў вялікай колькасці, што надае яго паверхні афарбоўку. Глебаўтваральнікі.

Гл. таксама

• Hypogastrura nivicola

Літаратура

• Максімава С. Нагахвосткі // Беларуская энцыклапедыя: У 18 т. Т. 11: Мугір — Паліклініка / Рэдкал.: Г. П. Пашкоў і інш. — Мн. : БелЭн, 2000. — Т. 11. — 560 с. — 10 000 экз. — ISBN 985-11-0035-8. — ISBN 985-11-0188-5 (т. 11).