Рыгор Арцем’евіч Цыркуноў

У Вікіпедыі ёсць артыкулы пра іншых людзей з прозвішчам Цыркуноў.

Рыгор Арцем’евіч Цыркуно́ў^[1] (4 снежня 1921 — 2008)^[2] — вучоны ў галіне кіравання працэсамі перавозак на чыгуначным транспарце, доктар тэхнічных навук (1994), прафесар (1998).

Рыгор Арцем’евіч Цыркуноў
Дата нараджэння	4 снежня 1921(1921-12-04)
Месца нараджэння	Сава, Горацкі павет, Гомельская губерня, РСФСР
Дата смерці	2008
Грамадзянства	СССР  Беларусь
Род дзейнасці	навуковец
Навуковая сфера	чыгуначны транспарт
Месца працы	БелДУТ Хабараўскі інстытут інжынераў чыгуначнага транспарту[d]
Навуковая ступень	доктар тэхнічных навук (1994)
Навуковае званне	прафесар (1998)
Альма-матар	Маскоўскі інстытут інжынераў чыгуначнага транспарту[d] (1947) Аршанскі эксплуатацыйны тэхнікум (1941)

Біяграфія

Нарадзіўся ў вёсцы Сава (сучасны аграгарадок у Горацкім раёне Магілёўскай вобласці Беларусі). У 1941 годзе скончыў Аршанскі тэхнікум чыгуначнага транспарту і быў прызваны ў чыгуначныя войскі^[3]. Праходзіў службу дыспетчарам па воінскіх перавозках на чыгуначнай станцыі Саратаў-2, а з 1944 года — намеснік начальніка аддзела воінскіх перавозак ва ўпраўленні Заходняй чыгуначнай дарогі на Смаленск^[3]. У 1947 годзе скончыў Маскоўскі інстытут інжынераў чыгуначнага транспарту. У 1954—1957 гг. працаваў у Хабараўскім інстытуце інжынераў чыгуначнага транспарту, дзе займаў пасады старшага выкладчыка, дацэнта. З 1957 года Р. А. Цыркуноў у Беларускім інстытуце інжынераў чыгуначнага транспарту^[4] ў Гомелі. З верасня 1961 года па ліпень 1962 года^[3] займаў пасаду дэкана факультэта кіравання працэсамі перавозак.

Навуковая дзейнасць

Аўтар больш за 260 навуковых прац па ўдасканаленні тэхналогіі работы і тэхнічнага аснашчэння перагрузачных станцый, перавозачнага працэсу хуткапсавальных грузаў, навукова-метадычных прац для студэнтаў чыгуначных вышэйшых навучальных устаноў. Распрацаваў нарматыўныя дакументы па тэхналагічных працэсах работы чыгуначных вузлоў шматлікіх станцый Беларусі і краін СНД.

Сярод апублікаванага:

• Организация работы станций перегруза. — М., 1957.;
• Взаимодействие и организация процессов на станциях перегруза. — Мн., 1962.

Узнагароды і званні

Узнагароджаны ордэнамі і медалямі, а таксама знакамі «За выдатныя поспехі ў працы» Міністэрства вышэйшай адукацыі, «Ганаровы чыгуначнік», Граматай Прэзідыума Вярхоўнага Савета БССР^[3].

Зноскі

1. БелЭн 2003.
2. Вучоныя Беларусі. Цыркуноў, Рыгор Арцем’евіч (доктар тэхнічных навук; транспарт; 1921—2008)
3. ЦЫРКУНОЎ Рыгор Арцем’евіч (1921) Архівавана 1 ліпеня 2020. // База даных «Мой край — Магілёўшчына»
4. Сучасны Беларускі дзяржаўны ўніверсітэт транспарту