Несцер Фёдаравіч Сакалоўскі

У Вікіпедыі ёсць артыкулы пра іншых людзей з прозвішчам Сакалоўскі.

Несцер (Нестар) Фёдаравіч Сакало́ўскі (9 лістапада 1902, в. Вешкі, Бярозкаўскі сельсавет, Докшыцкі раён — 13 лістапада 1950) — беларускі кампазітар, хормайстар, фалькларыст. Удзельнік Вялікай Айчыннай вайны^[1]. Аўтар музыкі Дзяржаўнага гімна БССР.

Несцер Фёдаравіч Сакалоўскі
Асноўная інфармацыя
Дата нараджэння	9 лістапада 1902(1902-11-09)
Месца нараджэння	Вешкі, Барысаўскі павет, Мінская губерня, Расійская імперыя
Дата смерці	13 лістапада 1950(1950-11-13) (48 гадоў)
Месца смерці	Мінск, Беларуская ССР, СССР
Месца пахавання	Вайсковыя могілкі
Краіна	Расійская імперыя  СССР
Альма-матар	Мінскі музычны тэхнікум (1931) Беларуская дзяржаўная кансерваторыя імя А. В. Луначарскага (1935)
Месца працы	Беларускі трэці дзяржаўны тэатр Ансамбль беларускай народнай песні і танца Беларускай філармоніі Упраўленне па справах мастацтваў пры СНК БССР Беларусь
Музычная дзейнасць
Прафесіі	кампазітар, хормайстар, фалькларыст
Узнагароды

Біяграфія

Нарадзіўся ў вёсцы Вешкі (зараз у Докшыцкім раёне Віцебскай вобласці Беларусі).

У 1908 годзе сям’я Сакалоўскіх пераехала ў Мінск. Несцер займаўся ў Першай працоўнай школе, дзе навучыўся спяваць, іграць на балалайцы, быў акцёрам школьнага тэатра. У 1921—1923 гадах працаваў харыстам украінскай тэатральнай трупы. У 1923 годзе быў прызваны ў Чырвоную Армію. Пасля звальнення ў запас стаў акцёрам і хормайстрам Беларускага трэцяга дзяржаўнага тэатра^[1]. Скончыў Мінскі музычны тэхнікум (1931, клас кампазіцыі М. Аладава)^[2]. У 1932—1935 гадах вучыўся ў Беларускай кансерваторыі. У 1931—1937 гадах кіраўнік самадзейных хораў^[2]. Адзін з арганізатараў і хормайстар (1937—1941) Ансамбля беларускай народнай песні і танца Беларускай дзяржаўнай філармоніі. У гады Вялікай Айчыннай вайны Несцер Сакалоўскі знаходзіўся ў эвакуацыі, потым некаторы час быў чырвонаармейцам, але быў адкліканы з часці для заняткаў творчай працай. З 1943 года быў мастацкім кіраўніком Палескага абласнога ансамбля песні і танца. З 1944 года начальнік аддзела мастацкай самадзейнасці Упраўлення па справах мастацтваў пры СНК БССР, з 1946 года старшы рэдактар рэдакцыі музычнай літаратуры Белдзяржвыдавецтва^[1].

Памёр 13 лістапада 1950 года ў Мінску. Пахаваны ў Мінску на Вайсковых могілках.

Творчасць

Аўтар музыкі Дзяржаўнага гімна БССР (словы М. Клімковіча), песень на словы Я. Купалы, Я. Коласа, П. Броўкі, А. Русака, М. Машары, М. Чарота, А. Якімовіча і іншых, інструментальных мініяцюр, вакальных сюіт на тэмы беларускіх народных песень^[1][2]. Найбольш папулярная «Песня пра Нёман» (словы А. Астрэйкі). Запісаў і апрацаваў больш за 500 песень (у тым ліку «Ой ты, белая бярозанька», «Падушачка», «Чабарок», «Чаму зязюля не кукавала») і інструментальных найгрышаў^[1][2].

Памяць

Паштовая марка Беларусі, 2002

Імя Н. Ф. Сакалоўскага прысвоена Гомельскаму каледжу мастацтваў^[1], Докшыцкай дзіцячай школе мастацтваў. Яму прысвечана кніга І. Г. Нісневіча «Кампазітар Нестар Сакалоўскі» (Мн., 1969). У 2015 годзе кінастудыя «Беларусьфільм» стварыла дакументальны фільм, прысвечаны жыццю і дзейнасці Несцера Сакалоўскага.

Зноскі

1. т. 5. Биографический справочник. Мн: Издательство «Белорусская советская энциклопедия» имени Петруся Бровки, 1982. 29 с.
2. САКАЛОЎСКІ НЕСЦЕР ФЁДАРАВІЧ(недаступная спасылка)