Пярэжырская сярэдняя школа імя А. Е. Гурыновіча

Дзяржаўная ўстанова адукацыі «Пярэжырская сярэдняя школа імя А. Е. Гурыновіча» — установа сярэдняй адукацыі ў в. Пярэжыр Пухавіцкага раёна Мінскай вобласці.

Пярэжырская сярэдняя школа імя А. Е. Гурыновіча
Пярэжырская сярэдняя школа 1930 г
Заснавана	1866
Тып	школа
Краіна	Беларусь
Размяшчэнне	Пярэжырскі сельсавет
Сайт	perezhir.schools.by

Гісторыя

У 1866 годзе ў вёсцы было адкрыта народнае вучылішча. Спачатку там вучылася 66 дзяцей: 63 хлопчыкі і 3 дзяўчынкі. Першым настаўнікам быў святар А. І. Канстанціновіч, які закончыў курс Мінскай духоўнай семінарыі. Да 1904 года ў вучылішчы было толькі 3 класы і працаваў з вучнямі адзін настаўнік. Пасля адкрыцця 4-га і 5-га аддзяленняў школа была перайменавана ў сельскае вучылішча, адразу ж было прынята рашэнне аб будаўніцтве новага памяшкання для школы.

У 1906 годзе быў пабудаваны новы будынак вучылішча. Тут размясціліся тры класныя пакоі і кватэра для настаўніка. У 1886 г. у вучылішчы займаліся каля 80 дзяцей, з іх толькі 1 дзяўчынка. У 1900 годзе было 100 вучняў. Настаўнікам працаваў Фёдар Пасюк.

Пасля рэвалюцыі народнае вучылішча ператворана ў няпоўную сямігадовую школу. У дваццатых гадах у школе ўжо налічвалася 170 вучняў. У 1924 годзе пачалі стварацца піянерскія атрады. Першым піянерскім важатым быў Скрыпко Герасім Іванавіч. У 1930 годзе выйшла пастанова Урада аб усеагульнай сямігадовай адукацыі, таму сельскае вучылішча было перайменавана ў сямігадовую школу.

У 1969 годзе школа перабралася ў новы трохпавярховы будынак з 25-цю добра абарудаванымі кабінетамі, майстэрняй, сталовай, актавай залай, бібліятэкай.

У 2000 годзе па ініцыятыве Іосіфа Васільевіча Кучко, які ў той час кіраваў установай адукацыі, школе было прысвоена імя аднаго з яе выпускнікоў, былога міністра замежных спраў БССР Анатоля Гурыновіча^[1].

Музей імя Анатоля Гурыновіча

Музей гісторыі знаходзіцца ў Пярэжырскай сярэдняй школе. У 2000 годзе па ініцыятыве Іосіфа Васільевіча Кучко, на той момант дырэктара школы, Пярэжырскай сярэдняй школе было прысвоена імя былога міністра замежных спраў БССР Анатоля Гурыновіча.

Гісторыя

Самы сучасны школьны музей у Пухавіцкім раёне адкрыты 1 верасня 2014 года. Створаны па ініцыятыве Міністэрства замежных спраў Беларусі. У яго аздабленні выкарыстаны «фірменныя» колеры гэтага ведамства: сіні, шэры і сталёвы. Канцэпцыю афармлення распрацавала метадыстка Мінскага абласнога інстытута развіцця адукацыі Наталля Обухава. У экспазіцыю Наталля Іванаўна ўключыла і фотаздымак будынка Арганізацыі Аб’яднаных Нацый. На гэтай пляцоўцы былыя і цяперашнія дыпламаты адстойвалі і адстойваюць пазіцыі Беларусі ў міжнароднай палітыцы.

Фонды

Інфармацыя на стэндах скампанавана такім чынам, каб каля кожнага з іх можна было правесці цэлы ўрок або класную гадзіну. Экспанаты змяшчаюцца і ў шкляных вітрынах, каб у экспазіцыю было зручна ўносіць змены. У зале ўладкаваны дзве трыбуны і плошча раздзелена на дзве паловы. У адной можна весці размову пра асабістае жыццё Анатоля Гурыновіча. У другой — пра гісторыю беларускай дыпламатыі. Шэсць раздзелаў залы раскажуць наведвальнікам пра біяграфію знакамітага беларуса праз фотаздымкі, дакументы і рэчы.

Вядомыя выпускнікі

• Аркадзь Андрэевіч Моркаўка — беларускі паэт.
• Мікалай Якаўлевіч Баркун — Герой Сацыялістычнай Працы.
• Анатоль Емяльянавіч Гурыновіч — беларускі і савецкі дыпламат, Надзвычайны і Паўнамоцны Пасол.
• Аркадзь Сцяпанавіч Крук — беларускі вучоны ў галіне траўматалогіі і артапедыі. Доктар медыцынскіх навук, прафесар. Заслужаны дзеяч навукі БССР.
• Іван Фёдаравіч Крук — беларускі вучоны ў галіне таваразнаўства харчовых прадуктаў.
• Галіна Аляксандраўна Лапатка — беларускі вучоны. Кандыдат сельскагаспадарчых навук.
• Іна Васілеўна Прохарчык — беларускі вучоны. Кандыдат сельскагаспадарчых навук
• Іван Аляксандравіч Чахоўскі — вучоны-медык. Доктар медыцынскіх навук, прафесар.
• Міхаіл Міхайлавіч Каўнацкі — ваяр-інтэрнацыяналіст.
• Андрэй Лявонцьевіч Каленік — генерал-маёр юстыцыі.
• Таіса Мікалаеўна Ліннік — заслужаны юрыст Рэспублікі Беларусь.
• Ф. А. Кукарэка — дыпламат, намеснік начальніка аддзела Міністэрства замежных спраў СССР.
• Уладзімір Ільіч Савіч — доктар медыцынскіх навук, загадчык кафедры судовай экспертызы.
• А. В. Ахрамовіч — дацэнт, кандыдат эканамічных навук^[2][3].
• Андрэй Піліпавіч Прохарчык — беларускі вучоны, празаік. Кандыдат сельскагаспадарчых навук.

Выкладчыкі

• Алена Мікалаеўна Сачок — Заслужаная настаўніца БССР. Працавала настаўніцай хіміі і біялогіі (1944—1978).

Дырэктары школы

• Васіліса Васільеўна Гурыновіч (1933—1958)
• Аляксандр Рыгоравіч Песенька (1959—1991)
• Іосіф Васільевіч Кучко (1992—1996)
• Сяргей Валянцінавіч Парэйка (1997—1998)
• Васіль Усеваладавіч Савіч (1999—2001)
• Антаніна Аляксандраўна Макарава (2002—2007)
• Сяргей Аляксандравіч Гуцу (2007-2021)
• Алеся Анатольеўна Мількевіч (з 2021)

Зноскі

1. http://www.gorka.by/?p=34894(недаступная+спасылка)
2. http://www.pukhovichi-roo.by/index.php?option=com_content&view=article&id=361:2016-12-06-05-55-09&catid=7:2015-07-30-20-50-54&Itemid=22
3. http://www.gorka.by/?p=34894(недаступная+спасылка)