Механіка-матэматычны факультэт БДУ

Механіка-матэматычны факультэт Беларускага дзяржаўнага ўніверсітэта (скарочана «МехМат БДУ») — адзін з найстарэйшых факультэтаў Беларускага дзяржаўнага ўніверсітэта. Рыхтуе спецыялістаў у галіне матэматыкі, механікі, сістэмнага аналізу і інфармацыйных тэхналогій.

Механіка-матэматычны факультэт
Беларускі дзяржаўны ўніверсітэт
Англійская назва	Faculty of Mechanics and Mathematics of BSU
Заснаваны	1958
Дэкан	Сяргей Міхайлавіч Басякоў
Месцазнаходжанне	Беларусь, 220030, Мінск, пр. Незалежнасці, 4
mmf.bsu.by

Гісторыя стварэння і станаўлення

• На падставе загада Міністра вышэйшай адукацыі СССР № 1035 ад 3 кастрычніка 1958 з 16 кастрычніка фізіка-матэматычны факультэт БДУ быў падзелены на два факультэты: фізічны і матэматычны. Першым дэканам матэматычнага факультэта прызначаны прафесар Д. А. Супруненка. Першапачаткова на матэматычным факультэце было ўсяго пяць кафедр: алгебры (загадчык — прафесар Д. А. Супруненка), вылічальнай матэматыкі (акадэмік У. І. Крылоў), дыферэнцыяльных ураўненняў (акадэмік М. П. Яругін), геаметрыі (дацэнт Л. К. Тутаеў), матэматычнага аналізу (дацэнт М. В. Ламбін). У тым жа годзе быў адкрыты Вылічальны цэнтр БДУ.^[1]
• 1 верасня 1961 створана кафедра вышэйшай матэматыкі і матэматычнай фізікі.^[2]
• У 1962 адноўлена кафедра тэарэтычнай механікі.^[3]
• У 1964 створана кафедра агульнай матэматыкі.^[4]
• У 1966 створана кафедра аптымальнага кіравання.^[5]
• 1 верасня 1968 створана кафедра тэорыі функцый і функцыянальнага аналізу.^[6]
• 1 красавіка 1970 створаны факультэт прыкладной матэматыкі на базе трох кафедр матэматычнага факультэта: кафедры вылічальнай матэматыкі, кафедры дыферэнцыяльных ураўненняў і кафедры прыкладной матэматыкі.^[7]
• 7 верасня 1973 створана кафедра лікавых метадаў і праграмавання.^[8]
• У 1975 на матэматычным факультэце адкрыта спецыяльнасць «механіка». У сувязі з гэтым факультэт перайменаваны ў механіка-матэматычны. Кафедра тэорыі функцый і функцыянальнага аналізу падзелена на дзве кафедры: кафедру тэорыі функцый і кафедру функцыянальнага аналізу.^[9]
• У 1978 навучальную і навуковую працу на факультэце ажыццяўляюць 8 кафедр: вышэйшай алгебры (заг. дац. М. С. Гарашчук), геаметрыі (заг. праф. В. І. Вядзернікаў), дыферэнцыяльных ураўненняў (заг. праф. М. А. Лукашэвіч), матэматычнай логікі і тапалогіі (заг. праф. А. С. Фядзенка)б тэорыі функцый (зав. праф. Э. І. Звяровіч), функцыянальнага аналізу (заг. дац. Я. В. Радына), лікавых метадаў і праграмавання (заг. дац. П. І. Манастырны), тэарэтычнай механікі (заг. праф. І. А. Прусаў).^[10]
• У 1983 створана кафедра ўраўненняў матэматычнай фізікі.^[11] З факультэта прыкладной матэматыкі на механіка-матэматычны факулььтэт пераведзена кафедра матэматычнай кібернетыкі.^[12]
• У 1985 шляхам аб’яднання кафедры геаметрыі і кафедры тапалогіі і матэматычнай логікі створана кафедра геаметрыі, тапалогіі і методыкі выкладання матэматыкі.^[13]
• У 1987 кафедра тэарэтычнай механікі пераўтворана ў кафедру тэарэтычнай механікі і робататэхнікі.^[14]
• У 1988 створана кафедра матэматычных метадаў тэорыі кіравання.^[15]
• У 1994 кафедра агульнай матэматыкі пераўтворана ў кафедру агульнай матэматыкі і інфарматыкі.^[16]
• У 2001 кафедра тэарэтычнай механікі і робататэхнікі пераўтворана ў кафедру тэарэтычнай і прыкладной механікі.^[14]
• У 2010 кафедра лікавых метадаў і праграмавання пераўтворана ў кафедру вэб-тэхналогій і камп’ютарнага мадэлявання.^[17]
• У 2017 шляхам аб’яднання кафедры функцыянальнага аналізу і кафедры нелінейнага аналізу і аналітычнай эканомікі была ўтворана кафедра функцыянальнага аналізу і аналітычнай эканомікі.^[18]

Кафедры ў 2025 годзе

• Бія- і нанамеханікі
• Вэб-тэхналогій і камп’ютарнага мадэлявання
• Вышэйшай алгебры і аховы інфармацыі
• Геаметрыі, тапалогіі і методыкі выкладання матэматыкі
• Дыферэнцыяльных ураўненняў і сістэмнага аналізу
• Інтэлектуальных метадаў мадэлявання
• Агульнай матэматыкі і інфарматыкі
• Тэарэтычнай і прыкладной механікі
• Тэорыі функцый

Спецыяльнасці вышэйшай адукацыі (1 ступень)

• Матэматыка і камп’ютарныя навукі
• Камп’ютарная матэматыка і сістэмны аналіз
• Матэматыка
• Механіка і матэматычнае мадэляванне

Дэканы факультэта

• Дзмітрый Аляксеевіч Супруненка (1958—1962)
• Фёдар Дзмітрыевіч Гахаў (1962—1963)
• Аляксей Адамавіч Гусак (1963—1974)
• Міхаіл Сцяпанавіч Гарашчук (1974—1976)^[19]
• Анатоль Сямёнавіч Фядзенка (1976—1980)
• Міхаіл Сцяпанавіч Гарашчук (1980—1983)^[19]
• Мікалай Іосіфавіч Юрчук (1983—1985)
• Леанід Платонавіч Прымачук (1985—1996)^[20]
• Мікалай Іосіфавіч Юрчук (1996—2007)
• Міхаіл Анатольевіч Жураўкоў (2007—2009)
• Дзмітрый Георгіевіч Мядзведзеў (2009—2020)^[21]
• Сяргей Міхайлавіч Басякоў (з 2020)^[22]