Паручайніца вадзяная

Паруча́йніца вадзяная^[1] (Catabrosa aquatica) — від кветкавых раслін роду Паручайніца (Catabrosa) сямейства Метлюжковыя (Poaceae).

Паручайніца вадзяная
Навуковая класіфікацыя
прамежныя рангі Дамен:  Эўкарыёты Царства:  Расліны Аддзел:  Кветкавыя Клас:  Аднадольныя Парадак:  Метлюжкакветныя Сямейства:  Метлюжковыя Падсямейства:  Pooideae Трыба:  Poeae Падтрыба:  Puccinelliinae Род:  Паручайніца Від:  Паручайніца вадзяная
Міжнародная навуковая назва
Catabrosa aquatica (L.) P.Beauv., 1812
Падвід
Catabrosa aquatica subsp. minor (Bab.) F.H.Perring & P.D.Sell
Ахоўны статус
Выклікаюць найменшыя асцярогі IUCN 3.1 Least Concern : / 164512
Сістэматыка на Віківідах Выявы на Вікісховішчы ITIS   41541 NCBI   368338 EOL   1114050 GRIN   t:9578 IPNI   395086-1 TPL   kew-403714

Батанічнае апісанне

Батанічная ілюстрацыя з кнігі Яна Копса «Flora Batava», 1800—1934

Шматгадовая травяністая карэнішчавыя расліна вышынёй 30—60^[1] см. Сцябло сцеліста-ўзыходнае, укараняецца ў вузлах. Лісце простае, суцэльнае, лінейнае, сядзячае, з язычком, гладкім краем і завостранай верхавінкай. Суквецце — раскідзістая мяцёлка даўжынёй да 20 см. Кветкавыя каласкі дробныя, з 1—2 кветак. Каласковыя лускавінкі карацейшыя за кветкавыя. Плод — зярняўка.

Распаўсюджанне і экалогія

Расліна распаўсюджана на тэрыторыі Еўропы, умераных абласцей Азіі, Паўночнай Амерыкі і Паўночнай Афрыкі^[2]. Святлолюбівая расліна, гіграфіт, гідрафіт, мезатроф^[3]. Расце на прыморскіх, вільготных і забалочаных лугах, нізінных балотах, па берагах вадаёмаў, на пустках, у месцах выхаду грунтовых вод. Цвіце ў чэрвені—ліпені. Плады паспяваюць у ліпені—жніўні.

Ахоўваецца на тэрыторыі Закарпацкай вобласці Украіны, у Латвіі, Эстоніі, Фінляндыі^[3].

Пашавая расліна, але можа выклікаць атручэнне жывёлы^[1].

Зноскі

1. Энцыклапедыя прыроды Беларусі. У 5-і т. Т. 4. Недалька — Стаўраліт / Рэдкал. І. П. Шамякін (гал. рэд.) і інш. — Мн.: БелСЭ імя Петруся Броўкі, 1985. — 599 с., іл. — 10 000 экз.
2. Taxon: Catabrosa aquatica (L.) P. Beauv. (англ.) // Germplasm Resources Information Network (GRIN-Taxonomy)
3. Поручейница водяная: інфармацыя пра таксон у праекце «Плантариум» (вызначальнік раслін і ілюстраваны атлас відаў). (руск.)