Мінска-Магілёўская мітраполія

Мі́нска-Магілё́ўская мітрапо́лія (лац.: Provincia ecclesiastica Minscensis Latinorum-Mohiloviensis Latinorum) — царкоўная правінцыя (мітраполія) Рымска-Каталіцкай Царквы, межы якой геаграфічна супадаюць з межамі Рэспублікі Беларусь. Складаецца з чатырох дыяцэзій: Мінска-Магілёўскай архідыяцэзіі і яе трох суфраганных дыяцэзій: Віцебскай, Гродзенскай і Пінскай. Дыяцэзіяльны біскуп Мінска-Магілёўскай архідыяцэзіі адначасова з'яўляецца Мітрапалітам Мінска-Магілёўскім.

Артыкул пра царкоўную правінцыю Рымска-Каталіцкай Царквы ў Беларусі. Пра аднайменную архідыяцэзію, якая з’яўляецца цэнтрам гэтай царкоўнай правінцыі гл. Мінска-Магілёўская архідыяцэзія.

Мінска-Магілёўская мітраполія
лац.: Provincia ecclesiastica Minscensis Latinorum-Mohiloviensis Latinorum
Рымскі абрад
Галоўны горад	Мінск
Краіна	Беларусь[1]
Дата заснавання	13 красавіка 1991
Архікафедральны сабор	Архікафедральны касцёл Найсвяцейшага Імя Найсвяцейшай Дзевы Марыі (Мінск)
Мітрапаліт	Юзаф Станеўскі
Дыяцэзій у складзе	4
Архідыяцэзія	Мінска-Магілёўская архідыяцэзія
Суфраганныя дыяцэзіі	Віцебская дыяцэзія Гродзенская дыяцэзія Пінская дыяцэзія
Парафій	486
Біскупаў	9
Дыяцэзіяльных прэсвітараў	299
Прэсвітараў з ордэнаў ці кангрэгацый	177
Свецкіх манахаў	146
Манашак	302
Плошча мітраполіі	207 600 км²
Насельніцтва мітраполіі	9 397 800 чал.
Колькасць каталікоў	1 468 115 чал. (рымскага абраду)
Доля каталікоў	15,62 %
Афіцыйны сайт	catholic.by

Гісторыя

Утворана Папам Янам Паўлам II 13 красавіка 1991 года: цэнтрам мітраполіі з'яўлялася Мінска-Магілёўская архідыяцэзія, якая мела дзве суфраганныя дыяцэзіі: Гродзенскую і Пінскую. Прычым новая Гродзенская дыяцэзія (у яе склад увайшлі часткі тэрыторый Віленскай архідыяцэзіі, Пінскай дыяцэзіі і Ломжынскай дыяцэзіі) была створана ў той жа дзень — 13 красавіка 1991 года, а яе межы цалкам супадалі з геаграфічнымі межамі Гродзенскай вобласці. Тады жа Мінская дыяцэзія (заснаваная 9 жніўня 1798 года) і Магілёўская архідыяцэзія (заснаваная 15 красавіка 1783 года) былі аб'яднаныя ў Мінска-Магілёўскую архідыяцэзію, прычым яе межы цалкам супадалі з геаграфічнымі межамі Віцебскай, Магілёўскай і Мінскай абласцей. У перыяд паміж 13 красавіка 1991 года і 5 чэрвеня 1991 года Мінска-Магілёўская мітраполія ахоплівала не толькі тэрыторыі Беларусі, але і частку ўсходніх рэгіёнаў Польшчы. Канец гэтаму паклала рэформа, якая адбылася 5 чэрвеня 1991 года: па загадзе Яна Паўла II частка зямель Пінскай дыяцэзіі была вылучана ў асобную, новую, Драгічынскую дыяцэзію — гэта адбылося такім чынам, каб у выніку тэрыторыія Пінскай дыяцэзіі цалкам супадала з геаграфічнымі межамі Брэсцкай і Гомельскай абласцей Рэспублікі Беларусь, якая стала на шлях да незалежнасці. Такім чынам тэрыторыя Мінска-Магілёўскай мітраполіі стала цалкам геаграфічна супадаць з тэрыторыяй Рэспублікі Беларусь.

У далейшым адбылося павелічэнне колькасці дыяцэзій у складзе Мінска-Магілёўскай мітраполіі з трох да чатырох. Гэта адбылося 13 кастрычніка 1999 года па загадзе Папы Яна Паўла II (у адказ на просьбу кардынала Казіміра Свёнтка, Мітрапаліта Мінска-Магілёўскага ў той час): са складу Мінска-Магілёўскай архідыяцэзіі была вылучана асобная Віцебская дыяцэзія, межы якой геаграфічна цалкам супадалі з межамі Віцебскай вобласці Беларусі. Новаўтвораная Віцебская дыяцэзія стала суфраганнай для Мінска-Магілёўскай архідыяцэзіі і ўвайшла такім чынам у склад Мінска-Магілёўскай мітраполіі.

Адміністрацыйны падзел

У склад Мінска-Магілёўскай мітраполіі ўваходзяць чатыры дыяцэзіі:

• Мінска-Магілёўская архідыяцэзія (з 13 красавіка 1991 года) і тры яе суфраганныя дыяцэзіі:
  • Віцебская дыяцэзія (з 13 кастрычніка 1999 года);
  • Гродзенская дыяцэзія (з 13 красавіка 1991 года);
  • Пінская дыяцэзія (з 13 красавіка 1991 года).

Мітрапаліты

• 1991—2006 Казімір Свёнтак, з 26 лістапада 1994 года кардынал;
• 2007—2021 Тадэвуш Кандрусевіч;
• з 2021 года Іосіф Станеўскі.

Навучальныя ўстановы

• Гродзенская вышэйшая духоўная семінарыя
• Пінская вышэйшая духоўная семінарыя
• Мінскі тэалагічны каледж імя святога Яна Хрысціцеля
• Катэхетычны каледж імя Зыгмунта Лазінскага^[2]
• Тэалагічны каледж імя святога Казіміра

Гл. таксама

• Біскупы віцебскія
• Біскупы гродзенскія
• Біскупы мінска-магілёўскія
• Біскупы пінскія

Зноскі

1. У перыяд паміж 13 красавіка 1991 года і 5 чэрвеня 1991 года Мінска-Магілёўская мітраполія ахоплівала не толькі тэрыторыі Беларусі, але і частку ўсходніх рэгіёнаў Польшчы.
2. Навучальныя ўстановы