Манастыр (востраў)

Манасты́р (трансліт.: Manastyr), таксама вядомы як Манасты́рскі, Кляшто́р^[1], Святы́^[2] — востраў на возеры Неспіш. Прыкладная плошча — 0,021 км². У нашы дні незаселены.

Манастыр
Малюнак Д. Струкава (1864 г.)
Характарыстыкі
Плошча	0,021 км²
Размяшчэнне
55°38′53,20″ пн. ш. 27°06′29,90″ у. д.HGЯO
Акваторыя	Неспіш
Краіна	Беларусь
Вобласць	Віцебская вобласць
Раён	Браслаўскі раён
Манастыр
Манастыр

Геаграфія

Карта

Востраў Манастыр месціцца на возеры Неспіш за 325 м на поўнач ад аднайменнай вёскі, за 5 км на ўсход ад Браслава.

Сфарміраваны ледавіковымі адкладаннямі. Пераважаюць пясчаныя глебы. Берагі зарастаюць трыснягом, дрэвамі і хмызнякамі. У цэнтральнай частцы вылучаецца некалькі нізін, куды ўвесну сцякаюць адталыя воды і фарміруюць невялікія часовыя азёры.

Гісторыя

Назва вострава Манастыр паходзіць ад пабудаванага на ім праваслаўнага мужчынскага манастыра Успення Багародзіцы, які ўпершыню ўзгадваецца пад 1500 г. у сувязі з перадачай манастыру Вялікай Княгіняй Аленай Іванаўнай 15 сялян^[3]. Пасля Берасцейскай уніі 1596 г. манастыр перайшоў у валоданне Ордэна Базыльян. У ім захоўваўся абраз Маці Божай Браслаўскай. У 1832 г. манастыр згарэў ад маланкі, але абраз захаваўся і быў перанесены ў касцёл Нараджэння Найсвяцейшай Дзевы Марыі (Браслаў)^[4].

У 1930-я гады востраў набыў селянін Ізідар Зямец і апрацоўваў тут зямлю. Пазней сюды прывозілі на лодках на пашу авечак, прыплывалі па ягады^[5].

У нашы дні востраў уваходзіць у склад ахоўваемай зоны Нацыянальнага парка Браслаўскія азёры. У 2019 годзе пачаліся археалагічныя раскопкі.

Адлюстраванне ў культуры

Манастыр на востраве на возеры Неспіш узгадваецца ў рамане Івана Шамякіна «Вялікая княгіня»^[6].

Зноскі

1. Нацыянальны парк «Браслаўскія азёры» Архівавана 13 жніўня 2020.
2. На Браславских озерах, на острове Монастырь Архівавана 12 снежня 2018.
3. Ярашэвіч, А. Маці Божая Браслаўская. // Наша Вера. № 2 (48) 2009. С. 37
4. Цудадзейны абраз Маці Божай Браслаўскай можа стаць укаранаванай святыняй (нявызн.)(недаступная спасылка). Архівавана з першакрыніцы 25 сакавіка 2020. Праверана 23 снежня 2018.
5. Археолягі адкрылі муры кляштара часоў ВКЛ сярод Браслаўскіх азёр
6. Шамякін, І. Вялікая княгіня. / Іван Шамякін. - Мн.: Мастацкая літаратура, 1997